कलाइगाव हालामनि बर’फोरनि
हारिमु
प्रसन्न कुमार बर’
सेंगापथार
कलाइगाव
हालामनि बर’फोरनि हारिमु- बे गुबै आयदाखौ सावरायनाय सिगां सिगां हारिमुआ मा आरो
सुबुं समाजाव बेनि गोनांथिनि सोमोन्दै फंनैसो बुंग्रोना लानो साननाय जादों ।
हारिमुवा जादों – मोनसे हारिनि हारिमायारि जिउनि बोहैबाय थानाय निज्रा बादि ।
मानोना निज्रानि दाहारानो हारिमुनि दाहार । निज्राआ जेरै बादि थाद’आलासे अराय
बोहैबाय थायो हारिमुवाबो मुगानि उनाव मुगा बोहैलांबाय थायो (Water
flowing from a hill or a mountain in a small stream) । बेनिखायनो
हारिमुआ जादों मोनसे समाजनि एंगार हायि बाहागो । समाजनि सुबुं माहारिया थांना
थानाय समाव जायफोर हाबा मावो बेफोरानो हारिमु । हारिमुआ जादों सुबुं समाजनि बिथा ।
थारैनो बुंनो थाङोब्ला हारिमु गैयाब्ला हारि मोनसेआ मोजां लामाथिं थांनो एबा
थांनानै थानोबो हाया । मानोना हारिमुआसो हारिनि सिनायथि होयो । बेनिखायनो हारिमुखौ
हारिनि सिनस्रि बुंनाय जायो । हारिनि जिउ लामाखौ हारिमुआसो दिन्थियो । बेखायनो
हारिमुआ जादों हारिनि जिउ लामानि नेरसोन । बे नेर्सोनानो हारि मोनसेखौ दैदेन लाङो
। बेखायनो जों जाय हारिआव जोनोम जादों बे हारिनि हारिमुआनो जोंनि हारिमु । थांनानै
थानाय समाव बे हारिमुआनो जोंखौ हारि महरै फोथांनानै लाखियो ।
बर’फोरा आसामनि गोजामसिन जारिमिनारि
बयनिख्रुइ देरसिन हारि । बर’फोरा गावनो समाज दानानै जिउ खुंबोदों । आसामनि
दरफ्रोमबो जिलायावनो बर’फोरा अन्जिमा बिथिङाव थोजासे दंसै । न-बां लुनाय, बारि
बागान गायसननाय, समाजारि आसार खान्थिजों समाजखौ दैदेननो गामि आफाद दानाय, गामि
आफादनि मिटिं-दावथिं लिंनो हालमाजिबो बिबान होनाय, दोहोरोमारि खान्थिजों फाव-फुजा,
हाबा-हुखा खुंनो, जोनोम आसार, बान्द्रा आसार, अगर बाद, फंस्लद बाद, खावलि बाद,
दावखि बाद आरो खौलोबो बाद, बेफोर हाबा मावनो थाखाय दौरि-दौसि, आसारि आरो गोथारिनि
बिबान थायो । आरो गाननाय-जोमनाय, दानाय-लुनाय, दामनाय-देनाय, मोसानाय-मुसुरनाय आरो
गावनि बिमा रावजों गावनि आंगो हारिमुखौ सिनायथि होनो जोबोद मोजां मोननो रोंनांगौ ।
थरायना प्रनिता स्वर्गियारि, थरायना मासुम नार्जारि आरो थरायना निकिता बर’मोनहा
दिनै गावनि साधनाजों राष्ट्रीय लेभेलाव मुंदांखा रिंगुदामसा महरै गायसन जानानै बर’
हारिमुखौ गोजौआव दैखांनो हानाया जोंनि बर’नि थाखाय गोजोनथाव, बाख्नायथाव आरो
गोग्गाथाव बाथ्रा । बिथांमोना जोंनि उनजोलैफोरनि थाखाय गिदिर थुलुंगा आरो मिजिं ।
