Sadness: दुखु आरो माखासे गोसोनि बाथ्रा

Sadness: दुखु आरो माखासे गोसोनि बाथ्रा

दिनै फुंआव सासे लोगोनि मोनसे मोजां खन्थाइ फरायनो मोनबाय

“जिउवालाय आरो बेदिनोसै..

गसाइजों लिरखाजानाय रेखा

गासैनियाबो गासैजों गोरोबलाया.....”

                                           

            साननैसोनि सिगांनिफ्राय मोनसे बाथ्राया आंनि गोसो-गोरबोआव गोबां दुखु होदों । दैनि बेदलावा सिथाबनानै थानाय बादि दुखुआ नागारनो लुबैयाखै । बेयावनो आरो माखासेनि जोंनाय अराव घिउ लुनानै होनाय बादि बाथ्रा, खौरां आरो जाथायफोरा गोसोआव रासिन दुखु होदों । बेबो आरोबाव गावनि लोगोफोरनिफ्राय खोनाननै, मिथिनानै जोंब्लावनाय अराव आगान गानाय बादि मोनसे असदा मोन्दांथि जादों । फुंआवनो  बे खन्थाइखौ फेसबुकाव मोननानै गोसोआव एसे गोजोननायबो मोनदों । नंमारगौ सबनिबो जिउनि लिरखाजानाय सल’फोरा एखे नङा ।

             दुखुखौ इंराजियाव सेदनेस (Sadness) होनना बुंनाय जायो । बुहुमाव एरैबादि सुबुं गैया जाया जिउआव जेब्लाबो दुखु मोनाखै एबा दुखु जायाखै । गावआरि आरो बाइजोआरि जाहोनाव गोबां समाव जों दुखु खालामनो गोनां जायो । मानसिनि दुखु नांनाया बेराम नङा । बेयो बेराम जानो हाया । मानोना दुखु नाङोब्लाबो बे दुखुआ थाजोर नङा- दान्दिसे समनि थाखाय एबा साननैसोनि थाखाय दुखुआ थायोब्लाबो उनाव गावनो गाव बेयो मोजां जालाङो । बेखायनो दुखु आरो सुखुखौ जिउनि लोगोरि होननानै बुंनाय जायो । जायखि जायाथों जेब्लानो मानसिया गावनि गोसोनि लुबैनाय-हास्थायनायफोरखौ मोननो हाया अब्लानो गोसोआव दुखु मोनो । बे दुखु जानायनि जाहोनफोरा गुबुन गुबुन मानसिनि गुबुन गुबुन जानो हागौ । गाहायाव माखासे जाहोनफोरखौ मख’नो नागिरनाय जाबाय-

क) सोलेरारि जाहोन (Physical Causes)

ख) गोसोआरि जाहोन (Psychological Causes)

ग) बाइजोआरि जाहोन (External Causes)

घ) गावआरि जाहोन (Personal Causes)

क) सोलेरारि जाहोन:

            जेब्ला देहा एबा सोलेराव माखासे सोलायनायफोरा जायो अब्ला गोसोआव दुखु जायो । जेरै होनब्ला – बेराम आजारफोर जायोब्ला - गोरबोनि बेराम (हार्ट दिजिस), दायेबेटिस, आलजाइमार, खिनाय-हासुनाय बायदि बायदि । आइजोफोरनि बायदिसिना मेनसुरेसन जानाय सिगां एबा मोदोमाव थानाय समाव हरमननि जेंना आरिफोर जायोब्ला दुखु जायो । सोलेरारि बे दुखुआव भुगिनाय मानसिनि अनगायै नख’रनि मानसिफोरखौबो दुखु होयो । बर’फोरनि नख’राव जौ-सेरेप लोंनानै गोबां मानसिफोरा बायदिसिना बेरामाव भुगिनो गोनां जायो । बे फेग्रा मुवा-बेसादफोरनिफ्राय मायबाफोर मुलाम्फा जायो होनना आं साना । जायनि थाखाय जौखौ जोंनि हारिनि साव होननानै बुंनो हायो ।

ख) गोसोआरि जाहोन:

            गोसोआरि बायदिसिना जाहोना जोंनि गोसोआव दुखु होयो । गोसोआरि माखासे जाहोननि बिदिन्थि हिसाबै जों बुंनो हायो- सोरबा नख’राव मानसिफोर थैयोब्ला, सन्मान हानि जानाय, इनकाम एबा आरजिनाय, फोथायनाय एबा  इयुनाव मा जाहैगोन साननानै आसा गोमानाय, लामा आन्दायनाय बायदि बायदि । माखासे खामानि जायफोरखौ जों जेब्लाबो जाफुंहोनो हाया एबा जोंनि केपासितिनि गोबां गोजानाव बेबादि बाथ्राफोरखौ साननानै जोंनि गोसोआव दुखु मोनो । जेब्ला सोरबा माइबा जाहोनाव नख’रनिफ्राय गोजानाव थाहैनांगौ जायो  अब्लाबो गावनि नख’रनि आंगो बाय बाहागि बिथांमोनखौ गोसोखांना दुखु मोनो । मालाबा जिउआव बुंनाङै बाथ्राफोरखौ सोरबा लोगोनि सिगाङाव बुफ्लांबाबो बे बाथ्राया जोंखौ गोबां दुखु होयो । गोबां बोसोरनि सिगाङाव सासे गामिनि मानसिनि मोनसे बिसाराव आं बिनि खामानियाव जोबोद दुखु मोनदोंमोन । जेब्ला बिसार सोलिगासिनो दंमोन आं मोनसे बाथ्रा गोरोन्थियै बुंफ्लांदोमोन । जाथाय जानाया गोबां बोसोर बारलांबायब्लाबो नाथाय बे बाथ्राया आंखौ दाबो दुखु होयो । बेबादि गोरोन्थि मावफ्लांनाय खामानि आरो गोरोन्थि बुंफ्लांनाय बाथ्राफोरखौ मानसिया जेब्लाबो बावनो हाया । जानो हागौ गोसोआव एरख’ एरख’ दुखु होनाय बे बाथ्राफोरखौनो फाफ होननानै बुङो ।

