सानजा कलाइगाव हालामाव दोहोरोमारि बिथिं आरो बर’नि हारिमु || Religion in the East Kalaigaon Bodos and Bodo Culture || An Article by Mr. Pradip Kachari

सानजा कलाइगाव हालामाव दोहोरोमारि बिथिं आरो बर’नि हारिमु

प्रदिप कसारि

पुथियाखाट

            सानजा कलाइगाव ओनसोलाव गुबुन गुबुन हारि, धोरोम, रावआरि हारिफोरजों गोरोबना थानाय मोनसे हारिया जाबाय बर’ हारि । दिनैनिफ्राय 20 बोसोर सिगाङाव सानजा कलाइगाव हालामाव बर’फोरा सा-सानजा खनायाव सिजौ गायना जिदाइन ज’रा खुन्थिया थुनानै मोनबा ज’रा खामि हेबनानै बाथौ दोहोरोम सिबिनायखौ नुनो मोनाखैमोन । बै समाव बर’फोरा बोरा गहाइ, आइ गहाइ बादि गसाइखौसो फुजिदोंमोन । बेबादिनो पुर्णिमा, अमाबयस्या आरो आवसि सानफोरखौ फालिदोंमोन । दौरिफोरा गसाइ फुजिनाय (सिबिनाय) सिगां सान खालि लधन थानानै थानसालियाव बाउग्रोयोमोन । दौरिफोरा लधन थानानै गसाइ फुजिनाया बर’फोरनि गोथार नेम एबा खान्थि । दौरिफोरा गसाइ फुजिनाय समाव गावबा गावनि खसाब गुफुर धुति, गेन्जि गुफुर आरो गुफुर हि गानोमोन । बै समाव जेबो लिरनाय मोन्थोर बिजाबफोर गैयामोन । दौरि आरो बाइलंमोना खुगाजों खुगा मोन्थोर आवरायोमोन । सरासनस्रायै बै मोन्थोरफोरा जादों- हे बोरा गहाइ, हे आइ गहाइ, मा̐ कामाख्या देबी, शरु आइ, बर आइ, न बैनी, बार’ बैनि, अथ’र बैनी बायदियानो गुबै मोन्थोरमोन । दाव, हांसो, फारौ, बोरमा बायदि जिब बुलि होनानै गसाइखौ फुजिनायनि नेम दङमोन । बे बादि बुलि होनानै फुजियोब्ला गसाइयाबो गोजोनो होनना फुथाइनाय दङमोन ।

            जेथो दानाव बर’फोरा गार्जा गसाइखौ फुजियोमोन । बे गसाइखौ फुजिनायाव थालिर बिफांनि भेल (नाव) बानायनानै दाउदै, फारौ, बोरमा आरि जिब होनानै दैमा-दैसा एबा हाख’रफोराव हगारहरोमोन । बे सानखालिनो खोमसि हरनि समाव दाउस्रि दाउ आरो एम्बु सित्र होनानै सिखाव मोदाइखौ फुजियोमोन । बै समाव बर’फोरनि मोनसे आंगो दोहोरोमारि मोनसानाय जादों दोवधनि खेराइ मोसानाय । बे मोसानाया जोबोद गिख्रांथाव । देवधनि खेराइ मोसायोब्ला थुंग्रि गुलाव आरो बोरला लानानै मोनसायोमोन ।

            बर’ हारिनि गुदि आरो आंगो दोहोरोमानो जादों बाथौ दोहोरोम । बाथौ दोहोरोमा जोबोर गोजाम दोहोरोम । बेसेबांबां रोजा बोसोर जारिमिन मोनदांस’हायै आइथो-फेनथो समनिफ्राय बाथौ दोहोरोमखौ बर’फोरा फालिबोदों । बाथौ दोहोरोमा जोबनो रोङै थैनो रोङै नुवाथारि निराकार आनान गसाइ बोराइ बाथौबो फालिनाय जादों । बिथाङानो जादों सोरजिगिरि, फालिगिरि, फोथांगिरि, फोथैगिरि । हिन्दु दोहोरोम आरो ख्रष्टान दोहोरोमनि इस्वोर जोनोमनि सान  आरो थैनायनि सानखौ मिथिनो मोनो । नाथाय नुवाथारि आनान गसाइ बोराइ बाथौनि जोनोम आरो थैनायनि सानखौ मिथिनो मोना । मानोना बिथाङानो जादों निराकार नुवाथारि आनन गासाइ, बिनान गसाइ आफा अबं लावरि बोराइ बाथौ । बाथौ दोहोरोमाव राव, हारिमु, थुनलाइ, आसार खान्थि, बाद खान्थि, समाज खान्थि, फोरबो फालिनाय, जानाय-लोंनाय, गाननाय जोमनाय, मावनाय दांनाय, साननाय हनाय, खेराइ मोसानाय, खाम, सिफुं, सेरजा, जथा, जाबस्रिं गासैबो बाथौ दोहोरोम एबा हारिमुआव दं ।

