हालो दैलो रंजा बाजा (A Bodo article about Rongjali Bwisagu, the national festivel of the Bodos)

हालो दैलो रंजा बाजा

सुमित्रा बर’

कबिरालि

हालो दैलो रंजाबाजा हाय लोगो

सफैलायबाय हनै सफैलायबाय

बिलाइ गोजाम सिरिलांबाय

बिलाइ गोदाना खिलिखांबाय

बिफां बारस्लाय बारस्लाय

दाउ खौऔआबो गाबफैलायबाय

हाय लोगो बैसागु बोथोरा सफैलायबाय

बोथोर गोदाना सफैलायबाय ।

            बिफां लाइफांआ गोजामखौ गारनानै गोदान गानानायजों मान्दार, सिमली आरिआ अख्रांआव अर जोंनाय बादि जुगु जुगु अरखि बादि गोजा बिबार गानफबनायजों पलास हरि बिफांनि गोमो बिबार गानफबनायजों उदां बोथोरनि रादाब लबोयो । मिथिंगा रानिनि सोमखोर समायना, गोमो गोजा बायदि गाबनि आबिरजों दाउ खौऔनि गोदै देंखोजों सैत्र दान बारनानै लासै लासैनो बैसाग दाननि लांगोना मोखाङाव आगान होफैयो । बोथोर गोदाननि रादाब होफैयो । मिथिंगाजों लोगोसे आसामनि गुबुन गुबुन हरि माहारिफोरनि बादि बर’ हारिनि मानसिफोरनि गेजेरावबो रंजा खुंसिनि निजोरा बोहैबोयो । बैसागुनि रंजानायाव गेदेर, उन्दै, सेंग्रा-सिख्ला, बोराइ-बेन्थ’ बयबो मुखुब जायो ।

            बैसागुआ बर’फोरनि देरसिन रंजानाय फोरबो । उदां बोथोरनि रंजानाय बे बैसागुआ जोंनि आसामाव खुंनाय समाव सा सानजा भारत आरो भारतनि गोबां ओनसोलाव गुबुन गुबुन मुङै बे बादि फोरबो खुंङो । आसामनि बिहु, विसु, बुसु बायदि रंजानाय फोरबोफोरजों बैसागुहा थोंजों सोमोन्दो दं । गोरोबलायनाय दं । नाथाय असमीया बिहु होनोब्ला मोनथाम हमनाय जायो । जेरै: बहाग बिहु, माध बिहु आरो काति बिहु । नाथाय बर’आव बैसागु होनोब्ला उदां बोथोरनि रंजानाय फोरबोखौसो बुंनाय जायो । मागो दमासि आरो काति गासाखौ फोरबो हिसाबै खुंनाय जायो । बर’फोरनि गेजेराव बे मोनथाम फोरबोनि बाहेराबो आमथि सुवा फोरबो आरो ओंखाम गोरलै जानाय फोरबो लानानै बोसोराव गासै मोनबा फोरबो खुंनाय जायो ।

            बैसागु फोरबोनि आसार खान्थि बाउनाय थिनाय मोसानाय रोजाबनाय, सम बायदि बिथिंखौ नोजोर बोनानै बेयो गुबैयै आबादारि रंजानाय बे खोथाखौ गोरलैयै हमदां हायो । बैसागु मोसानाय आरो रोजाबनाया बर’फोरनि हारिमुनि मोनसे एंगारहायै बाहागो । बैसागु बे सोदोबा बर’फोरनि समाजारि जिउआव जोबोर आंगो । बैसागुनि सि-आरि (अध्यात्मिक) आसार खान्थिनि गेजेराव सान्ति-गोजोन आरो सेंग्रा सिख्लाफोरनि उदाङै गोसो होसारनानै मोसानायनि गेजेराव गोहो आरो उदांनि इसारा नुनो मोननाय जायो, बेनिखायनो बैसागुआ गोजोन, गोहो आरो उदां (मुक्ति) नि नेरसोन। बर’फोरनि बैसागु रंजानाय फोरबोआ आसामनि समाज आरो हारिमुआव मा बादि जायगा आवग्रिना दं बेनि रोखा सिनायथि होयो ।

            आसामनि असमीयाफोर बादिनो बर’फोराबो माब्लाबानिफ्राय बैसागु रंजाथाइखौ खुंबोदोंमोन बेनि फोरमान होनो हायाब्लाबो समाज दानानै राइजो जाबोनाय समनिफ्रायनो रंजाबोदों होनना साननो हायो । जायखि जाया बर’फोरा बे रंजाथाइखौ सोमोन्दो गोनां महरै बांला एबा असमीया हारिनि बोसोर साननाय हुदा बैसाख दानजों गोरोबनानै खुंनाय नुनो मोनो । मानोना बर’फोरा गावनि आंगो थि खालार साननाय हुदा गैया । बर’फोरा बैसागुखौ “बैसागो” होननानैबो बाहायो । बे मोननै सोदोबनि सोमोन्दै बर’ लिरगिरिफोरा गुबुन गुबुन बिजिरथि होलांदों । गाहायाव बेनि सोमोन्दै इसे सावरायनाय जाबाय-

