समबारु आरो अनारिनि सिमां
कान्त राम बर’
तेजियालपारा
हादांपारा गामि । बे गामियावनो समबारु आरो अनारिया बिसि फिसाइ हौवासा गथ’ सानै राजु आरो बाबुखौ लानानै गोबां दुखु दाहानि गेजेराव गेदेर गोलाव खालामदोंमोन । बिसोर सानैखौ लानानै बिमा आरो बिफाया गोबां सिमां नुदोंमोन । फराय होनानै गेदेर मानसि खालामनायनि । बे हादांपारा गामिनियाव रांखावरिगोनां, साख्रि मावग्रा, लेखा गोरों आरो आबाद मावनानै जाग्रा सुबुं गासैबो दंजोबखायो । गामिनि गेजेरजों जिजिरि दैसाया खोलो खोलो बोहैलांदों । सारि सारि थाइजो, जाम, खान्थाल बारि, गय बारि, औवाबारि बयनिबो नख’राव माइनि बाख्रि ना, सामु, खांख्राइ जेनिबो आंखाल गैया । गामिनि आइजोफोरा गावनि आखाइजों हिसान सालियाव बायदि गाबनि आगरजों दख्ना, फालि, जोमग्रा जि, गामसा, आरनाइ दानानै खाथिनि हाथाइ बाजाराव फानहैना गावनि आरो गथ’-गथाइखौ फोरोंनाय खरसाफोरखौ दिहुनना लायो । गामिनि मानसिफोरा बाथौ दोहोरोमारि आरो बिथांमोना बाथौखौ गोबां फोथायो । राइजो राजाया बाथौ थानसालिखौ बेसेबां गिदिर पाक्काजों बानायना लादों । थानसालिनि सोरगिदिं समायना रमायना बिबार बागान । गामियावनो गुदि फरायसालिजों लोगोसे गोजौ फरायसालियाबो सरजाबफानाय । गामिनि 1 कि: मि: गोजानाव गंसे गिदिर हाथाय-बाजार आरो बे बाजारनि खाथियावनो हादांपारा दख’रा दुलाराइ बर’ फरायसा आफादनि मावखुलिया दङ । बेबादि गामियावनो राइजो जादोंमोन समबारु आरो अनारिया गथ’ हौवासा राजु आरो बाबुखौ लानानै ।
राजुवा एम.ए. खौ पास खाला-मबाय नाथाय बाबुवा मेट्रिकखौल’ पास खालामखांनानै फरायनायखौ ब्लद गारना खाथिनि बर’ फरायसा आफादनि हारिमु नेहाथारि जानानै अफिसावनो थाबाय । राजु आरो बाबु बिमा बिफानि नोजोराव सानैबो अनथाव बाथाव हौवासा गथ’ । जोनोमगिरि बिमा बिफाखौ बिसोर सानैया ईस्वोर बादि गोबां फोथायोमोन ।
बे बिलात लाथायाव सोरनि खाफा-लाव मा लिरनाय थायो बेखौ रावबो मिथिजोबा । बेखौ सोरजिगिरि आनान गसा-इयासो मिथिगौ । बेबादिनो सानसे समबारु आरो अनारिनि खाफाला गेवबाय । गेदेर फिसाज्ला राजुवा गामिनि गोजौ फरा-यसालियाव लेङाइ फोरोंगिरि साख्रि मोन-बाय । राजुनि साख्रि मोननायनि खौरांखौ मिथिनानै समबारु आरो अनारिनि गोसो-आव रंजानायनि बाना गैया जाबाय । राजु आरो बाबुनि बिमा बिफाया सानबाय— बाबुखौबो माबा मोनसे खालामनो हायोब्ला मोजां जागौमोन । बियो समबारु आरो अना-रिनि गोसोआव साननाय । नाथाय बाबुवा बिमा बिफा आरो बिदानि सिगाङाव खोन्थाना लाबाय बियो जेबो साख्रिखौनो मावा होननानै । बे साननिफ्रायनो बाबुखौ नख’रनि बिमा-बिफा