21 थि बोसोरारि मागो दमासि फोरबोखौ 15 जानुवारि ( 1 मागो) आव बतियामारि दावहारु क्लाबनि दैदेननायाव गाजा गोमजायै जागायजेनो । बे बाराव फिरफिला बिरहोनाय हाबाफारिखौ गोबावै लानाय जादोंमोन । मानोना गोजां बोथोराव मानसिफोरा फुंआवनो ननिफ्राय बायह्राव ओंखारनो बायो । जाहोनाव फिरफिला बिरहोनाय हाबाफारियाव मानसि जाया । नाथाय बे बोसोराव बयबो राइजो राजाफोरा ज जाफैदों । बेनिखाय गोजोननाय नांदोंं । फिरफिला बिरहोयो बतियामारि गामिनि गामि आफादनि आफादगिरि मानगोनां मुस्रि मदन बर' बिथांआ ।
बेनि उनावनो गुबुन गुबुन गेलेनाय बादायलायनायफोरा जागायजेनो । मोनायाव जों हारिमु बादायलायनाय गोदान मोसानाय आरो खुगा मेथाइ बादायलायनाय जागायजेनो । बेयावबो जों थोजासे बादायारि मोननो हादोंमोन ।
नैथि एबा जोबथा साननि हाबाफारि हिसाबै फुंआव उन्दै उन्दै फरायसा फरायसुलि बिथांमोनखौ बायदिसिना थुनलाइयारि बादायलायनायफोरखौ होनाय जायो । बिथांमोनाबाो बे बादायलायनायफोराव गोगोमै बाहागो लायो।
बेेनि उनावनो मोनानि 6 रिंगासोआव गेवलां मेल आरो बान्था राननाय हाबाफारि जागायजेनो । बे हाबाफारिखौ दैदेने सुरेन बर' बिथांआ आरो आफादगिरिनि मासि आजावो दानसोरां बर' बिथांआ। गाहाइ आलासि हिसाबै हांख्रायनानै लाबोनाय जायो - सिमियन दैमारि, लेङाइ फोरोंगिरि, कबिरालि गेजेर फरायसालि बिथांखौ । आरोबाव माननि आलासि हिसाबै जों हांख्रायनानै लाबोदोंमोन कलाइगाव दख'रा बर' फरायसा आफादनि आफादगिरि मुस्रि कृष्ण कान्त बर', गाहाइ नेहाथारि फिरुस कान्त बसुमतारि, सोलोंथाइ नेहाथारि हिरकजोति दैमारि, गेलेमु नेहाथारि बिस्वजित बर' बिथांमोना । दाइसाव जिरायनाय गुबुन गुबुन आलासिफोरा जाबाय बतियामारि गामिनि आफादगिरि मदन बर', गामि आफादनि नेहाथारि धुनिराम बर', आइ देवर बियाब दुलाराय बाथौ महासभानि फोसावगिरि सुक्लेस्वर बर', बारग' गामि आफादगिरि प्रदिप बर', बारग' क्लबनि बिबानगिरि अमेन बर' बिथांमोन ।
मोनसे गोनां बाथ्राया जाहैबाय गेवलां मेलखौ दावहारु क्लाबा बे बाराव जेबो जेनेरेतर गैयालासे कारेन्टजोंनो सालायजोबदों ।
