सावस्रियारि समाज दानायाव जोंनि बिबान || An Article by Mr. Sarat Baro

सावस्रियारि समाज दानायाव जोंनि बिबान

सरत बर’

9854631118

            गोदो गोदायाव सुबुं हारिया जेब्ला मिथिंगा बिखायाव उदाङै हान्थिबायना जिउ खुंदोंमोन, बै समनिफ्रायनो बायदिसिना खैफोद-सुथुरनिफ्राय रैखा मोननो हान्जा जुथेनानै थालायदोंमोन । बै समाव हाग्रानि गिलु बालु जुनादफोरानो गाहाइयै सुबुंनि सुथुरमोन । मिथिंगानि जाथाइ जेरै सारअन्थाइ, दैबाना, खरान, बांग्रिं आरो बारहुंखाफोराबो सुबुं हारिनि जेंना महरै नुजाथिदोंमोन आरो बेफोर बायदि थासारियावनो ज’ ज’यै जिउ खुंनो गोनां जादोंमोन । बेबादिनो मुगानि उनाव मुगा बाबेनलांबाय आरो बुहुमलुरारि हालोदाव गावबा गाव थासारियाव मोनफा मोनफा हारि जोनोम मोनो आरो गावबा गाव हारिनि दुइसिन सुबुं थुबुरखौ गामि, फारा, सुबा एबा समाज मुं दोनजानाय जाबाय ।

            गुबुन गुबुन मुगायाव सुबुं सोदोमस्रिया जुदा जुदा बिथिङाव दावखोनानै दिनैनि खलबाव मोनफैबाय । आथिखालाव गासै बुहुम गंसेमानि बिगियाननि गोदान दिहुनथाइजों होंगो दोंगोसै । बिगियाननि बेबादि मिथिंगाखौ फेजेननो, गादबनो नाजानायाव गोबां आयदायाव सुबुं समाजनि थासारिया थाबै सोलायलांगासिनो । बिदिन्थि हिसाबै देहा फाहामथाइ आयदायाव गोमोथाव दिहुन्थाइ (मुलि आरो दाजोम) नि जाहोनाव सुबुं अनजिमाया सानफा एफा बांलांनानै आथिखालाव बेरफ्रुसारबाय । बेनि लोगो लोगो बायहाजार जेंनाया नुजाथिबाय । मुलुगनाङारि दोहौनि जाहोनाव जायखि जाया रंजाथावना फुंखाफोरखौ आखाइ फुवारबानो मोनहानाय जाबाय । देहायारि बोलो बाहायालासै जायखि जाय बाहायथाव मुवाखौ दाजेमजों गोरलैयै मोननो हानाय जाबाय । एमनखि जों जाय आबादनि फसल आरो फिथाइ सामथाइ आरि जानानै थांना थायो बेफोर गासैबो दिनै बिगियाननि मावथाइनि थाखाय अबोथोरावनो जेरै गोसो एरै रज’होनानै फिथाइ थायहोनानै जाहोनो हानाय जाबाय । जाहोनाव सुबुं समाजाव खामानि मावनाय हारिमुवा गोमालांनो हमदों आरो अलसिया बादुला आखुआ जोंनि सोलेराव बासा बोननो हमदों । दिनै बिगियाननि गोदान दिहुनथाइ आरो मावथाइनि गोहोआव से एबा नै लिटार गाइखेर होनाय मोसौ गाइया जिबा-नैजि लिटारफ्राम होनो हानाय जाबाय । बुंनो थाङोब्ला आथिखाल मुगाया हाइब्रिद आरो गुबै नङै (आर्टिफिसियेल) मुगा । जेरावबो गलायमोनदेर आरो गुबुंले थासारि । जाहोनाव सुबुं सोलेर आरो सानस्रिफोराबो गद गैयि, बेसादारि जालांनो हमदों । बिब्दिनो जोंनि समाजाबो लासै लासै नोरजिया जालांदों ।

            आथिखालाव हा, दै, बार, अख्रां जेरावबो गुबुंलेया साग्लोब जोबनायजों लोगोसे सुबुं अनजिमा बेरफ्रुनायजों समाजनि थासारिफोराबो गुबुंले जानो हमबाय । बेबादि जों गावनि मावनां खामानि एबा गावबा गावनि सोदोमस्रि, हारिमु, राव, थुनलाइ, धोरोम गासैबो लासै लासै बावगरलांनो हमबायसै । जों जेन’ रंजानो आरो गावनि देहा गोसोखौल’ गोजोनहोनो थांनानै थानांगौ बादि गुबुंले थासारि नुजाबाय । बेयो दानि मुलुगनाङारि (ग्लबेलाइजेसन) नि फिथाइ आरो बेसादारि सानस्रिनि फिथाइ । दिनै माहारियारि, धोरोमारि आसार, दोरोङारि जुनिया सिनायथिफोरा जोंनि गेजेरनिफ्राय लासै लासै गोमा लांनो हमदों । जाहोनाव जोनिं समाजाव बान गैयै, थिउरिया थासारि, गिदिरखौ मान होनो रोङै, गिदिरा उन्दैखौ अननो रोङै हालोद सोमजिखांदों । बयबो गावबा गावनि सार्थ लाना मुखुब आरो  गावबा गावनि रंजाथायाव मुखुब । बेबादि गावनिखौल’ जोथोननायावल’ मुखुब जानायाव जोंनि समाजनि खौसेथिया लोरबां जालांगासिनो ।

          

  गंसे गोगो गोजोन सावस्रियारि समाज एबा माहारि दानायाव गाहायाव मख’नाय आफाद एबा गौथुमफोरा मैखुमै बाहागो लानो नांगौ-