            बे बादि गोबां बोसोर बारलांनायनि उनाव इं 1993 मायथाइयाव दुलाराइ बाथौ महासभानि सिङाव थानाय आइ देवर बियाबनि माखासे गोरों गोरा, रोंखा-राखा, गाहेला बाथौ धोरोम सिबिसुला, साग्रिद सुबुंफोरनि नाजानायाव बतियामारि गामिनिनो गंब्रै सुबा लोगो लानानै बतियामारि बालिपारा सुबायाव गोथार थानसालियाव गोथार मंगलबार सानाव साननैनि हाबाफारि लानानै बाथौ गायसननाय जायो । गंब्रै सुबाया बाथौ गायसननायनि सिगाङावनो बालिपारा सुबानि मुस्रि जयराम बसुमतारिया बाथौ गायसनदोंमोन । बेनि उनाव मुस्रि दन्दि कुमार बसुमतारिया बाथौ गायसनो । बेबादि लासै लासै बाथौ दोहोरामा बे ओनसोलाव गोसारलांनो हमनायसै ।

            इं 1997 मायथाइयनि एप्रिल दानाव बतियामारि तेजियालसुबायाव बाथौ गायसनना लायो । बेबादि लासै लासै मोनसे सुबानि उनाव गुबुन मोनसे सुबा फारि फारियै बाथौ गायसननानै बर’नि आंगो दोहोरखौ सिबिनो लायो । इं 1999 मायथाइयनि एप्रिल एबा बैसाग दानाव बतियामारि बालिपारा सुबाया बाथौ गयसनो । बेबादिनो लासै लासै सा-बतियामारि (भण्डापारा सुबा) सुबायावबो बाथौ गायसनो । सा-तेजियालपारा (झारगगाव) सुबाया फारि फारियै गावनि आंगो दोहोरोम बाथौ सिजौ बिफांखौ नखर नखर गायनानै सिबिनो हमो । सानजा कलाइगाव ओनसोलाव बेबादिनो लासै लासै बाथौ दोहोरोमा गोसारनो हमो । बाथौ दोहोरोम लानाय समनिफ्राय बे ओनसोलाव बाथौ सिबियारि सुबुंफोरा हाफथानि सानसे गोथार मंगलबार सानखालि बयबो थानसालियाव आर’ज खालामो । गोथार मंगलबार सानखालिनो नख’रनि बयबो दुगैस्रां लोबस्रां बाथौ बिथाखौ लिरस्रांनानै आफा इसोरनो आर’ज खालामो । थानसालि एबा गामियाव बावनाय थायोब्ला दौरिया गोमो गाबनि गामसा आरो गस्ला गानो, दौसियाबो गोमो गाबनि गसला, गोथां गाबनि गामसा आरो गोजा गाबनि आर’नाइ लानानै थानसालियाव बावग्रोयोमोन । थानसलियाव इसोरनो आर’ज खालामनाय समाव हौवाफोरा गामसा गोथां, गस्ला गुफुर आरो आर’नाइ गोथां लायोमोन । हिन्जावफोराबो आर’जनि समाव गोमो गाबनि दखना, गुफुर ब्लाउज आरो गुफुर हि लायोमोन । इसोरखौ सिबिनायनि समाव गाननाय जोमनायनि नेम खान्थि दं । थानसलियाव सिबियारिफोरा हाबनायनि सिगाङावनो दौरिया दर मोखाङाव थानानै दै गोथार सारस्रावाना होयो । दै गोथार सारनायनि ओंथिया सिबियारिफोरनि गोसो गोरबोआ निस्थार एबा गोथार खालामनाय । सिबियारिफोरनि बयबो आखाइयाव गांफाहै आर’ज बिजाब लानानै बाथौ थानसालियाव थाङो । आर’जनि समाव जेबो दावराव दावसि, खोथा रायलायलायनायनि नेम गैया ।

