अनिता बर' बिथांआ जाखांफुनाय सासे लिरगिरि । सम सम बिथांनि सुंद' सल'फोरा कलाइगाव ओनसोलनिफ्राय सेबखांजानाय बायदिसिना लाइसिफोराव ओंखारबाय थायो । गाहायाव बिथांनि दोंसे सुंद' सल' फोसावनाय जाबाय । राइजो राजा नोंथांमोननि कमेन्टस मोनगोननानै आसा थाबाय ।
Feel free to add your comments after reading this story. Hope you'd like this.....
Cheers......
खावसे दिसप्ले गाज्रि मबाइल
अनिता बर’
बालिपारा
बैसागुनि बा खालार दिनै । इंराजि एप्रिल दाननि 19 सोलिबाय थानाय बोसोरनि । सान बुधबार । हर ससेफ्रायनो बोथोरा दिनै गुबुन महर लादों । जानांगौ बैसागु बोथोरखौ बरायनो बार-दै-सिख्लासो मोसाफैसिगोन । औ नंगौबोथ’ बार-दै-सिख्लाया मोसाफैमारबाय, गोम-गोम ग्राम ग्राम सोदोब लानानै । सोरांसि समसिम नाथाय बोथोरनि मोसानाया जोबनायसै । थेवब्लाबो अखाया जोब-जोब हागासिनो दंमोन । मानोबा दिनै सोरजियाबो गोसोखौ इसेबो मोजां मोनाखै । गिलिर गिलिर मोन्दों हां थोनो थोनोनो । गाबनोबो ओंखारदों नाथाय हायाखै । मोदोमखौ खमफिनाय खमफिनाय मोन्दों । मा खालामगोन मा मागोन जाना गले गले गावनि आखाइयाव थानाय बोराय खावसे दिसप्ले थानाय नकिया 208 (Nokia-208) मदेलनि मबाइलखौ नायदों आरो नायदों । जानो हागौ माबाफोर मेसेज फैनो गोनांफोर दं । नाथाय मा मेसेज फैनो गोनां थाखो बिहाबा । नेयोसो नेयो माथो जेबोआनो नुजाफैया दासिमबो । फुंनि 9 बाजि जाना बारनाबो 10 बाजिलाय लांसिगोन । अब्लासो मेसेजनि एलार्टआ गाबफैबाय । सोरजिआ हाखु दाखुयै नायबाय मबाइलखौ “मा लिरनाय दं मेसेजआव” । नुबाय बियो लिरनाय दं, “आं थांनो ओंखारबाय स’ना” । बिनि उनाव आरो मा लिरनाय दं बेखौ नुनो मोनाखैसै । मानो होनब्ला बिनि खावसे बाहागोआ सोरजिनि खावसे गाज्रि जानाय मबाइलनि दिसप्लेखिनिआव हाबना थाबाय । फाग्लि बादि मबाइलखौ दाङै दाङै गाबबाय थाखोमानायसै सिरि सिरि गावनि एमआव उन्दुना ।
दिनै बोसोर 8-9 बारलाय लांसिगोन, सोरजि आरो फुंखाया मोजां मोनलायनाया । जोबोर गोथौ बिसोरनि मोजां मोननाया । सासेआ सासेनि अनगा दसेबो थानो हाया । नाथाय रावबो मोन्थियाखै बिसोरनि मोजां मोनलायानायखौ दिनैसिम । सासेआ सासेनि मोगा मोगि जाब्लाबो सानैजोंदि गोसो थोलायो रावबो आन्दाज खालामनो हाया । नुवाब्लाबो मबाइलासो मोन्थिगौ । सिरियै गोबां गोथौनिफ्राय गोथौसिनसो जालांबाय थाबाय बिसोरनि मोजां मोनज्लायनाया ।
नाथाय खाफालनि लिरनायखौ सोर मोन्थिगौ । सम आरो बिदिन्थानि थिननाया सोरखौ माब्ला बबेथिं लाङो बेखौबो रावबो आन्दाज खालामनो हाखाया । दिनै बे सम आरो बिदिन्थानि फाख’नावनो गोग्लैनांबाय फुंखायाबो । न’नि बाथ्रा सानै सानै फुंखाया दिनै ओंखार लांनांबाय महाराष्ट्रनि फारसे होनना । माबाफोर मोजां खामानि मोनगोननि मिजिं लाना ।
उन्दैनिफ्रायनो बेसेबा दुखुजों गावनि बिबथैनि नआव थाना देरबोनाय फुंखाया । फुंखानि बिमा बिफाया उन्दै समावनो बिखौ बिबथैजों दोनना हादानाव होनना न-बां गासैखौबो गारना गालाङो । फिसाजो सानैखौ लोगोआव लाफाना । सिबाय फुंखा, गावनि फरायनायखौ फुरा खालामनो सानना बेवनो थाबाय । कालाइगावनिफ्राय साहा दाबसे फिसा गामियाव थायो फुंखाया । मेट्रिक आन्जादखौ उथ्रिना कालाइगाव कलेजावनो (Kalaigaon College) फरायनायसै बियो । कलेजआव फरायजेननाय समनिफ्रायनो मोजां मोनदोंमोन सोरजिखौ फुंखाया आरो सोरजियाबो ।