आरो बिदामोना एसे सैया सैया खालामनाय जाबाय । बाबुवा एबसुवाव थानायखौ नख’रनि बिमा-बिफा आरो बिदामोना एसेबो लुबैयामोन । नाथाय बाबुवा एबसुखौ गोसो गोरबोजों फोथा-योमोन । गावनि आंगो बर’ माहारिनि मोन-सेल’ गोहो गोरा आफादखौ जिउवै माहामै मोजां मोनदोंमोन । एबसुनि हारिमु नेहा-थारि जानानै बेनि मावनांगौ हाबाफोरखौ फारि फारि मावलांदोंमोन । बाबुवा मेथाइ लिरनाय, खन्नाय, दामनाय-देनाय आरो गासैबो बिथिङावनो आखा-फाखामोन । बियो गोबां जायगायाव मेथाइ रोजाबनानै बै ओनसोलनि मुं लाबोदोंमोन । एबसुनि आफा-दगिरि, नेहाथारि, सोद्रोमा आरो ओनसोलनि बयबो राइजो राजाया बाबुखौ मोजां मोन-दोंमोन ।
सानसेखालि समबारु आरो अना-रिनि गेदेर फिसाज्ला राजुवा गामि खाथिनि हार्सा हिनजाव सासे सिरि सिरि मोजां मोनबाय थादोंमोन । उनाव बिमा बिफाया मिथिनानै गुबुन हारिनि हिन्जावब्लाबो मुगैयाजासे राजुखौ हाबा खालाम होबाय । राजुआ संसार जानायनि बान्दोआव गोग्लै-बाय । हार्सा हिनजावनालाय बर’नि नेम खान्थि मानिनानै सोलिनो गोब्राब मोन-दोंमोन । नाथाय बिमा-बिफाया हार्साब्लाबो बिहामजोखौ गावनि असे फिसा हिन्जाव बादि अनसोगारोमोन । नाथाय राजुनि हिन्जावा माखासे नंखाय-बाखाय गाज्रि गाज्रि रायखोमानानै समबारु आरो अना-रिखौ दुखु होबाय थायो । दाहोना रुवाथि बादि नख’रनि गासै खामानिफोरखौ माव-होयो । नाथाय हिनजावनि सिङाव सोलि-नाय राजुवा एसेबां मोजां मोनग्रा बिमा-बिफानि सायाव खालामनाय इनाय बाना-यनि सायाव जेबो बुंनो हाया जाबाय । हिनजावनि बादिनो राजुवाबो बिमा बिफा-खौ सैया सैया खालामनाय जाबाय । बेबा-दिनो बिहामजोनि अत्यासारजों सानफ्रोमबो मेगन मोदै आरो दुखु-दाहाखौ सहायनो हायै-याव ननिफ्राय थफ्ला-थफ्लि बुननानै बाबुखौ नागिरना एबसु अफिसनिसम सहैनायसै । बाबुवा बिमा बिफाखौ बिब्दि नुनानै गोमो हाबबाय । आइ आरो आफा नोंसोरहा मा जादों बेबादि गले गले सोंनायाव समबारु आरो अनारिया हार्सा हिनजाव बिहामजोनि अत्यासार खालामनाय गासै दुखु गोनां जारिमिनखौ फारि फारियै बाबुनि सिगा-ङाव फोरमायबाय । बाबुवा जोबोद दुखु मोनखांबाय । मालाइ हारि हिनजावनि सिङाव थाग्रा बिदा राजुनिसिम जोबोद रागा जोंखांनाय फैनायसै । बियो बिमा बिफानि सिगाङाव सिमान लाबाय । आंहा साख्रि गैयाब्लाबो दिनैफ्राय माबा मोनसे खालामनानै नोंथांमोनखौ फिसिनायनि गासैबो बिबानखौ आं लाबाय आई आरो आफा । बेबादि होननानै बिमा बिफानि आथिङाव खुलुमबाय बाबुवा । समबारु आरो अनारिया बाबुखौ गोबाख्रब गाब-बोबाय लोगोसे अफिसनि गासैबो मोदै हुगारबाय । ❏❏❏
No comments:
Post a Comment