            आफा इसोर बोराइ बाथौ सिबियोब्ला एबा आर’ज खालामोब्ला गोसो गोरबो गोजोननाय आरो स्रां मोनो । इसोरनिसिम फुथायनाय थायोब्ला बियो सोरगो राइजोआव जायगा मोनो होनना फोथाइनाय दं । इसोरखौ फोथायोब्ला एबा सिबिनाय थायोब्ला इसोराबो बिखौ अनो आरो खैफोद आफोदनिफ्रायबो रैखा खालामो । इसोरनि मुङा जोबोर गोदै, निस्थार एबा सैथो । बर’फोरा बाथौ दोहोरोमखौ जोबोर अनो आरो बेयो बर’फोरनि आंगो दोहोरोम । बे दोहोरमखौ जों बयबो फोसाबनाय, फेहेरनाय एबा गोसारहोनायाव बिबान दं । बाथौ दोहोरमखौ जों साफ्रोमबो बर’फोरा फोथांना लाखिनांगोन । मानोना दोहोरोमानो मोनसे हारि एबा माहारिखौ सिनायथि होयो । जायहा दोहोरोम गैया बेहा राव, हारिमु, थुनलाइ, आसार-खान्थि, समाजखान्थि, गानाय-जोमनायनि नेम गैया । जों हारि हिसाबै सानफ्रोमबो दोहोरमजों लोब्बा लाखिना सोलिनांगौ ।

            सानजा कलाइगावनि बर’ बाथौ दोहोरोम सिबियारिफोरा गाननाय-जोमानाय, मोसानाय-मोसोरनाय, बायदि फाव दिन्थिफुंनाय, गेलेनाय बादायलायानाय, हारिमु आइदाजों गोरोबना दं । बर’फोरा मोसानायाव खाम, सिफुं, सेरजा, जथा, गंगना, जाबख्रिं, थारखा आरि आगजुफोरखौ बाहायो । आगोलनि बर’फोरनि नख’राव बाहायनाय गाम्बारि खामफ्लाइ, हाथा, नावद्रा, रैइना, नांगोल-जोंगोल, मै, सेन, खखा, होखेन, बावसा बायदि आगजुफोरा बर’नि आगजु । बेफोर गासै आगजुफोरखौ सानजा कलाइगाव ओनसोलनि बर’फोरा बाहायगासिनो दं ।

            बाथौ दोहोरोमारि सुबुंफोरनि फोरबोआ मोनबा । बे फोरबोफोरा जादों – क) बैसागु फोरबो, ख) आवसिया खेराइ फोरबो, ग) मायनाव फोरबो, घ) गोरलै जानाय फोरबो आरो ङ) मागो फोरबो एबा बाथौ खेराइ फोरबो ।

क) बैसागु फोरबो:

सैत्र दाननि जोबथा सानखालि नखरनि गासै जिब जुनार मोसौ, मैसो, बोरमा आरि जिबफोरखौ दैमा-दैसा एबा हाखरफोराव लांनानै थुखैनानै दै-लाव, फान्थाव, हालदै, फसलानि माला गानहोनानै गोजा, गोसोम फोथा होनाय जायो । गोदान बोसोरनि गासै जिब-जुनारफोरखौनो दौनदाल गानहोनाय जायो । मोनाबिलि समाव गलि नआव आलारि बाथि, धुप-धुना, बिबार बारफा, गइ जरा, फाथै जरा होनानै इसोरनि सिम फुजिनाय जायो । फुजिनायनि ओंथिया- जाहाथे मोसौ, मैसो, बोरमा गासैबो जुनारफोरा बेरामाव गोग्लैया आरो इसोरा मोजाङै लाखियो । बैसागु दाननि से अक्टखालाराव गामिनि गासै दौरि, दौसि, बुराइ-बुरै, लाइमोन सेंग्रा-सिख्ला बयबो खौसे जानाने थानसालियाव आर’ज खालामो । स्नि सानसिम बयबो रंजा-बाजायै मिनि खुसियै गामियाव नखर नखर खाम, सिफुं, जथा, सेरजा दामनानै गिदिं गिदिं मोसहैना बोर बिनाय आरो होनाय जायो ।

