गुन गोनां सोलोंथाइ लानायाव बिजोङा हेंथा नङा - जोंनि खोमसि फोथाइनायासो || An Educational Article by Mr. Jyoti Daimari

गुन गोनां सोलोंथाइ लानायाव बिजोङा हेंथा नङा

जोंनि खोमसि फोथाइनायासो

ज्योति दैमारि

बिजों थाब्लासो राव थागोन, राव थाब्लासो थुनलाइ थागोन, थुनलाइ थाब्लासो हारिमुवा गेवसारगोन आरो हारिया गेरेमसा जागोन । “बर’ बिजों फरायब्ला गुन गोनां मोननो गोब्राब जायो” बे सुबुंनि सानस्रिखौ फोथायनाय बुजाया, अदेबानि बे मोनसे खोमसि फोथायनाय । जोंनि समाजाव मोनसे थाखो ओंखारबाय जायफोरा गोग्गाना बुङो- “आंनि गथ’आ इंराजियाव जोबोद मोजां, बर’आवसो खमथार अनजिमा मोनो” । हाबाब !

सोलोंथाइया सुबुंखान्थिनि मोनसे गुदि आरो सुबुं मोन्थाइ । भारतनि संबिजितआबो 21-Article दफानि मथे 6 बोसोरनिफ्राय लाना 14 बोसोर बैसोनि गथ’फोरनो “बेसेन नाङै आरो मोन्थारनांगौ” गुदि सोलोंथाइखौ गुदि मोन्थाइ होनना मख’दों । जों मा बिजोंजों सोलोंथाइ लागोन बेयो जोंनि मोन्थाइ । बेखौ रावबो हेंथा होनो हाया । अब्ला मानोथो माहारियारि आफादफोरा बर’ बिजोंआव फरायनो खावलायो ? मानोथो बोसोरफ्रोमबो गामि गामि फोसावलाइ हरो ? नंगौ, जों जेखिजाया बिजोंजों फरायनो मोन्थाइ दं । नाथाय बेदि होनना बयबो गावनि आंगो असे बर’ बिजोंखौ नेवसिना बयबो गुबुन बिजोंखौ फोथांना लाखिब्ला, जोंनि बर’ बिजोंनि फरायसालिफोरखौ सोर फोथांना लाखिगोन ? बर’ रावआव थुनलाइ सोर सोरजिगोन ? सोर रावखौ फोथांना लाखिगोन ??

बर’ राव, थुनलाइ, आसार-खान्थि, हारिमुफोरखौ जों गुबुन गुबुन आदब खान्थि आरो बिजोंनि गेजेरजों फोथांना लाखिनो हागौ । बे सैथो बाथ्रा । नाथाय बर’ बिजों थाब्ला रावखौ रायलायनायजों लोगोसे लिरनायाव बाहायोब्ला बे रावनि जिउआ गोजोर जुगामि जागोन । बुहुमाव दिनै 7000 निख्रुइ बांसिन राव रावसा दं । बेफोर रावफोरनि गोबाङानो थैनाय लामायाव । सानसुमैफोरा फोथायोदि मोनफ्रोमबो 14  साननि गेजेराव मोनफा मोनफा रावफोरा थैलादों । UNESCO नि Atlas of the World’s languages नि मथे आसामनि गोबां राव-रावसा जेरै – कारबि, गार’, देउरि, दिमासा रावफोरा Vulnerable (न’नि बायजोआव गथ’फोरा बिमा राव रायज्लायै) फारियाव दं । बेफोर रावनि गजेराव बर’ रावआबो मोनसे । बे बेलायाव जों बर’ बिजोंखौ ग्रोम खालामना, बर’ रावजों बेसेन बह्रा थुनलाइ सोरजिब्ला, जों फैबाय थानाय गाज्रि समफोरखौ मोगा-मोगि जानांनाय नङा । जारिमिनाव फरायनो गोनां जानाय नङादि मोनसे समाव बर’ राव दंमोन होनना ।