            ड: कामेश्वर ब्रह्मआ बिथांनि “A study of socio religious beliefs and practices and ceremonies of the Bodos.” बिजाबाव बैसागुनि सोमोन्दै कामिनी नार्जारीआ बेखेवथि होनायखौ ओरै फोरमायदों: বৈশাগু শব্দৰ মূল হ’ল বৈশ (baisa) যাৰ অৰ্থ “বছৰ” অথবা বয়স আৰু “আগুৰ” অৰ্থ হ’ল “আৰম্ভনি”৷ অৰ্থাৎ - “বৈশ+আগু>বৈসাগু” বা বছৰৰ আৰম্ভনি৷

            ड: ब्रह्म बिथाङा गावबो बैसागुनि सोमोन्दै एरै होनदों – This spring time festivel is observed at the starting part of the Assamese month Bohag, which they call Baisakh. It may be stated that as it is observed at the very early part of the first month of the year, it is called as Baisakh+Agu>Baisagu.

            लक्षेश्वर ब्रह्म बिथाङाबो गावनि “(বৈশাগু আৰু হাৰিমু)” बिजाबाव बैसागुखौ एरै बेखेवदों “বৈশাগু+হু>বৈশাগু। बर’ सोदोब हुनि ओंथिया फुजा होनाय जायोखायनो बैसागु सोदोबा जानो हागौ होनना बिथाङा बुंदों ।

            ड: भुपेन नार्जारियाबो एरै बायदि फोरमायदों “बिहु” सोदोबा बर’ सोदोब । बे सोदोबा “बि” आरो “हो” मोननैनि जथाय सोदोब । “बि”नि ओंथिया जाबाय बिनाय आरो “हो”नि ओंथिया जाबाय होनाय । बेनिफ्रायनो बिहो>बिहु जादों ।

            जायखि जाया बैसागु रंजानायनि गुदियाव दि बोथोरजों सोमोन्दो दङ बेयो रोखा नुनो मोनो । गमामायैनो गोदोआव बैसागुखौ दानफा गाहाइ फालियोमोन । नाथाय आथिखालनि समाव बेयो लासैयै सप्ताह खनसे जालांदोंसै ।

            बैसागु रंजानाय फोरबोजों सोमोन्दो लाखिना बायदि आसार फालिनाय जायो । नबां लिरस्रांना साखोन-सिखोन खालामो, सिजौ गुदियाव आर’ज गाबो, नखरनि रुंसारि सुबुंफोरखौ गोसो खांना जाग्रा मुवा बाउनाय जायो । सैथ्र दाननि जोबथा सानखालि एबा सैथ्र-बैसागुनि दमासि खालिनिफ्राय बैसागु जागायजेनो । बे सानखालि गिबि बैसागु एबा मोसौनि बैसागु होननाय जायो । मोसौ बैसागु खालि फुङावनो मोसौफोरखौ साइ-हांगार सावना जाथि थावजों गलायना फाख्रा-सिख्रा गाब फुनानाय जायो । गोदोआव लाउ फानथावनि माला गानहोनाय जायोमोन, दिग्लिलिथि, माखिलथि आरि बिलाइजों मोसौफोरखौ बुस्रेद बुस्रेद खालामनानै दैसा, बिलो फोराव लांनानै थुखैनाय जायो । थुखैनाय समाव रोजाबनाय जायो । जेरै:

लाव जा फानथाव जा

बोसोर बोसोर एर हान्जा हान्जा,

बिमानि खिथेर बिफानि खिथेर

नोंसोर जागोन हालुवा गेदेर,

बिमा गाइदे बादि दाजा

बिफा बलद बादि जा ।

बारि खनानि एम्बु बंला

बिबादि जा गिदिर जांगिला ।

            बेनि उनाव मोसौफोरखौ फोथाराव हगारना होयो । आथिखालाव हगारना होनाय खमिलांदों, मानो होनोब्ला बोसोरनि बार मास बायदि रोखोमनि आबाद मावनाय जायो । आबाद जा-जानायनिफ्राय खारगनो आथिखालाव हगारनाया खमसै । मोनायाव मोसौफोरखौ लाबोना दिरुं गोदानजों खानाय जायो । मोसौ गलियाव धुप-धुना सावनाय जायो । जिगाब दिंखिया (बिह दिंखिया) आरि जाबनानै उखुन्दै होनाय जायो । गिसिब सिबना होनानै थामफै, दांसोफोरखौ होहरनाय जायो । बे सानखालिनिफ्राय मानसिफोराबो गिसिब सिबनो मोनो होननानै फोथायो । मोसौफोरखौ बेखालि लावथि गनजों बुनो मोना होनना फोथायो, मानसिफोरा बुब्ला जोनोमाव मोसौ जानानै उजिफिनो । बेखायनो मानसिबो बुनो मोना होनना फोथायनाय जायो । बेबादिनो बैसागुनि सेथि सानखौ मोसौनि बैसागु महरै खुंनाय जायो ।

            अखानायै बैसागु दाननि सेथि अख्थ’ । बे सानखौ मानसि बैसागु महरै फालिनाय जायो । फुङावनो दुगैस्रां लोबस्रां अबंलाउरिनि खाथियाव आर’ज गाबनानै नख’रनि उन्दैफोरा गिदिरफोरखौ  हान्थु खारिनानै खुलुमो । गिदिरा उन्दैनो बोर सारस्रियो । नखर-नखर खुंखा एवनानै जायो । खायफाया मोसौ बैसागु खालिनो बायदि रोखोम गोखा ज खालाननानै सङो । जायगा लायै लायै सोरबाया खुंखा जानाय, सोरबाया गोखा-गोखै जानाय होननानै बुङो ।

            जायखि जाया जाखां लोंखांनायनि उनाव खाम, सिफुं, जथा, सेरजा रिंखांनायजों मानसिफोरनि गोसोआबो रंजाखाङो । सेंग्रा-सिख्ला, बोराइ-बुरै, गथ’-गथाइ बैबो बोदोर जायो । नखर नखर थांना बैसागु रंजालायो, बिलायलायो । गोदो गोदायनि बादिनो बैसागु बोथोराव रंजा-बाजा गोदान बोथोरखौ बरायनो बयबो हांखुर जायो । गोरबोनि मेंनाय, बानाय, मुगैनाय, रागा जोंनाय, मोनसा मोनसि गारनानै बयबो अनलायनायनि, फोथायलायनायनि, गोरोबलायनायनि जोंथि नेरसोन फोरमायो । बैसागु  मेथाइफोरनि गेजरजों गोबां सावगारि बेरखांनाय नुनो मोनो । जेरै:

i) मिथिंगानि सावगारि बेरखांनाय बैसागु मेथाइ,

ii)हाबा मावनाय दांनायनि बाथ्रा बेरखांनाय बैसागु मेथाइ,

iii) मोजां मोननाय सानस्रि बेरखांनाय बैसागु मेथाइ,

iv) दाहानि देंखो बेरखांनाय बैसागु मेथाइ,

v) जंखायनाय सानस्रि बेरखांनाय बैसागु मेथाइ

            गोजौआव मख’नाय बादियै मेथाइयाव बेरखांनाय सावगारिफोरखौ फोरमायनो नाजानाय जाबाय:

i) मिथिंगायारि सावगारि बेरखांनाय बैसागु मेथाइ

बैसागु आय बैसागु

बोथोर गोजामा थांलायबाय

बोथोर गोदाना फैलायबाय

बैसागु आय बैसागु

बोथोर गोदाननि बार मोननानै

दंफां लाइफाङा,

दावमा दावसाया

रंजाखांबाय हनै

फैदो दिनै बयबो

बोराय बुरै सेंग्रा सिख्ला

गथ’ गथाइ रंजादिनि ।

 ii) हाबा मावनाय दांनायनि मेथाइ: बर’ सेंग्रा सिख्लाफोरा बैसागु मेथाइनि गेजेरजों मावनाय दांनायनि सांग्रांथि फोरमायो ।

आगै मोनबारिनि,

माय गायनाया आगै माय गायनाया

गेजेराव दावब’ लामा

गोसो होनानै गाय आगै

माय जायाबोला

जोंलाय माखौ जानो आगै माखौ जानो

सिख्लायाबो फिनो-

आदा सायाराम गाजोला

हाल एव आदा खदाल जाव

हाल एवाबोला खदाल जावाबोला

जोंनि नख’रालाय माखो जानो

आदा माखौ जानो ।

iii) मोजां मोननाय सानस्रि बेरखांनाय मेथाइ:

            सेंग्रा सिख्लानि मोजां मोननाय सानस्रिया बैसागु बोथोराव मेथाइनि गेजेरजों गोरबो उसिफावनानै ओंखारबोयो-