ख) आवसिया खेराइ फोरबो:

आसार दाननि से खालारखालिनिफ्राय स्नि  खालारसिम हाल एवनानै मोनाबिलि समाव आलारि बाथि फोजोंना धुब-धुना सावनानै 8, 9, आरो 10 खालारसिम फालिनानै आसार दाननि 11खलार खालि सिम फालिनाय जायो  । दौरि, दैसि बिथांमोनाबो फुङावनो दुगैस्रां-लोबस्रां साखोन-सिखोन जानानै थानसालियाव थाङो । गिबियावनो बिथांमोना आफा बोराइ बाथौखौ सुंग्रिनानै दै गोथार बानायनानै नखर नखर सारफावना होयो । दै गोथार सारनायनि उनावसो नखराव मैलाफोरा साखोन-सिखोन आरो निस्थार जायो होनना फोथायनाय दं । नखरनि माइनावा बेनि उनाव सिजौ गुदियाव आलारि बाथि फोजोंना, धुप-धुना सावना, गइ जरा, फाथै जरा, बिबार बावथाइ होनानै आफा इसोर बोराइ बाथौखौ आरज गाबहरनाय जायो ।

ग) माइनाव फोरबो:

आसिन दाननि जोबथा सानखालि नखरनि लामा लांगोनायाव फांनै थालिर बिफां गायनानै गइ जरा, फाथै जरा, आलारि बाथि फोजोंना धुप-धुना सावना बिबारनि माला गानहोनानै फोरबोखौ बरायनाय जायो । बे सानखालिनो मोनाबिलि समाव माइ दुब्लि आरो बारि बागानाव आलारि बाथि फोजोंनानै  जेरावथिंबो स्रां खालामनाय जायो । बेनि ओंथिया- माइ दुब्लिनि माइफोरा जाहाथे एम्फो-एनलाफोरा खहा खालामनो हाया आरो बारि बगाननि फिथाइफोरा गोबां थायो । माइ आरो बायदिसिना फिथाइ-सामथाइफोरखौ मोजाङै मोननो थाखाय आफा इसोर बोराइ  बाथौनिसिम आरज खालामो ।

काति दाननि से अक्ट’खालि माइनाव फोरबोखौ राइजोनि बाथौ थानसालियाव गाजा गोमाजायै फालिनाय जायो । काति दाननि से खालारनिफ्राय थामजि खालार खालिसिम नखर नखर आरज लायो । नखरनिसिम माइ आबादफोरखौ जाथे जेबो खहा जायालासे लाबोनो हायो आफा इसोरनि सिम आर’ज गाबहरनाय जायो ।

घ) गोरलै जानाय फोरबो:

बाथौ दोहोरोमारि सुबुंफोरनि मोनसे आंगो फोबोआनो जादों गोरलै जानाय फोरबो । बे फोरबोखौ “कुमारि” मोदाइजोनि मुङै फालिनाय जायो । बे फोरबोखौ आधोन दाननि 1 अक्ट खालारनिफ्राय 8 खालारखालिनि समनि गेजेराव माइ दुब्लिनिफ्राय माइ बिजौ लाबोनाय जोयो । गोदो गोदायनिफ्राय माइनाव लायानाय सानखालि नबां, बाख्रि, इसिं न आरो बाथौ सालिखौ लिरस्रांना साखोन-सिखोन खालामनाय जायो । नखरनि बायदि लाइ-लथर, हि-जोमफोरखौ सोनानै साखोन-सिखोन खालामना ओंखाम ओंख्रि संखांनासो माइनाव लायनो थाङो । ओंखाम ओंख्रै संखांना थांनायनि ओंथिया- गोथार ओंखाम ओंख्रि नुफैयोब्ला नखराव माइनाव थायो होनना आगोलनिफ्रायनो फोथायनाय दं । नखरनि जाय आइजोआ माइनाव लायनो थांगोन बियो गुफुर दख्ना आरो गुफुर गस्ला गानै जुमै थाङो । थांनाय समाव लोगोआव गोदान खिरखा गंसे, लाइजौ गांनै, आलारि बाथि गंनै, गइ जरानै, फाथै जरानै, धुप-धुना, बिबार दायनैसो, थाव गुबै, आवा खुन्दुं, खासि गंसे, लथासे थुलुंसि दै गोथार आरोबाव गुफुर सि गंसे माइनाव खोबनो थाखाय लांनाय जायो । बेनि उनाव सानजा मोखाङै लांफानाय मुवाफोरखौ फारियै बनानै आलारि बाथि फोजोंना धुप-धुना सावनानै इसोरनिसिम आरज खालामनाय जायो । आरज खालामनानै सुबा मोनबा हानानै मुथिबा खानानै नसिम लाबोना खावसे बाहागो बाख्रियाव आरो खावसे बाहागो इसिं नआव दोननाय जायो । बेनि उनाव माइनावनि मुङै आलारि बाथि, धुप-धुना सावना इसोरनिसिम खुलुमनाय जायो  । गोदो-गोदायनि समाव ओंखाम गोरलै जानाय थिंग्राय माइनि मायरं आरो माइसालि माइनि माइरंजोंसो ओंखाम गोरलै जायोमोन । गोदोआव ओंखाम गोरलै जानायनि जेबो थि सम एबा सान गैयामोन । बेबादि जेबो थि सम एबा सान गैयिया जेबो आब्रुथि गैयामोन । नाथाय आथिखालाव आधोन दाननि गु खालारावनो ओंखाम गोरलै जानाय फोरबोखौ रंजा बाजायै गाजा गोमजायै फालिनाय जायो । नखराव बाहायनाय बायदिसिना आइजें-आइला जेरै- नांगोल, जुगल, मै, खदाल, खासिम सेखा, रुवा बायदि आइजेंफोरखौ ज खालामना बाथौ सालि खाथियाव दोननानै गोथार दैजों थारनाय जायो । बै सानखालिनो बाहायजानाय मुवा जेरै साइकेल, मथर, बाइक, ट्रेकटर, सि-सुग्रा मेसिन, दै सारग्रा मेसिन बायदि मुवाफोरखौ थुलुंसि गोथार दैजों सुस्रांना बारफा-बारफा बिबारनि माला गानहोनानै जाहाथे सानफ्रोमबो मोजाङै बाहायनो हायो बेनि थाखाय आफा इसोर बोराइ बाथौनिसिम आरज खालामनाय जायो ।

ङ) मागो फोरबो एबा बाथौ खेराइ फोरबो:

            बाथौ दोहोरोमारि सुबुंफोरनि जोबथा फोरबोआनो जादों मागो फोरबो । मागो फोरबोखौ पुस दाननि जोबथा सानखालि फालिनाय जायो । पुस दाननि जोबथा सानखालि नखरनि बारि बागाननि गइ बिफां, थाइजौ, खान्थाल, नारेंखल बायदि फिथाइ थायग्रा बिफांफोराव आसु माइनि जिगाबजों बिफां गुदिनि सायाव खानाय जायो । जिगाब खानायनि ओंथिया- जाहाथे हायाव थानाय एम्फौ-एनलाफोरा गोजौ फारसे दावखोलांनानै बिफांनि फिथाइफोरखौ जेबो खहा खालामनो हाया । नबांफोरखौबो गुफुर आवा खुन्दुंजों सुंनाय जायो । आवा खुन्दुंजों न-बांफोरखौ सुंनायनि ओंथिया – जाहाथे अखा, बारहुंखाफोरा न-बांफोरखौ सिलिंखार खालामनो हाया । बे सानखालिनो उन्दै उन्दै लावखार गथ’फोरा बेलागुर न बानायनानै रंजा-बाजायै मोसानानै लावखार ओंखाम जायो । अखानायसि सान ओंखारनायनि सिगां एबा दावखा सिला सिरि मोनैनि समाव बयबो लावखार गथ’फोरा दैमा-दैसा, बिलो-बिलोमा, हाखर-हालाफोराव दुगैस्रांनानै बेलागुर ननि इसे गोजानाव लाइजौ लाइ गंसे बना बेयावहाय गइ जरा, फाथै जरा, बिबार दायनैसो होनानै आलारि बाथि फोजोंना बयबो आन्थु खेराइनानै बनजार लानानै आगदाथिंनिफ्राय आगसिथिं खेबबा गिदिंनानै बेलागुर नखौ सवो । बे सानखालि फुङावनो नखरनि गासैबो सुबुंफोरा दुगैयोमोन । बेबादि फुङावनो दुगैनायनि ओंथिया- मोदोमनि बायदि गाराइफोरा हामो । हिन्जावफोराबो लामा गोलाव सिबब्ला खेनाइया गोलाव जायो होनना फोथायनाय दं । मागो सानखालि गामिनि गासै दौरि, दौसि, बोराइ-बुरै, सेंग्रा-सिख्ला बयबो थानसालियाव आरजाव बाहागो लायो । बे सानखालिनो गोथैसिफोरखौबो ओंखाम-ओंख्रि, ना, बेदर बायदि फिथाइ-सामथाइफोरखौ बावनाय जायो । गामिनि बयबो बोराइ-बुरै, बिदा-फंबाइ, बिब’-बिनानाव, लाइमोन सेंग्रा सिख्ला खौसे जानानै बायदि गेलेनाय बादायलायनाय बाहागो लायो । सानजा कलाइगाव हालामनि बर’ बाथौ दोहोरोमारि सुबुंफोरा बे मोनबा फोरबोखौ दिनैसिम रंजा खुसियै फालिबोदों ।