ग) बाइजोआरि जाहोन:

            जेब्ला जों सोरबा दुखुथिया मानसि लोगो मोनो अब्ला जों बिथांमोननि दुखु खोनानानै एबा मिथिनानै जोंनि गोसोआव दुखु नाङो । बिथांमोननि बाथ्राफोराव बाहागो लानायनि जाहोनाव जोंनि दुखु नाङो आरो जों बिथांमोनखौ बुजायनो नागिरो । बिदिन्थि हिसाबै जोंनि हारिनि सोरबा मानसिया गुबुन मानसिजों थगाय जायोब्ला, जोंनि गोसोआवबो दुखु नाङो । थांनाय 2011 मायथाइयाव जेब्ला दरं, उदालगुरि, कक्राझार, सिरांनि दाब दाब जायगायाव बर’फोरा बांलादेशीफोरजों दाङाबाजि जानानै जायफोरा नख’र, बारि-बागान, जिउ खहा जादोंमोन; बे बाथ्राफोरा जोंनि हारिनि साफ्रोमबो मानसिखौनो दुखु होदोंमोन । माखासेया हिन्दु दोहोरोमारि बर’फोरा मुसलिम बांलादेशीफोरनिफ्राय गोबां दुखु जारला भुगिनो गोनां जादों होनना भारतनि खना-खनलानि हिन्दु दोहोरोमारि मानसिफोरा दुखु खालामदोंमोन । बिथांमोना जोंखौ मिथिया, जोंजों जेबो बाय-बाहागिबो नङा; नाथाय गावनि दोहोरोमारि मानसिनि दुखु-जारलाया बिथांमोनखौ बाइजोनिफ्राय दुखु खालामनो बाध्य खालामदोंमोन ।  

घ) गावआरि जाहोन:

            गावआरि जाहोन होनना बुङोब्ला जाय बाथ्रा एबा जाथाइफोरा जोंखौ गावनि खामानिनि थाखाय दुखु होयो बेफोरनो गावआरि जाहोन जानो हागौ । गावनि गोबां जाहोननि थाखाय सासे मानसिया दुखु जानो हागौ । जेरैबादि साफ्रोमबो मानसिनि मावनाय दांनाय, जानाय-लोंनाय, आखल-आखुफ्रा एखे नङा; थिक बेबादिनो गावारि गियान-बुद्धिफोराबो एखे नङा । गोबां मानसिया फिसा-फेनला जाथाइ एबा बाथ्रानि थाखायबो दुखु खालामनो हागौ । नाथाय बे एखे बाथ्राखौनो गुबुन सासेया साधारन बाथ्रा होनना मानिना लानो हागौ । बेनिखायनो दुखु खालामनायनि गावआरि जाहोनफोरा सरासनस्रायै गुबुन गुबुन जायो ।

            बोराय बैसोनि मानसिफोरा सेंग्रा बैसोआव गावनि मावबोनाय गोबां खामानिनि थाखाय दुखु जायो । थिक बेबादिनो माखासे मानसिया दुखुनि मेथाइ (Sad Music) खोनानैबो दुखु खालामो । इं 2011 मायथाइयाव सासे लिरगिरिया ‘Psychology of Aesthetics, Creativity and the Arts’ आव दुखुनि देंखो एबा मेथाइफोरा जोंखौ दुखु होनो हायो नामा बेनि सायाव बिजिरसंदोंमोन । लिरगिरिनि बादिब्ला सासे मानसिया दुखुनि मेथाइ खोनासंबाय थायोब्ला बिनि गोसोआ मेथाइजों गोरोबलाङो आरो दुखु खालामनो लायो । बड’लेण्ड सोमावसारनायनि जायफोर सोमावसारारि दुखुनि मेथाइफोर सोरजिदों, बेफोरखौ खोनासंनानै बर’ बिमाया इनाय अनागार खालामजानाय बाथ्राफोरखौ गोसोखांना जोंनि गोसोआव दुखु नाङो । बेबादि लाइमोन सेंग्रा-सिख्लाफोरा रमान्टिक मेथाइ, गोसो थुलायनाय मेथाइफोरखौ खोनासंना मेथाइजों गोसोआ गोरोबलाङो आरो दुखु खालामनो लायो ।