बै नुहरनाय गामिनि सोमजोरो नायनो मोजां

आगैलै नोंखौ नुवाबोला जायो गोसोआ उरां फारां

आदा हाय गुफुरै जांगिला आदै मद’

मानोथो जाखो नोंलाय आख’ फाख’।

दे बिदिब्ला बैसागु बोथोरा जोबग्रोथोंसै

बैसागु जोबब्लानो नोंखौ आं लांफैनोसै ।

iv) दाहानि देंखो बेरखांनाय बैसागु मेथाइ:

            गोसोनि हास्थायनाय, लुबैनाया मोनफुंजोबा, सेंग्रा सिख्लानि सिमांआबो जाफुंजोबा बेफोरनि दाहाया बैसागु मेथाइनि गेजेरजों बेरखाङो-

आंखो लांफै आदा आंखो लांफै

जामफै सेरावनि सायाराम मान्दार बिबार

आदा सायाराम मान्दार बिबार

आंखौ लाङाबोला हांमा थागोन आदा

बर’ मुंजों मुसे हांमा थागोन

हारसा मुंजों मुसे हांमा थागोन

बिखायाव दावदाव थागोन

आदा सायाराम मान्दार बिबार

v) जंखायनाय सानस्रि बेरखांनाय मेथाइ:

            बैसागु रंजानायाव जंखायलायनाय मेथाइया जोबोर मुजिहावथारो । जंखायलायनाय मेथाइफोरा बैसो आरो सोमोन्दो लानानै गोबां दं । जेरै: मेगन खेबलायनाय, सेग्रा-सिख्लानि जंखायलायनाय, बिगुमै बिबोनां जंखायलायनाय, बिबाजैफोरजों जंखायलायनाय, बेवाइफोरखौ जंखायनाय, बिखुनजो बिजामादै जंखायलायनाय बायदि बायदि ।

क) सेंग्रा सिख्ला जंखायनाय-

सेंग्रा:            खान्थाल बिलाइ सब सब

                  थाइजौ बिलाइ स्रब

                  गोमो गोजा गाबनाय सिख्लाया

                  आंनि नआव थ्रोब

                  आंनि नआव थ्रोब

सिख्ला:        खुसिया लानजाइ लरो लरो

                  मा बिलो हाय बिमा बिलो?

                  बिखुनजोखो गोसो थोनायो

                  सोर जोहोलाव बि

                  सोर जोहोलाव ।

ख) बिखुनजो/बिजामादै जंखायलायनाय:

बिखुनजो:     बिलो बिदांनि ना खावै

                  अ’ आयै ना खावैनोंजा

                  जोंहा जावैया रावै बा

बिजामादै:     आदै थिलाला आयै नोंजा मादैया

                  गन्थं जंजिर जिर आय नोंजामादैया

                  जानथि सेरथे थे आयै नोंजामादैया

ग) बिगुमै बिबोनां जंखायलायनाय:

 बिगुमै :        ओइ बिबोनां गदाय

                  आगै मोनबारि बिबारि

                  फै मोसानि सनाफोर

                  बयबो सारि सारा

बिबोनां:        फर्वत जरायाव दंफां दाननो

                  थांबोला थांबोला

                  साल ज’रा माखु ज’रा

                  लाबो लाबो गुमै लारु बान्दारु

            जोबथारनायाव बुंनो हायो दि बैसागु रंजानाय आरो बैसागु मेथाइया बोथोर आरो मिथिंगानि हांख्रायनायाव गावनो गाव उसिफावनाय गोसोज्लिउनि बोरखांनाय महर । मिथिंगा बिमाजों सुबुं माहारिनि जा सोमोन्दो बेनिफ्रायनो सोमजिनाय । मिथिंगानि दंफां लाइफां, बिबार, बिथाइ-फिथाइ आरो दैमा दैसा, हाजो हालाफोरखौ लानानै सेंग्रा सिख्लाफोरा गावनि मोजां मोननाय, दाहा-जिंगा, हास्थायनाय-लुबैनायखौ बैसागु मेथाइनि गेजेरजों बेखेवसारना होयो । मिथिंगानि समायना रमायना गानफबनायजों बोथोर गोदान सफैनाय लोगो लोगो बैसागु मेथाइफोराबो समायना गाब आरो रुपजों जोंखोल जायो । खाम, सिफुं, जथा, सेरजा, गंगनाजों मिथिंगा बिखाया गोमखांलायो । गोदान बोथोर फैलायो हालो दैलोयै, रंजा बाजायै । ❏❏❏

N.B.: This article was published in the 8^th issue “Rongjali” the mouth piece of Kalaigaon Bisungra Harimu Afaad in the occation of its Rongjali Bwisagu Celebration, 2017 at Gandhi Bakari, Kalaigaon.