कलाइगाव हालामनि हारिमुनि सोमोन्दै
लिरनांगौब्ला दिनैनिफ्राय 30 बोसोर सिगां फावसायना थांनांगोन । आथिखालाव कलाइगाव
हालामनि सोरगिदिं गुवार मैखोम ओनसोलाव जेरै बर’ हारिमुनि जांख्रिखांनाय दोहौ फैदों
थांनाय 1987 मायथाइनि सिगां बर’ गामिफोराव असमिया हारिमुजों बेले बेजे जालांदोंमोन
। बर’फोरनि गामिफोराव बैसमाव बयबो सिमान लानांगोनदि आइ नाम, अजापलि आरो नागारा
दामनानै नाम हमनाय आरो खुलिया भावना
दिन्थिफुंनानै गुबुन हारिनि हारिमुखौ गोहोम खोख्लैनो नाजानायखौ नुनो मोनदोंमोन ।
बेनि जाहोना जादों कलाइगाव हालामनि बर’फोरा बै समाव खौसेथि गैयि, सेरखाय बेरखाय
जानानै दंमोन । बर’फोरा गाव गावनि ओनसोलनि साफा सानै दैदेनगिरिया जायखौ नंगौ
सानदोंमोन बेखौनो गुबुनफोरा मददथि होदोंमोन । बेफोर बादि बर’फोरनि समाज बेरेखा
खामानि मावोब्लादि गाव हारिनि खहा जानयखौ गोथौवै सानस’नो आरो बिजिरनो हायैआव बिदि
जायो । जेरैबादि कसारि राजा महामाणिक्य फाया गावनि आंगो दोहोरोमखौ गारनानै हिन्दु
दोहोरोमाव बारस्लायनानै गोगो आसारि खान्थि आरो बर’ बिमानि रावखौ खोमानानै सरनिया
जालांनाया मोनसे रोखा बिदिन्थि जाना दङ ।
इं 1987 मायथाइनि 7 फेब्रुवारियाव
कलाइगाव बियाब बाथौ दोहोरोमारि गौथुमखौ गाजा-गोमजायै सेङापथाराव गायसननाय जायो ।
फोसाबनाय बाथौ दोहोरोमखौ गायसननो थाखाय क’क्राझार जिलानि नाइगाव बाथाबारि बाथौ
आस्रमनि गुरु जयनारायन बसुमतारिजों दौदिनि मुस्रिमा अलेस्वरि बसुमतारी आरो गासै सा
33 रिंगुदामसाखौ लाफाननै मोनसे खेराइ हान्जा हांख्रायाना लाबोनाय जादोंमोन । बेनि
उनाव सेप्टेम्बर दानाव बे रायथाइ लिरगिरि मुस्रि प्रसन्न कुमार बर’ आरो रुमा कान्त
बर’ सानैआ नाजानायजों सेप्टाझार बुरखां खेराइ हारिमु आफाद मुं दोननानै मोनसे
हारिमु हान्जा दानानै हारिमु बिथिङाव जांख्रिखांनाय लाबोनो नाजानाय जायो । बियाव
मख’नाया गाहाम जागोनदि बेनि सिगां टियापुखुरि गामियाव मुस्रि बसन्त कुमार बर’ आरो
मुस्रि मिथु बर’मोननि दैदेननायाव बर’ भावथिना दिन्थिफुंनानै बर’ हारिमुखौ फोसावनो
आरो फेहेरनो हाबाफारि लानायखौ नुदोंमोन । मुस्रि बसन्त कुमार बर’आ कलाइगाव बियाब
बाथौ गौथुमनि सिङाव बाथौ दोहोरोमनि नेरसोन खाम्फा सिजौ गाइसनग्रा लामा दिन्थिग्रा
महरै सासे हारिमु सिबिग्रा सुबुं । कलाइगाव हालामाव मुस्रि धिरेस्वर बर’ नार्जि
आरो बिसि मुस्रिमा बिमला बर’ नार्जिआल’ मोनसे सामनि अल-इन्दया रेडिअ’