सोरजिआ फुंखानि गामि खाथिनिनो जाहैबाय । फुंखानि ननि सानजा मोनसे फिसा दैसाखौ बारब्लानो एसे थांबावनानो मोनो सोरजिनि न । बुंनो थांब्ला सोरजिनि नआव बिमा बिफाजों सासे बिनानाव दं । बिदा फंबाइ बुंनो रावबो गैया । बिनानावनि मुङा रादायस्रि । रावबो गोयै नालाय जोबोर अनसोगोरो बिसोर सानैखोनो बिमा बिफाया । हाल खदालजों मावना जाब्लाबो गोबां सुखुनि नखर सोरजिनि नखरा । नखराव रायनो होननाय रावबो गैया । अराय बिमा बिफाजों रंजा-बाजा थायो । गासै बाथ्रायानो रायज्लायनायनि गेजेरजों सोलियो । रावबो रावनिफ्रायबो जेबो बाथ्रा एरखोमाया । बबेयाव मा जादों, सोर सोरखौ जंखायदों, गावखौ सोर जंखायदों गासैखौबो बिमा बिफाजों सावरायो सोरजियाबो ।
थिक बे बादिनो फुंखाखौ मोजां मोननाय बाथ्राखौबो खोन्थाना लानायसै बिमानि सिगाङाव । नाथाय खम बैसोनि फरायफुनाय गथ’नि थाखाय बिमाया बिखौ जेबो बुङालासै सिरियै थाथ’नायसै । बेरा फारसेथिं फुंखायाबो फरायफुनाय गथ’ । बिबो गावखौ गाव फसंनो हायाब्ला माबादि हाबा लानांगौ जाखो । आरोथ’ आरो खम बैसोआव हाबा लाब्ला सरखारि आइन बादियै दायनिगिरि , बे बाथ्राखौ जानांगौ बयबो मोन्थियो । सोरजि आरो फुंखानि अनगा बिसोर सानैनि मोजां मोननायखौ मोनथिग्रा थामथि सुबुंआ सोरजि बिमायाल’सै ।
जेखि जाया बिसोर सानै मोजां मोननाया सिरियैनो दाइन गु बोसोर जालायलांबाय । फुंखायाबो हायार सेकेन्दारिनि फाइनेल (Higher Secondary Final Exam) आनजादखौ होनो गावनि नआव थांबाय हादानाव । आरो साननैसोनि उनाव बेनिफ्रायनो बियो बेनिनो बर’ फरायसा आफादावबो हाबहैबाय । बेनिफ्रायनो बियो खमैबो द’-स्नि बोसोरनाङै फरायसा आफादआवनो खामानि मावबोबाय । बिब’ सानैखौ हाबा हरनायनि उनाव हारसिं जानायलाय नखरनि बागै साननांगौआ बारा जानानै फैनायसै । बेरा फारसेथिं फुंखानि बिमा बिफानि हालोदआबो मोजां नङा । सानैबो गोबां सान लाना बेराम जागासिनो । बेवनो आरो बर’ फिसानालाय जौ लोंनाय, बेदर बिखा जानायखौथ’ खम खालामा । बेफोरनि थाखायनो नखरनि मोजां खालामनो सानब्लाबो हाग’आखै फुंखाया । फरायसा आफादाव थाना खामानि मावदोंब्लाबो दुखुआ इसेबो खम जायाखैसै बिहा । बिमा बिफाखौ साननायजों लोगोसे गावनि अनजालि सोरजिखौ साननायाथ’ दंखायोआनो । बिनि अनगा गावनि सोलिनायनि जेबो लामा मोनैआबो सासे सुबुंनि थाखाय गोबां साननांगौ बाथ्रा । नङाब्ला बोरैथो सोरबा सासे सिख्लाखौ हाबा लाना माबोरै सुखुआव लाखिनो । बेवनो नखरनि हालोदा मोजांब्ला गुबुन बाथ्रा । बेफोर बाथ्राखौनो सानै सानै माब्लाबा गोबां खर’ गुदुं जायो फुंखाया । रागाजों माब्लाबा मा खालामगोन मा मागोन जाना सोरजिजोंसो नांज्लायनाय बादि जायो फनआवनो ।