बाथौ दोहोरोमारि बर’फोरनि आसारा मोनबा:

क) दोरसि आसार:

            बाथौ दोहोरोमारि बान्दो आरो आसार खान्थि बादियै जेब्ला हौवा-हिन्जावनि गोरोबलायनायनि गेजेरजों बिमाया जेब्ला गोरबोआव गथ’ गोरलै थानायनि बाथ्राया रोखा जायो अब्ला 4 दान एबा 5 दानाव हाबोब्ला गथ’आ जिउ दान मोननाय सम होनना फोथायो । गथ’नि मोजां जिउनि थाकाय सानसे थि सान लानानै गामिनि दौरि, दौसि, आसारि आरो राइजोफोरखौ लिंनानै नखराव आर’ज खालामनांगौ । बिहामजो गोदानआ गोरबोआव गोरलै गथ’ थाजेनोब्ला आखाइ सोलायनानै गुबुननि नखरावबो ओंखाम जानाय जोंनि दोहोरमाव नेम दं । नाथाय सानजा कलाइगाव ओनसोलनि बाथौ सिबियारि सुबुंफोरा बे दोरसि बान्दोखो फालिबोनायखौ नुनो मोनाखैमोन ।

ख) जोनोम आसार:

            बिमानि गोरबोआव दोरसि मोननायनि उनाव गु दान जि सानाव गोरलै गथ’आ जोनोम जायो । गोरलै गथ’आ जोनोम मोननायनि जिसे सान खालि नबां लिरस्रांना सि-जोमफोरखौ सोनानै साखोन-सिखोन जाना गामिनि दौरि, दौसि एबा आसारि बिथांमोनखौ लिंनानै थारनाय जायो । बेनि उनाव दौरि, दौसिमोना बे बादि बाथ्रा बोसोनफोरखौ आवरायो-

नै गथ’ गोदो नों मामोन

हारसा ना, बांगाल ना, जंगालमोन

दा नों बर’ नखराव

बर’ बिमानि गोरबोआव जोनोम मोनबाय ।

दिनैनिफ्राय नों सासे बर’ सुबुं जानांसिगोन

इसोर आरो दोहोरोमनि दहाय लानानै

नोंनि इउन जिउ संसार

मावनाय-दांनाय, साननाय-हनाय

सोलो-बोलो, आख्रा-फाख्रा

गुनि-गियानि, रोंखा-राखा जानांगोन ।

बिमा गुरु, बिफा गुरु

दोहोरमनि गुरु, मानिसुला सिबिसुला

जानांगोन दे

इसोरनि बोर मोनथों ।।

            होनना आवरायखांना जयै बोर सास्रिनाय मोनथिना रायसंनांगौ ।

बे सानखालि गामिनि दौरि, दौसि, आसारि आरो राइजोफोरखौ लिंनानै इसोरनिसिम आर’ज खालामनांगौ । बे खालिनो गथ’नि मुंखौ बर’ रावजों दोननांगौ । नाथाय जोंनि सानजा कलाइगाव हालामाव बाथौ दोहोरोमारि सुबुंफोरखौ बे बादि फालिबोनायखौ नुनो मोननाय जाया ।