गुवाहाटीनिफ्राय गनायथि मोननाय रेडिअ’ मेथाइ खनगिरि रिंगुदामसामोन । मुस्रिमा रिता
बर’आबो जाखांबोदोंमोन । उषा उथ्थुप होननानै गाबज्रि जादोंमोन । नाथाय गावनि
ट्रेन्दखौ हमथाना लाखिनो हायाखिसै । दानिया मुस्रि गिरिश ब्रह्मआ सासे जाखांबोनाय
सेंग्रा-जल’ खनगिरि महरै दावगाफुनायखौ नुनो मोनदों । गावनि स्टेटासखौ हमथानो
हाबोला इयुनाव दावगानो हागोनखौ मिजिं खालामनो हायो ।
भकतपारा माजगामिआव अस्टाद कामिनी
कुमार नारजारि आरो हारिमु सिबिग्रा डा°
लीलाधर ब्रह्मनि दैदेनायाव दरं जिला सिङाव थानाय खेराइ हारिमु हान्जाफोरखौ बुथुम
बुथुम दान मोनसे हारिमु ट्रेइनिं केम्प खुंफुंनाय जादोंमोन । बे ट्रेइनिं केम्पआव
सेप्टाझार बुरखां खेराइ हारिमु आफादनिफ्राय साब्रैसो रिंगुदामसा हरनो हादोंमोन ।
खाम दामग्रा मुस्रि नितेन्द्र बर’, सिफुं सुग्रा मुस्रि अनिल बर’, मोसानायाव
थरायना अर्चना बर’ आरो थरायना सेवालि बर’आ ट्रेइनिंआव बाहागो लानानै सोलोंनानै
फैदोंमोन । बेनो कलाइगाव हालामाव बर’ हारिमुनि फोसाबनाय, फोलावनाय आरो फेहेरनाय
जांख्रिखांनायनि माइल खुन्थिया ।
बेनिफ्रायसो लासै लासै सा-बालिपोता
बारदै सिख्ला हारिमु हान्जा, निज-कलाइगाव कुमतिपारा हारिमु हान्जा, सा-बेजभागति
हारिमु हान्जा, दौलगुरि हारिमु हान्जा, धुरधुरि, निसिलामारि, बायदि गामिफोराव
फोरोंहैयो । बेनि अनगायैबो सेप्टाझार बुरखां खेराइ हारिमु आफादा मंगलदै, सिपाझार,
टंला, देवमरनै, महलियापारा आरो आम्बागाव-बालिसिथायाव जालांनाय बै समनि दरं जिला
बर’ फरायसा आफादनि दैदेननायाव खुंफुंनाय हारिमु दिन्थि सन्मिलनियाव कलाइगाव बियाब
बर’ फरायसा आफाद जानानै बाहागो लानानै जोबोर बाख्नायनाय आरो थुंलुंगा मोनदोंमोन ।
बेराफारसेथिं इं 1987 मायथाइनि 2
मार्चनिफ्राय दुलाराय बर’ फरायसा आफादा आलादा राइजो बड’लेण्ड सोमावसारनाय
हाबाफारिखौ जुरिजेनानाय जायो । बेखौ लोब्बा लाखिनानै गामि गामि बर’फोरखौ आलादा
बड’लेण्ड राइजोखौलाय मानो नांगौ बेनि सोमोन्दै कलाइगाव हालामाव आफाद खुंनानै
मबाइलाइज खालामनायाव बर’ हारिमु बिथिङाव सांग्रांथि फैनो हमो । आरोबाव कलाइगाव
बियाब बाथौ दोहोरोम गौथुमआ कलाइगाव टाउननि सोनाब बागै थानाय बर’गामिफोराव फोसावनाय
बाथौ दोहोरोमनि सायाव फोसावनाय, फेहेरनाय आरो फेदेरनाय फार्से गोसो होनाय जायो ।
आरो गामि आफादफोरनि सिङाव थानाय थानसालिफोराव “सिजौ” गायसननानै सिजौआरि
(आध्यात्मिक) गियान होनाय जों बर’ हारिमुनिबो खामानि मावनाय जायो । फारसेथिं आइ
