सुबुं माहारिया फोथायनाय खायसे खोमसि नेम (an article about Superstition in our societies)

सुबुं माहारिया फोथायनाय खायसे खोमसि नेम

फनिधर बागलारी

तेजियालपारा

            दिनै नैरोजा जिस्नि मायथाइनि ब्रै दान बारलांनोसै । बेनि अनगायैबो बिगियान आरो कम्पिउटार मुगायाव दाबो खोमसि फोथायनो सम दङ नामा ? दासिम सुबुं माहारिया ओंथि गैयि माखासे जाहोनफोरखौ फोथायो । नाथाय बेफोरखौ बाउलांनो एबा गारनो थाखाय मानो नागिरा ? बिसोर बादि सुबुं माहारिनि थाखाय मासे माउजिया गावनि गोसो बादियै थाबायनो हाया । जेरै – बहाबा थाङोब्ला साइखेल, बाइक, गारिजों थांनाय समाव माउजिया लामा बारना खारलाङोब्ला गाज्रि होननानै सानो । बेबादिनो जिबौखौनो बाजो बादिनो सानो । दाउखा मासेआबो गाव मानि दायाव एबा दुखुआव गाबदों बेखौ साना हवा । दाउखाया गोरान दालाइयाव जनानै गाबोब्ला नखराव खैफोद जागोन होननानै सानो ।

            उनफिननानै थानाय जोंनि बर’ समाजाव अजा, बेज, कबिराज, टाबिज बायदि सोदोबफोर बाहायनाया जेरै बादि सरासनस्रा एबा साधारन बेफोर बादिनो दायना सोदोबाबो सानफ्रोमबो बाहायजायो होनना बुङोब्ला बारा बुंनाय जानाय नङा । बुहुमनि सुबुं माहारिया जौगानायनि थिखिनि बिजौ सहैनाय समावबो जोंनि माहारिनि गेजेराव बेफोर बादि दायगैयि मानसिफोरखौ अना-खाना सिथारलायनाय, जर-जुलुम खालामना नखर आरो गामिनिफ्राय आलाय-सिलाय होखारहरनाय बायदि जाबाय थानाय जाथाइफोरा दिनैनि सोद्रोम समाजनि थाखाय मोनसे गोसोम दागो । बेदि जाथाइफोर दिनैल’ जादों बेदि नङा, गोदोनिफ्रायनो जोंनि समाजाव हारसिङै थानाय बोराय एबा राहा गोथे आइजो मानसिफोरनि सायाव “दाइना” बे गाज्रि मुंखौ जाबसिनना होनानै बिखौ जुर-जलम एबा बुथार-सिथार खालामबोनायखौ नुनो मोनदों । बेराम जायोब्ला गामियाव बर’ मानसिफोरा दाबो दक्तरनियाव थाङालासिनो खाथियावनो मोननाय फिसा-फिसौ अजा, बेज, कबिराज, साधु-सन्यासि आरो नायखांगिरिफोरनियावसो बिहिर जाहैनाय नुनो मोनो। दाइना दाइनि फोथायनाय आरो गोसारनायाबो बेफोरनिफ्रायनो गुवार आरो गोरासिन जालांनायखौ नुनो मोनो । मानसिफोरा अजा  आरो कबिराजफोरखौ मोदाइफोर बादि फोथायनानै लायो । गोबां अजा आरो कबिराजफोरानो मानसिफोरनि बेबादि गोरलै आरो गोथौ फोथायनायखौ नुनानै गावनि राहा गोथे एबा हायैखौ फांथेनो बेरामिखौ सोरबा गाज्रि मुलि दौहोदों, मोदोम खानानै दोनदों बायदिसिना मोनथिसहायै जेथो गोनां रावजों गावनि गोसोबादि मानसिफोरखौ थगायनो लायो । बेबादिनो बिसोरो गावसोरनि सोरबा बादायगिरि राहागोथे बोराइ एबा हारसिं थानाय हिन्जाव मानसिफोरखौ जोबोद गोरलैयैनो दाइना होननानै राइजोफोरखौ फोथायहोयो ।

