आदा मोकथांनि बाथ्राजों....
निर्मल चन्द्र बर’
पुब-बाहजानि
मोकथां बसुमतारिया जाबाय बिथ’राय बिफानि मुं । जेरै मुं एरै मानसिनि महर मुस्रि । गामिनि लोगोसे ओनसोलनि बयजोंबो सिबिजाग्रा, अनजाग्रा बे मोकथाङा । भेनसार स्कुलनि गाहाइ फोरोंगिरि मोकथाङा नारानाथा नांथाबाय थादों गावनि फरायसालिखौ सरखारनिफ्राय गनायथि मोननो । सरखारि दानबान्थाजों गावनि बिसि फिसागोनां संसारखौ ग्रोम जानो । ओनसोलनि हिन्दु, मुसलमान, आदिबासि गासैजोंबो मिथिजानाय मोकथां बसुमतारिया जाबाय मोनसे मुंदांखा मुं ।
: सार । आफानि बेराम जादों । गुवाहाटीयाव गंसे नार्सिं ह’मआव दोननाय जादों । बिथ’राया फोनाव बुंबाय ।
सिगां आं बिसोरनि नख’राव जावले जावले थांलाय फैलाय खालामनायलाय बिथ’राया गोसोआव लाखिदों । सानसे सम दिहुनना गुवाहाटीसिम थांना नोमफानि खौरां लाहैगोन होनना बुंनानै फोनखौ दोनथ’बाय ।
बिथ’रायनि फोन मोननाय सानथामनि उनाव नार्सिं ह’मसिम थांनानै बसुमतारि आदाखौ नागिरना मोनबाय । फिसाजो आरो बिजामादैमोना आदाखौ जोथोन लागासिनो दं । आदानि मोदोमाव हिमग्लबिना खम जादों । फारियै लोरबां जालांदों । दाक्तरनि बिथोन बादियै बथलब्रै थैबो होनाय जाबाय । आदानि हालोदखौ नुनानै गोसोआव दुखु नांबाय आंहा । आंखौ नुनानै सायर’ नायबाय थानाय आदाखौ सोंबाय आं—
: इसे मोजां मोनदोंना आदा ?
लासै फिनबाय— “मोजां माबोरै जानोसै । मोदोमाव थै गैया जादों । बेसेबां थै बायनानै थांना थानो ।”
बे समावनो आदानि सिनाय जानाय सानैसो सेंग्रा हौवासाफोरा खाथियाव थांनानै गांसे गोलाव खाम दिहुनना आदानि आखाइयाव होबाय । लोगोसे आदानि बेरामा थाबैनो मोजां जानायखौ हास्थायना लारियै ओंखारलांबाय । बिथांमोना थांखां-नायनि उनाव खामखौ बिसिना नायबाय । गांसे आर’ज बिलाइ । सानथा-मनि हाबाफारि लानानै रंजालि बैसागु फोरबो फालिनाय जागोन । बायदिसिना बादाय-लायनाय जागोन । गेलेनायनि लोगोसे बैसागु मोसानाय, बार-दै-सिख्ला, बागुरुम-बा बायदि बायदि मोसानायनि बादायलाय-नाय जागोन । बेफोरखौ बिसार खालामना साबसिनखौ सायख’नो आदा मोकथांखौ हांख्रायनानै गांसे आर’ज बिलाइ होबोदों ।
बोसोरफ्रोमबो बिहु, इद, फोरबोआव खुंनाय बादायलायनायफोराव आदा मोकथां बसुमतारिखौ सायख’गिरि हिसाबै हांख्राय-हरो । आदायाबो हानायसिम बेफोरखौ मावलाङो । गावबो बेफोर बादि खामानि-याव मुखुब थानानै मोजां मोनो । सानसे समाव मेट्रिक आनजादखौ होखांनायनि उनाव खाथिनि मेथाइ फोरोंनाय सोलों-सालियाव मुं थिसनना लादोंमोन । बेबा-दिनो फोरोंगिरि जानायनि उनावबो मेथाइ सोलोंलांदोंमोन । लक्ष्नौ भाटखान्देनि सिङाव थानाय सोलोंसालियाव सा, रे, गा, मा, पा, धा, नि, सां नि आरोहन अबरोन सोलोंनानै मेथाइनि बिसारद जानानै बयजोंबो मिथिजानायसै । इमन, आसाबरि, भुपालि रागफोरखौ मोजां गारां होना रोजाबनो हादोंमोन ।