देवर बियाब बाथौ दोहोरामारि गौथुमआबो कलाइगावनि सानजा-खोलाहा बर’ गामिफोरखौ
सरजाबनानै बियाब बेंखन सिङाव सोना लायो । बेनिफ्राय कलाइगाव साहा ओनसोलफोराव बाथौ
दोहोरोमनि सानगोथौ एबा सानथौ (Philosophy) नि गियान आर्जिनो आरो बर’ हारिमुनिबो सर्सा खालामनो खाबु मोनो ।
गामि आफादफोरनि हेफाजाबजों हाफ्था
खनसे गोथार मंगल बार खालि बाथौ आर’जनि गेजेरजों बर’ राव आरो बर’ हारिमुजों आर’ज
गाबानाय, मोन्थोर रायसंनाय, खाम, सिफुं, जथा आरो सेरजा दामनानै इसोर बोराइ बाथौखौ
खुलुमनायजों गावखौ सिनाय मोननो खाबु मोनबोदों । आरोबाव कलाइगाव बिसोंग्रा हारिमु
आफादनि दैदेननायाव कलाइगाव मिरु रंजालि बैसागु आफादनि दैदेननायाव कलाइगाव मिरु
रंजालि बैसागु खुंथाइ आफादनि हेफाजाबाव जों रंजालि बैसागुखौ फालिबोनाया दिनै 19 थि
बोसोराव आगान होफैबाय । बेजोंबो कलाइगाव
हालामनि बर’गामि समाज दैदेनग्रा आफादनिसिम खुंथाइ आफादनिफ्राय बाहागो लानो हारिमु
हान्जा आरो राइजो-राजामोनखौ हांख्राय हरनानै फोजाखां होबाय थानांगौ जायो ।
थेवब्लाबो कलाइगाव हालामनि गसैबो गामिनिफ्राय गोख्रों बाहागो लानायखौ नुनो मोना ।
देग्लाय खुंथाइ आफादनिफ्राय मोनसे गोदान आयदाखौ हाबाफारियाव सोसननाय नुनो मोनदों ।
बेयो जादों जोंनि बर’फोरा गोदोनिफ्राय जिउ खुंनायाव सानफ्रोमबो बाहायबोनाय औवा
दंफां आरो राइदोंजों आखाइजों बानायनाय आरो हेबनाय आइजें-आइलाफोरखौ लानानै देग्लाय
बैसागु खुंथाइजों सरजाबनानै दिन्थिफुंनो हाबाफारि लानायखौ मिथिनो मोननो हादों ।
प्रत्ततात्रिक (Archeological) पडित राजमोहन
नाथ बिथाङा बुंलांदों – मंगलिय बर’फोरानो बस्त्र शिल्पनि गिबि बिफा, आबाद बिद्यानि
गिबि सोरजिग्रा आरो मोसानाय मुसुरनाय कलानि गिबि गुरु । 642 खृ:उन मायथाइयाव
जेब्ला कामरुप राजा कुमार भास्कर बर्मननि
समाव चीननि दावबायारि कामरुपाव हाबफैनाय समाव बर’ सिख्लाफोरा हिउ-वेन-चांखौ
खुफ्रि, आर’नाइ आरो इन्दि हिजों बरायनायखौ जों जारिमिन बोद्लाना नायोब्ला मिथिनो
हायो । दिनै बर’नि फिथानि राजा “लावदुम फिथा” जायखौ थिखिलि फिथा होननानै
गाबज्रियो, बे फिथाया सावनानै फान्नाया दिनै बर’फोरनि आखाइयाव गैला । गुवाहाटी
नोगोरमायाव हटेल, रेष्टोरा आरो फुट पाथनि फिसा-फिसा साहा गलाफोराव फाननायखौ
नुयोब्ला मिथिनो हायोदि बर’नि फिथानि राजा – लावदुम फिथाया मालायनियाव । बिब्दिनो
बर’नि हारिमुआ सानसे मालायनि हारिमु जानानै हारिमुनि फोथारखौ धोनि खालामनो बारा