            अजा, कबिराज, ज्योतिसि, बाबा, सन्यासि आरो नायखांगिरि बायदिफोरनि धान्दाया जोंनि गामि गफाफोरावल’ दं बेदि नङा । बिसोरनि आखाइया जोबोर गोलाव । टाउन सहराव थानाय गिदिर गिदिर फालांगिरि आरो खुंथाइयाव थानाय दैदेनगिरिफोरखौ बिसोर गावसोरनि आखाइ मोजोमाव लानो हादों । टाउन सहरनि लामा-सामा खना-खनला फोसावबिलाइ एबा मिथिसार बिलाइफोर गोबां नुनो मोनो । पन्डित भृगु आचार्य गल्ड मेदेलिष्ट से धन्टायाव गासै जेंना लिरहर एबा फन खालाम एबा लोगो हमफै – बायदि बायदि । गुबुन मा जागोन, जेंनाखौ माब्रै बोस्रांनो हागोन बेफोरबादि फिसा-फिसा सोंथिफोरा रोजा रोजाल’ नङा, लाख-लाख नखरफोराव दं । बेफोर नखरनि मानसिफोरखौ गावसोरनि खैसाराव गासोमहोनो थाखाय बिसोरो मोनसे गिदिर मेसिनारि दानानै लादों जायफोर धोरोमनि खसाब गाननानै ज्योतिसि, ताबिज, पात्थर, जादु मन्त्रजों सुबुंफोरखौ जाम्बा खालामनानै गावसोर खामायगासिनो । बिसोर जेंनायाव गाबनाय रोजा रोजा सुबुंफोरखौ थगाय थसि खालामना गावसोरनि सिफिखौ गिलिर खालामना मानसिफोरनि जेंनाखौ आरोबाव गोबांसिन खालामहोदों ।

            गोबां जेंनाफोरखौ जों गावनो खालामनानै लायो । जायफोर सुबुंआ गोरा, अन्नायजों सानै हयै खामानि मावो बिसोरखौ जेंनाया गावबा गावनो नागारलाङो । जायफोर सुबुङा लोरबां, खोमसि फोथायसुला, गिख’ आरो अलसिया बिसोरो गावनो जेंनायाव गासोमनानै लायो । जुदि नोंनि नखराव माबाफोर जेंना-जेथो एबा बेराम आजारफोर जादोंब्ला नाङा-फाङा तन्त्र-मन्त्र, ताबिज-मादलि बायदिफोरजों जेंनाखौ बोस्रांनायनि लामा दा नायगिर ।

            गसाइया सुबुंफोरखौल’ नङा जुनारफोरनोबो थांना थानायनि गोहो हरदों । सुबुंफोराथ’ गोफार मेलेम दंबावोसो जायजों गावनि गोरोन्थि मावलांनायनिफ्राय सोलोंनो हायो आरो जाफुंसार सुबुंफोरनि लामाखौ संनो हायो । मादलि-ताबिजनि दालालफोरा मानसिफोरखौ जाम्बा खालामनानैसो बेफोरखौ फानो बिसोर बुङो-  नोंनि नखराव एबा नोंनि मोदोमाव जायफोर जेंना जेथोफोर नुजादों बेफोरखौ गुबुनआसो खालादों । थार बाथ्राखौ बुंनो थाङोब्ला, दाइना होननानै बुंनो हानाय रावबो मानसि गैया । मानसिफोरा गोरलैयैनो फोथायनानै लानायखौ नुनानैसो अजा आरो कबिराजफोरा बेनि मुलाम्फाखौ बुथुमनानै गावबा गावनि सिफिखौ गिलिर खालामो । भुत, प्रेत एबा मोदाइ-दावदाइफोर बेफोर गासैबो गोसोनि गिनायसो । ❏❏❏

N.B.: This article is published in the 8th editioned "Rongjali" (रंजालि), the Mouth Piece of Kalaigaon Bisungra Harimu Afaad on the occation of its Rongjali Bwisagu Celebration at Kalaigaon.