आर’जलाइखौ फरायना आदानि मोखाङा गोसोम जोमै साग्लोबनाय बादि जाखांबाय । आं बाथ्राखौ जेबो मिथियाखैसै । मानोना आर’ज बिलाइयाव मा लिरनाय दं आं मिथिया । मानि थाखाय आदाया सिरि थाबाय मिथिनो लुबैना सोंबाय -
: मा जाखौ आदा । लाइजामखौ फरायना मानो सिरि थाबाय । मा लिरनाय दं बेयाव । माबाफोर दुखु नांथाव बाथ्रा दं नामा आदा ।
दुखुनि बाथ्रा नङा फंबाय । बेफोर आंनि जिउजों नांथाबना थानाय फोजोबस्रांनो हायि सल’ । गोलाव हांमा सुरना बुंबाय आदाया । बोसोरनि बायदि बायदि समाव गोबां जायगायाव गोबां फोरबो एबा आफाद खुंनाय जायो । दैदेनगिरिफोरा आफाद खुंनायनि थाखाय गोबां रां थुबुर खालामो । राइजो राजानिफ्राय खांनाय रोजा रोजा रांजों फोरबो एबा आफादखौ मेहेरगोनां खालामना खुंनाय जायो । दिन्थिफुंसालि, सायनासालि, गेत, आलासि सिबिनाय, फोसावनाय, जानाय-लोंनाय आयदाबो थायो। बेफोरखौ गासैबो मोजां मोजाङै जालांनायबो नुनो मोनो ।
आरोबाव दुखुजों लासै हांमा सुरना बुंलांबाय—नाथाय बायदिसिना बादायलाय-नाय हाबाफारिखौ सायख’गिरि महरै हांख्रायनाय बिथांमोनखौ इसेबो नोजोर होनाय नुनो मोना । बिथांमोनखौ रां एबा थांलाय फैलायनि मुङाव जेबो खरसा होनाय जाया । जेराव देरहानाय बादायगिरिफोरा मोनो ट्रफिनि लोगोसे गोसो सुग्लायनाय रांनि थफ्ला । बेफोर देरहानायनि सायख’गिरिया जाबाय आंबादि सासे नेहाद सुबुङा । जोंनि गिलिर बिबाना जाबाय— बादायगिरि-फोरनि बायदि बिथिङाव नोजोर होना बिजिरनानैसो मोजां जानायखौ सायख’ना होयो । बाहागो लागिरिफोरनि गाननाय-जोमनाय, मेथाइनि खबाम, ताल, मोसानायनि हायला-हुइलाफोरखौ नोजोर होनानै देरहानाय सेथि, नैथि, थामथि आरिखौ सायख’नाय जायो ।
नाथाय .…. ।
नाथाय मा आदा ।
नाथाय बे सायख’गिरिमोनखौ दैदेनगिरि-मोना खामानि जोबनायनि उनाव इसेबो बिसारलाया । दान्दिसेनि उनावनो बिथांमोन-खौ बावलाङो । दासबिनाव गारहरो । सासे सायख’गिरिया मा बादि सम दिहुनना फैनो हादों, माबोरै फैदों आरो माबोरै थांफिनगोन बेनि उदिसलाया । आं आंनि जिउवाव बेफोरनि बागै गोबां मिथिबाय । सानसे आं बेफोर सायख’गिरिनि खामानियाव थांनाया-वनो आंनि गिदिर फिसाज्लाखौ खोमानो गोनां जादोंमोन । आंखौ सासे समाज सिबियारि बिमुं होदों । नुदों नों आंनि समाज सिबियारिनि दिनैनि बान्थाखौ । गुबुन गुबुन रादाब बिलाइफोराव सायख’गिरिनि सायाव गोबां लिरनाय फरायनो मोनबाय । फोसाव मिदियाफोराबो बेफोरखौ सोलायनायखौ नाजानाय नुनो मोनो । नाथाय दिनैसिम मानो सोलायनाय नुनो मोना मानो । बेफोर बुंथावै बाथ्रा बाराद्राय बुंफ्लांबाय । गाज्रि दामोन …।
आदानि मेगनाव मोदै । दुब्रुद मोदैनि थरथिङा खावलाय फारनैथिंबो बोहैनायखौ नुनानै सहायनो हायाखैसै । आदानि बाथ्राफोरखौ सानहाबनो गोनां जाबाय । बसुमतारि आदानि गोसोनि दुखुखौ बुजिना दुखुनि बाहागो लाफाना मोदै हुगार हुगार आदानिफ्राय बिदाय लाना लासै लासै ओंखार बोनायसै । अब्ला सानाबो सोनाब अख्राङाव हाबलांनो थियारि । ❏❏