दिन गैला । साफा-सानै आइजोआ कलाइगावआव हटेल होनानै फिथा लावदुम हमनायखौ नुनानै
गोजोनदोंमोन आरो मिजिं थिदोंमोन बिनि अन्जिमाया इयुनाव बारायलांगोन होननानै । बोरो
माथो मास मोनथामनि उनाव खबर लाबाय गैलानोसै । माखासे बर’ हिन्जावफोरा जौ-सेरेप
फानालासै, लामा जिंआव हटेल होयोब्ला गावनि मान सन्मान थागौमोन आरो गावनि आथिंआव
गाव गसंनो हानायनिबो राहा लामा दिहुननो हागौमोन आरो फारसेथिं बर’ हारिमुआबो संरैखा
मोनगौमोन बेखौ आसा खालामनो हायो ।
आथिखाल कलाइगाव हालामाव बाथौ
दोहोरोमनि मोनबा हारिमायारि फोरबो रंजालि बैसागु, आमथि फोरबो, माइनाव फोरबो, ओंखाम
गोरलै जानाय आरो मागो दमासि बायदिफोरखौ बर’ गामिफोराव गोग्गोमै फालिबोनाय जायो ।
बर’ गामि दैदेनग्रा आफादफोरा जायगा लायै जायगा दिदोम बाथौ लुफुंबाय थानायखौ नुनानै
इयुनफोराव कलाइगाव हालामनि बर’फोरा हारिमु संरैखा खालामनानै दावगा लांनो हागोनखौ
मिजिं थिनो हायो ।
रंजालि बैसागु फोरबोआ मोनबा फोरबोनि
मादाव बयनिख्रुइ देरसिन रंजानाय बाजानाय आंगोसिन फोरबो । सैत्र दाननि जोबथा सान
खालि फुंआव मोसौ थुखैयो। गोदोआव मोसौआ मोनसे आबाद मावनायनि आगजेंमोन। बेखायनो
मोसौनि मोजां हास्थायनानै लाव, फान्थाव, दिगिलथि, माखिलथि आरो थाराइजों बुयै बुयै
बिलो, फुख्रि, दैमा-दैसा आरो दंग’सिम लाङो। मोसौ थुखैनो लांनाय समाव गाहायाव
मख’नाय मेथाइखौ खनो-
लाव जा फान्थाव जा
बोसोर बोसोर एर हान्जा
हान्जा ।
बिमानि खिथेर बिफानि खिथेर
नोंसोर जागोन हालुवा गेदेर ।
बिमा गाइदे बादि दाजा,
बिफा बलद बादि जा ।
बारि खनानि एम्बु बंगोला,
बिदि जा गिदित जांगिला ।
दिगिलिथि मोसौनि मुलि,
दुदालि जागोन गाइ खुखिलि,
दिगिलिथि लावथि ख्रि ख्रि गान्थि,
जोंनि मोसौआ बलद जाथि ।
जानाइ नङा गाइदे थेफ्रा,
मारखा जागोन फालोनि बह्रा ।
মাতৃভাষা বড়ো নজনা
সকলে তলত দিয়া ধৰনে অসমীয়া ভাষাত গীত গায়-
লাঔ খা বেঙেনা খা
বছৰে বছৰে বাঢ়ি জা৷
মাৰৰ প্ৰতি জোখ
বাপেৰৰ প্ৰতি জোখলৈ
তঁহত হবি বলদ হাতি৷
মাৰেৰ দৰে চাপৰ
নহবি
বাপেৰ বলদৰ দৰে
হবি৷
বাৰী চুকৰ বেং
ভেকু্লী
তাৰদৰে হবি ডাঙৰ-দীঘল৷
দিঘলতী গৰুৰ ঔষধ
খাৰতী হব গাইবাগিনী
দিঘলতীৰ লাঠি ঘনঘন
গাঁঠি
আমাৰ গৰু বলদ হাতি৷
নহবা চুটি চাপৰ
তীখৰ হব পালৰ ভিতৰ৷
मोनाबिलि
समाव फागा गोदानजों मोसौ गलियाव मोसौ खायो । जुजाय, बिष दिंखिया, बिहलङिनी
जिगाबजों मोसौ थुखैखालि मोनाबिलि समाव गलियाव जाग होनानै गिसिबजों सिबना होयो ।
एदिनखालिनिफ्राय बर’फोरा गिसिबजों बार लानाया बर’फोरनि मोनसे हारिमु ।