बेबादिनो बोसोर बारबाय । समाबो बारबाय, लासैनो बैसोआबो बारायबोबाय । खाफाला बबेबा खनायाव इसे मोजांफोर लिरनाय दंमोन जानांगौ फुंखाया । दिनैनिफ्राय बोसोर नै-थाम बोसोर सिगां बियो खाबु लाना रौटानि आइ.टि.आइ. (ITI) कलेजाव फितारनि बाहागोखौ सोलोंखाना दोनदोंमोन । हारखाबै दा बावैसो सानसे मोनसे रादाब फैनायसै । फुंखा नोंनि थाखाय मोजां रादाब । नोंखौ महाराष्ट्रसिम लांनाय जासिगोन । कम्पेनिनि खामानिनि थाखाय । होनना आइ.टि.आइ. कलेजनिफ्रायनो फनआव खोन्था हरनायसै । जानांगौ बैसागु दाननि गिबि सप्तायावनो थांनांगोन । फुंखानि गोसोआ इसे रंजाखांनायसै । नाथाय खैसिबबो जानायसै । मानो होनब्ला बिखौ बियाव लांनाय जागोन खमैबो थाम ब्रै बोसोरनि थाखाय । बेसेबा गोजानाव, बोरै थाहैनांगौ जाखो बिमा बिफानि गोजानाव, गावनि आंगोफोरनि गोजानाव । गुबै बाथ्राया गावनि अनजालि गोजान थानायासो । नाथाय नखरनि इयुननि बाथ्राखौ साननांगौब्ला बेफोरखौ सानब्ला जागोन नामा ? बैसागु दाननि 4 खालाराव थांनाय सानखौ थि खालामनायसै फुंखाया ।
बाथ्रायाव दं जिउआव माखोबा मोननो हास्थायोब्ला माखोबा खोमानो नांखागोन । ओजोंहाय फुंखानि महाराष्ट्रसिम लांनाय बाथ्राखौ मोनथिनायनिफ्राय सोरजि सोआ बायग्लिजोबनो नागिरदों । जाय सानखालनिफ्राय मोन्थिदों गाबखोमानायनि अनगा जेबो गैया जादों । नाथाय सोरजिया माब्लाबाबो गावनि दुखुनि मोन्दांथि होआखै फुंखानो । जानो हागौ सोरजि गाबखोमानाय बाथ्राखौ मोनथिब्ला बायफ्ले लांगोन फुंखानि गोसोआबो । जायनि थाखाय बिनि खामानियाव हेंथा फैनो हानाय । आरो बे हेंथानि थाखाय जानांगौ बिनि इयुन जिउआबो गाज्रि जानोबो हागौ । गोसोखौ जोबोर गोरायै हमथानायसै सोरजिया । थेवब्लाबो बियो फुंखानि गोसोआव गावनि गोसोनि बाथ्राखौ मोन्दांथि होआखैसै । बेबादिनो बैसागु दाना फैनायसै । बैसागु मोसानायाबो जागायबाय । बेफोर बाथ्राखौ सानै सानै देग्लायनि बैसागु मोसानायाबो इसेबो मोजां जायाखैसै सोरजिनिया । बेबादिनो दिनै बैसागुनि ब्रै खालारा मोगा मोगि जाबाय ।
दिनै ब्रै खालार बैसागुनि । बे सानानो फुंखानि महाराष्ट्रसिम थांनाय सान । नाथाय दिनै हराव बारहुखा बारनायजों सोरांसि समसिम अखाया हागासिनो थानायसै जोब जोबनो । सोरजिनि गोसोआ जोबोर गिलिर जादों । सोरजिआ दासिम नेना दं फुंखानि मेसेजनि । फुंनि 10 बाजिलाय लांबाय । मेसेज एलार्टआ गाबखांबाय सोरजिनि । नायबाय, नुबाय – “आं थांनो ओंखारबाय सना । आद्राया सोरजिनि खावसे गाज्रि जानाय दिसप्लेनि सिंआवसो हाबना थाबाय । आद्राखौ फरायनो मोनैयाव जोबोर गाज्रि नांनायसै सरजिनि गोसोआ । गोसोखौ हमथा हायियाव सोरजिया गावनो कल खालामहरनायसै । “हेलल’, थांनो ओंखारबाय नामा सना?” सोरजिनि सोंनाय फुंखानिसिम । “औ, आं दायो कलेजाव दंथ’यो । ओंखारबोबाय थांनो । आं दायो फन खालामहरगोनसो साननाय । रथ’ सना आं माबा इसे सावरायगासिनो सारजों । दायो हरफिनगोन” । फुंखानि फिन । दे बिदिब्ला होननानै दोन्थ’बाय सोरजिया मबाइलखौ । लोगो लोगोनो सिमा गोयै साननाया आवग्रिना लाबाय सोरजिनि गोसोखौ । माबादि हागोन सना नोंनि अनगा थानो.......? बोरै बारगोन बे बेसेबा गोलाव समा.....? सोलायगोनसो नामा नोंनि गोसोआ......? बावगोनसो नामा नोंलाय आंखौ......? आरोबाव बायदि बायदि बुंनाय रावफोर फुंखानि । आरो माखासे बुजिस’हायै सिनाय हायै मेसेजनि रावफोर । जाय सोरजिनि मबाइलनि गाज्रि जालांनाय दिसप्ले खिनियाव हाबखोमाना थाबाय । साननाल’ थाबाय सोरजिया, मा लिरदों जानांगौ बै ससेआवबा । मोदैआ लासैनो सोरजिनि खावलायखौ खुदुमफैनायसै ।