ग) हाबा आसार:

            जर-जुलि एबा हाबा लानाय खान्थिया सुबुं माहारिनि गेजेराव बान्दोबि थामथि बान्दो  आरो आसारबानि थामथि आसाराव गोलैयो । सानै सेंग्रा-सिख्ला जर-जुलि जानाया सोरजिगिरि इसोरनिनो गोथार आसार खान्थि । बयबो सुबुंआनो जोनोम मोननायनि उनाव सानसे हाबा जानांगौ । बेयो संसारनि मोनसे नेम । हाबाया सरासनस्रायै गंनै नखरनि गेजेराव बिगोमाजों बिगोमा मोजां सोमोन्दो लाना सावरायलायनानैसो हाबा दानांगौ । बे बादि मोजां सोमोन्दो खोथा-बाथ्रा सावरायलायनानै जानाया गोथार एबा गोमोन हाबा । जोंनि सानजा कलाइगाव ओनसोलाव हाफथासे एबा हाफथानैनि उनावसो आसारिफोरखौ लिंनानै हाबा दानायखौ नुनो मोननाय जायो ।

घ) बोरायनाय आसार:

            बाथौ दोहोरोमारि सुबुंफोरनि ब्रैथि आसारानो जाबाय बोरायनाय आसार । बे मुलुग संसाराव जोनोम लानाय बयबो सानसे बैसो जालांनानै बोराय जालाङो । बे संसारनि मोनसे नेम । सासे उन्दै गथ’नि आखुआ जेरै निरला आरो गोजोन आखुनि । बिमा बिफाया बै समाव जोबोर जोथोन लानो गोनां जायो । बेबादिनो सासे बोराइ बैसोनि बिमा बिफाखौबो गथ’फोर बादि जोथोन लानांगौ । मानोना बैसो जालांनाय लोगो लोगो बिसोर लोरबां जालाङो । खामानि मावनो आरो लामाफोराव थाबायलांनोबो हाया जालाङो । बिसोर बैसोगोरा जालाङोब्ला बे समाव देह, मोदोम, खैफोद आफोदनि थाखाय आफा इसोरनि खाथियाव बोर आरो आरज खालामनांगौ । बिमा बिफाया थांनानै थानाय समाव गाव आर्जिनाय धोन सम्फथिफोरखौ सामलायनो हाया जायो । सानसे गामिनि दौरि, दौसि, आसारि आरो राइजोफोरखौ लिंना नखराव सुखु गोजोननि थाखाय आरज खालामनांगौ । बिमा बिफाया गावनि असे फिसाला गेदेरखौ नखर दैदेनलांनो गासै धोन सम्फथिफोरखौ राइजोनि सिगाङाव मान खालामना गथायनांगौ । नाथाय जोंनि सानजा कलाइगाव ओनसोलाव बे बोरायनाय आसार खान्थिखौ फालिनाय नुनो मोननाय जाया ।

ङ) थैनाय आसार:

            सानसे मानसिया जोनोम जाब्ला सानसे थैनांगोन । बे इसोरनिनो गेलेनाय मोनसे नेम । सानजा कलाइगाव ओनसोलाव बाथौ दोहोरोमारि हौवा थैब्ला सानबा फालिनाय जायो आरो हिन्जाव थैब्ला सानस्नि फालिनाय जायो । हौवाब्ला सानबा आरो हिन्जावब्ला सानस्नि समाव राइजो गियाथि लानानै दाहा गारनाय जायो । बे सानखालिनो नार्जि गोरान आरो ना गोरानजों नार्जि अरगारनाय जायो । खायफा गामिनि सुबुंफोरा खानाय सिनो आरो खायफा गामिनिया खानाइ सिनजाया । आथिखालाव बाथौ दोहोरोमाव खानाइ सिननाय नेम गैया । दासिमबो खायफा गामिफोराव सारादुआव ना बेदर बाहायनायखौ नुनो मोनो । नाथाय बाथौ दोहोरोमाव सारादुफोराव ना-बेदेर बाहायनायनि नेम गैया । खायफा गामिफोराव दानसारनायखौ नुनो मोना आरो खायफा गामिफोराव दानसारनायखौ नुनो मोनो । जोंनि सानजा कलाइगाव ओनसोलावबो आसारि लानानै दाहा गारनांगौ नाथाय दिनैसिम बेबादि आसारि लानानै दाहा गारनायखौ नुनो मोनाखै ।