बैसाग
दाननि सेथि सान जायखौ गोदान बोसोर होननानै मानिबोदों बे साननिफ्रायनो मानसिनि
रंजानाय बाजानाय जागायजेनो ।गोदान बोसोरनि गोदान मिजिं लानानै नखरनि गासैबो फुंआवनो
दुगैस्रां लोबस्रां गोदान जिजोम गाननानै गाव गाव नखराव इसोर बोराइ बाथौखौ बाउनानै
खुलुमो । ननि लांगोनायाव फांनै थालिर बिफां गाइनानै माला सुनानै आलायाना होयो ।
लांगोनाखौ बायदिसिना गाबनि खाखोरजों हाख’नानै साजायना समायना महर खालामो । नखरनि
मोनफ्रोम खथानि दरखं मोखां, बाख्रि आरो हिसान सालियाव बिबारजों मोखना आरो जात्रासि
दालाइजों माला सुनानै आलाय होयो । उन्दैफोरा गेदेरफोरखौ खुलुमनानै मान खालामो आरो
गेदेरफोरा उन्दैफोरखौ बोर होयो । सिगांआव रंजालि बैसागु समाव बिहामजोफोरा बिहाव
बिखुनजो आरो बाय बाहागिफोरखौ माइब्रा जौ बिदै लायै- लायै मान खालामनाय मोनसे हुदा
नुदोंमोन ।
नाथाय
आथिखालाव बे थासारिया लुइलांनायखौ नुनो मोनदों। आथिखाल मुगायाव सोद्रोमस्रि मोननाय
सुबुं हिसाबै जौ-सेरेप आरो माइब्रा
उफ्रिजों मान खालाया जासै गइ-फाथै, मानफालि आरो आर’नाइजों मान बावोब्लासो गोदान
मुगानि थासारिजों गोरोबनो हागोन आरो गुबुन हारिफोरनिफ्राय सोद्रोम हारि महरै
गनायथि मोननो हागोन ।
रंजालि
बैसागु बोथोराव बर’फोरनि गेजेराव मोसौ बैसागुखालि “खुंखा” जानाय मोनसे नेम दङ ।
“खुंखा”आ जाथोसे गोखा गोखै गलाइ गथाइ संना जानाय इंख्रि । बिफरो जादों मानि मुनि
(गेदेर फिसा), थाराइ गाज्ला, राइदों गाज्ला, खार’ खान्दाइ बिजौ, सिब्रु मैगं, माथि
गालदाव, लाफा साइख’, बुरै थखन, माइसुन्द्रि, दिंखिया, दौस्रोम, खुन्थाइ फिथाइ बायदि बायदि । बेजों खैजेमा
फिथोबबो जाजायो। बर’ समाजा बेंगारनाय एबा सारादु समाव नार्जि जानानै गोथैजों गोथांजों
सोमोन्दो गारनाय मोनसे आसार दंसै । थिक बिब्दिनो रंजालि बैसागुनि समाव मोसौ
थुखैखालि “खुंखा” जानानै गोजाम बोसोरखौ बिदाय होनाय नेम बादियै फालियो । आरो मोनसे
फोथायनाय दङदि मोदोमाव थानाय रोग बियादि, बेराम आजारफोरा जोबस्रांथों आरो गोदान
बोसोराव गोगो देहा लानानै गोगो मिजिंजों थार लामा थाबाय लांनो थांखियै गोखा गोखै
मुलि गुन थानाय खुंखाखौ संना जायो ।
मानसि
बैसागु खालि गावबा गावनि नखरनि गासैबो हाबाफारिखौ फोजोबखांनानै गामिनि राइजो
थानसालियाव थाङो । राइजो नाङै फालिनाय हाबाफारि महरै गिबियाव बाथौ दोहोरोमनि
फिरफिला रंजालि बैसागु हारिमु फिरफिला आरो गोथै सि बाउनाय हाबाफारि फोजोबनानै आर’ज