क) धोरोम आफाद: आथिखालाव जाय सुबुंआ जि धोरोमाव थायो बै धोरोमखौ आफादारि एबा फसांथानारि खालामनानै, बै धोरोमनि गुबै सानथौफोरखौ सुबुंनि जिउ खुंनायाव आरो समाजाव जाहाथे रोखायै बेरखांहोनो हायो बेनि सायाव नोजोर होनांगौ । मोनसेल’ एखुथा धोरोमा सुबुं समाजाव एबां मुलुगाव गोजोन लाबोनो हायाबो जानो हागौ । बेनिखायनो गासैबो धोरोमारि सुबुं हान्जाया मुलुगाव सुबुंस्रिनि जोंमा गियानखौ (आध्यातमिकता) फसंनो हानांगोन । फिसा नख’रानो गोजोन नख’र आरो गावनि नख’र बाहागिखौ मोजां मोननायजों लोगोसे नसुंसेरनि बयखौबो अननो मोजां मोननो फोरोंनांगौ आरो बे मिथिंगा बिखायाव जों जेरै आलो गोजोनै थांना थानो (मिथिंगा बिमानि थादेरसा जेरै हा, दै, बार, अर, अख्रांनि अनानायाव) हादों । धोरोमनि सानथौ आरो सानथौमिनखौ जाहाथे जोंनि सानफ्रोम जिउ खांनायाव मोनफ्रोम बुब्लियाव बाहायनो हायो बेनि बागै धोरोमारि फसंथानफोराव, बाउनाय, सिबिनाय आरो आर’जनि आयदाफोराव अराय सावरायनांगौ ।

ख) बिमा माहारि एबा माइनाव आफाद: गथ’ सासेया एबा इयुन जोलैया बिमानि सायावनो मैखुमै सोनारो । बिमानि गोर्बोआव दोरसि जानायनिफ्राय लाइमोन देरनायसिम बिमानि आखाइ नोजोरावनो देरबोयो । बेनिखायनो सासे गोर्लैया बिमानि दांनाय बिलिरनायावनो मोगथां जिउनि गासे मोन्दांथिफोरखौ मोननो हायो ।  बेनिखायनो गोगो गोख्रों सुबुं समाज दानायाव बिमा एबा माइनाव माहारिया गोथौ बिफाव दं । आनान गसाइ नुवाथारिनि उनावनो बिमा-बिफानि बिफाव आरो मासि । बे फोरोंथाइखौ बिमा-बिफाया फिसाफोरखौ अराय होनांगौ आरो बयबो बिमा-बिफाया गावसोरनि गथ’-गथाइफोरखौ धोरोमारि, समाजारि आरो आसारारि (नैतिक) गियान होथारनांगौ ।

ग) फरायसा एबा लाइमोन आफाद: समाज एबा हारि मोनसेयाव गोगो सावस्रि आरो सुखु गोजोन लाबोनायाव लाइमोनफोराबो मावनांगौ एबा रुजुननांगौ माखासे बिबान दं । लाइमोन गोहोआ मुलुगाव देरसिन गोहो । बे बैसोआव लाइमोनफोरा फरायलांनायनि लोगोसे गोबां समाजारि जौगाथाइयारि खामानि मावलांनो हायो एबा समाजनि गाज्रि थासारि आरो सोलिबोनाय गुरलाय-गुजायफोरखौ सांग्रांथिनि गेजेरजों थार लामासिम दावखोहोनो हायो । गामियारि लाइमोनफोरा हान्जा जुथेनानै साखोन-सिखोनै  थानांगौनि गोनांथि फार्से मावबादा, सावाराय मेल आरि लानांगौ आरो गावसोरनो मावखांना दिन्थिनांगौ । गासैबो गामि एबा सुबाफोराव साफा सानै समाजनि बेरेखा एबा दुथां आखुनि सुबुं थानो हागौ । बिसोरखौ हारिसिङै रावबो दबथायनो एबा बुजायनो हाया । बेबादि हालोदाव गोजोन आरो गोगो थासारि लाबोनो जुनै लाइमोन गोहोनि गोनांथि जानानै फैयो । आथिखालनि बिगियाननि दिहुनथाइ रंजाहोग्रा दाजेमफोरावनो मुखुब जाना थायालासेनो समाज आरो गोख्रों माहारि दानायाव लाइमोनफोरा गिलिर बिबान दं । आथिखालाव जोंनि समाजाव जौ आरो जुवाया जा बादि साग्लोबसारदों, बेफोरनिफ्राय रैखा मोननानै समाजखौ थार, सैथो, गोथार लामाजों दैदेनलांनोब्ला लाइमोन गोहोआसो जान्जि खाफ्रानो सम जाबाय ।

            जोबथारनायाव आथिखालनि दुलाराय बर’ फरायसा आफादनि आफादगिरि मानगोनां मुस्रि प्रमोद बर’नि रावै बुंनो थांब्ला, जों अराय समाव गावखौ एंगारना गुबुनखौल’ एबा गुबुननि गोरोन्थिखौल’ आसि दिन्थिबाय थानाय मोनसे हुदा दं । नाथाय बेयावनो जों मोजां बिजिरना नायब्ला नुगोनदि गुबुननिसिम जों थसेल’ आसि थुहरदों आरो थथामआ गावनि फारसे थुजादों । बेनि ओंथिया जाबाय बै आसि थथामा जोंखौ सोङो – नों बेसेबां मोजां, बेसेबां थार, बेसेबां सैथो ? बेनिखायनो जों जोनो हागौ खोनानो मोनो – “आपुन भालेय जगत भाल” । बेनि ओंथिया जाबाय जों साफ्रोमबो मोजां जोनो हाब्लानो बे मुलुगाबो मोजां जागोन ।