बाद खान्थि: बाथौ दोहोरोमारि बर’फोरनि आसार आरो बिजिरनाय खान्थि दं । बर’नि बे समाज आसार बिजिरनाय खान्थिया जोबोर गोरा आरो न्याय दं (Customary Law) । मानसिया दाय एबा गोरोन्थि खामानि मावोब्ला मानसियानो बिजिरनानै समाधान खालामो । मानसिनि बिजिरनायाव सैथो एबा गोरोन्थिबो थानो हागौ । नाथाय इसोरनि बिजिरनायाव जेबो गोरोन्थि थाया । गोदो गोदाय समनिफ्रायनो बर’ समाजाव बायदि बेले बेजे गुलाइ गुजाइ जाथाइ आरो समाजनि बेरेखा खामानि मावोब्ला बेनि हेथायै बाथौआरि समाजाव दोहोरोमनि खान्थिजों बिजिरनानै दाया गोरोन्थिफोरखौ सुस्रांनायनि नेम दं । बर’फोरनि बाथौ दोहोरोमनि हिसाबै बादा मोनबा । बेफोर जादों- क) आगर बाद, ख) फंस्लद बाद, ग) दावखि बाद, ध) खावलि बाद आरो ङ) खौलोबोद बाद ।

क) आगर बाद:

            मानसि बुथारनाया दोहोरोमनि एबा आइननि बयनिख्रुइबो देरसिन दाय एबा फाफ । बेबादि मानसि बुथारनानै दाय एबा फाफ खालामनाया आगर बादाव गोलैयो । सोरबा बाथौआरि हौवासाया गुबुन ख्रिष्टान एबा इस्लाम दोहोरोमारि हिन्जाव हाबा खालामोब्ला बे आगर बाद खान्थिनि नेमजों उद्रायनाय जायो ।

ख) फंस्लद बाद:

            बिमा बिफा, बिदा-बिब’, फंबाइ-बिनानावमोनखौ बुयोब्ला बे खान्थिजों उद्रायनाय जायो ।

ग) दावखि बाद:

            बाथौ दोहोरोमारि सोरबा सुबुङा अमा, बोरमा, दाव, सैमाजों सोलायज्लायनाय बेदर जायोब्ला बे दावखि बाद खान्थिजों उद्रायनाय जायो ।

घ) खावलि बाद:

            दोहोरोमारि सोरबा सुबुङा गोथैसिनि लोगोआव हरफानाय रां-फैसा, सि-जोम बायदि मुवाफोर नसिम लाबोयोब्ला बे बाद खान्थिजों उद्रायना जायो । मैसो, दावखा, सिगुन, सिला, सैमा, मावजि, सियाल, जिबौ, हादिदग्ला जिबफोरनि बेदर जायोब्ला बे बादोजों उद्रायनानै समाजनि नेमाव लानाय जायो ।

ङ) खौलोबोद एबा लावखार बाद:

            जोंनि बाथौ दोहोरोमाव सोरबा सुबुंआ बिमा हारिनि जुनारजों हाव एवब्ला आरो सुबुंफोरनि मोदोमाव एम्फौफोरा बिदै दैब्ला एबा नंखाय बाथ्रा बुंनानै खैफोद आफोदाव गोग्लैब्ला बे बाद खान्थिजों उद्रायनाय जायो । जोंनि सानजा कलाइगाव बाथौआरि समाजाव बेफोर बेले बेजे, नंखाय, समाजनि बेरेखा खामानिफोरखौ दौरि, दौसि, आसारि आरो गामिनि राइजो राजाफोरखौ लानानै उद्रायनाय जायो ।

            फै जों सानजा कलाइगाव ओनसोलनि बाथौ सिबियारिफोर बायदि गेना गोरोन्थिफोरखौ सुस्रांदिनि आरो बयबो खौसे जाना आगान सुरलांदिनि ।

आइ थैदों आइखौ गारदों

आफा थैदों आफाखौ गारदों

नाथाय नों आफा बोराइ बाथौखौ

गाराखै दासिमबो सिबिनो ।।