गाबो ।
बैसागु
फोरबोआव खननाय मेथाइ:
स्थायि: नोंनिनो थिननायाव
नोंनिनो
अननायाव
बैसागु
बैसागु अ...... आफा
सोरजिगिरि
बाथौ बोराइ ।।
सेथि अन्तरा:
बोथोर गोजामा थांलायबाय
खोन्दो खोन्दो ... हालो दैलो
बोथोर गोदाना फैलायबाय
खोन्दो खोन्दो ... हालो दैलो
नैथि अन्तरा: मुलुग संसारा गोदान महर लाबाय
मिथिंगा बिखायाव
बारदैसिख्ला मोसा फैबाय
दाउ खौवौ गाबफैबाय ।
थामथि अन्तरा:मानसि
दुमसि जिब जुनाद
दाउसिन दाउमा दैमा दैसा
बिफां लाइफांआबो रंजा खांबाय ।।
ब्रैथि अन्तरा:बोर
बिदों अ........ आफा
बोर होदो अ’....... आफा (गोथर मैखुन)
कलाइगाव
हालामनि बर’फोरा, आमथि फोरबो, माइनाव फोरबो, ओंखाम गोरलै जानाय फोरबो आरो मागो
दमासि गासैखौबो आलो गोजोन रुजु-रुमु फालि बोनायखौ नुनो मोनो । बर’फोरनि आरो मोनसे मख’जाथाव
हारिमुआ जादों, जामुं (आदार) आरो संनाय खावनाय बाहागो । गमामायै बर’फोरा आमिष
ना-बेदर जाग्रा । बर’फोरा जानाय बेदरनि मादाव अमा बेदर आरो दाउ बेदरा जोबोर मोजां
थावना । गोरान अमा बेदर, ना गोरान आरो नाफाम बर’फोरनि गोथावसिन, अनलाखारि,
सबाइखारि, नारजिजों संनाय बाइदिसिना इंख्रि बर’फोरनि जोबोर गोथाव । बेनि अनगायैबो
लाइ-लाफा मैद्रु, मैथा इंख्रि, औवा मेवाइ, खुरसा, गुबुन गुबुन मैगं-थाइगं बिसोरो
गोथावै संनो रोंगौ । कलाइगाव हालामनि बर’फोराबो माइब्रा उफ्रि, माइब्रानि जौ बिदै
आरो जौ संनानै सावरि बादालियाव आरो फोरबोफोराव जौ लोंहोदोंमोन।नाथाय सिगांनिख्रुइ
आथिखाल कलाइगाव हालामावबो जौ लोंनाय थासारियाबो लुइलांगासिनोखौ नुनो मोनदों ।
जिउ
खुंनाय हाबा हुखाजों लोगोसे दानाय लुनाय आरो एम्फौ फिसिनाया बर’फोरनि जिउजों
एंगारनो हायि मोनसे बाहागो । कलाइगाव हालामनि बर’फोरा आथिखालावबो एम्फौ फिसिनाय
हारिमुखौ रैखा खालामगसिनो दं । एम्फौ लाथाखौ माखासेआ फानो आरो जायोबो । एम्फौ
बिथोबखौ गोरिबफोरा बाजाराव फानो आरो जाय नख’रनि हाल साल गोनांफोरा नआवनो खुन्दुं
दिहुननानै इन्दि सिखौ नआव बाहायो आरो बाजाराव फाननायखौबो नुयो ।
आथिखाल
दुलुरारि बादायारि मुगायाव गाव गावनि हालामनि गोगो हारिमुखौ हमथाना लाखिनो बयबो
बिबान बानस’नोब्लासो गेरेमसा बर’ माहारि दानायाव एसेब्लाबो बिहोमा जगायनाय जागोन ।
N.B.: This article was
published in the 8th issue “Rongjali” the mouth piece of Kalaigaon
Bisungra Harimu Afaad in the occation of its Rongjali Bwisagu Celebration, 2017
at Gandhi Bakari, Kalaigaon.