नंगौ, गुन गोनां सोंलोंथाइखौ जेखि जाया बिजोंनिफ्राय मोननो हागौ । गुन गोनां सोलोंथाइ लाना जों मानसि हिसाबै थांना थानो हागौ । नाथाय दिनैनि समाव बर’ हारिया बर’ होनना सिनायथि लाना थांना थानाया गोनांथार । जोंनि लाइमोनफोरनि गेजेराव बर’ माहारियारि सानस्रिया गोनांथार । बर’ होनना सानना गोग्गानो हानायनि सानस्रिया गोनांथार । बेफोर सानस्रिखौ असमीया, इंराजि आरो गुबुनारि बिजोंफोरा गुदिनिफ्रायनो सासे बर’ फिसानि गोसोआव सोना होनो हाया । बागुरुम्बाया मा ? खेराइया मा ? बर’नि फोरबोआ मा ? बर’नि हारिमुआ मा ? बेफोर गासै बिथिंखौ सासे बर’ गथ’खौ उन्दैनिफ्रायनो सोलोंनो हानायनि आबहावा सोरजिना होनो हानांगोन । बेफोर गासै बिथिंखौ गावनि बिमा रावनि बोंजोंनि अनगायै गुबुनारि बिजोंनिफोरा हाया । दिनै बर’ हारिया राव, बिजों, आलादा राइजो गासै बिथिंआवनो सोमावसारबोना बेसिम सफैबाय । गोबां जोहोलाव-जोहोलावजोफोरा जिउ बाउबाय, नोरजिया जानांबाय । बिसोरनि बाउसोमनायखौ मान होनो हानांगोन ।

18 मे, 1963 मायथाइयाव बर’ रावखौ गुदि फरायसालि आरो एप्रिल 2, 1968 मायथाइयाव गेजेर फरायसालिनि बिजों महरै थिसनजाबाय । इं 1977 मायथाइयाव गौहाटि मुलुग सोलोंसालिनि जौमा फरायसालिफोराव MIL आइदा हिसाबै थिसनजाबाय । इं 1985 मायथाइयाव आसामनि लोगो सोरखारि राव हिसाबै गनायथि मोनबाय । बर’ रावा इं 2003 मायथाइयाव संबिजितनि 8थि फारियाव थिसनजाबाय । गौहाटि मुलुग सोलोंसालि, बड’लेण्ड मुलुग सोलोंसालि, दिब्रुगर मुलुग सोलोंसालि, कटन स्टेत मुलुग सोलोंसालि गासैआवबो बर’ बिफान दंसै । UPSC आरे APSC जों खुंजानाय सिभिल सार्भिसनि बादायलु आनजादफोराव बर’ आइदाखौ अपसनेल आरो MIL  हिसाबै लानो हासै । इं 2005 मायथाइनिफ्राय साहित्य एकाडेमी बान्थाखौबो बर’ रावनि थुनलाइनि थाखाय बोसोरफ्रोमबो होबोगासिनो । दिनै बर’ बिजोंजों जिनै थाखोसिम फरायनो खाबु मोनबावसिगोन । थारैनो बर’ बिजों, राव, थुनलाइ, हारिमु, धोरोम, आसार-खान्थिजों लोगोसे गावनि होनना लानो असे बर’ बिजों दं । आसाम आरो भारतनाङैनो गोबां हारि, हारिसा दं , नाथाय मोनफ्रोमबो हारिफोरा गावनि राव थासेयावबो बिजों गैया । आसामावनो गनायथि मोननाय गासै मोन 14 Plain Tribes दं । बेनिनो गेजेराव बर’ हारियाल’ बिजों दं । होम्बा ! जों  मानो गावनिखौ नेहाद सानखो, मानो फोथायाखै ?

नंगौ, बर’ बिजोङाव दाबो गोबां जेंना दं । सममथे बिजाबा मोनै, नांगौ जखानि फोरोंगिरि गोयै । नङाहोम्बा? थेवबो गाज्रिब्लाबो मोजांब्लाबो बर’ बिजोङा जोंनि । गाज्रिब्लाबो जोंनो बेखौ हाजासिम मोजां खालामनायनि बिबान लालायना खामानि मावनांगोन । बयबो बर’ बिजोङाव फोरोंनो थुलुंगा होलायनांगोन । बयबो गाज्रि होनना गुबुन बिजोङाव होब्ला सोरथो बर’ बिजोंखौ फोथांना लाखिगोन ?

बर’ बिजोंनि थांनाय आरो थैनाय जोंनि आखाइयावनो । बर’ बिजोंआ थैनायनि ओंथिया जाबाय बर’नि राव, थुनलाइ आरो हारिमुआ गोमोरलांनायनि नेर्सोन । बेयाव जेबो सन्देह गैया । बर’ बिजोंआ थैनाय माने गोबां बर’ नखरा नोरजिया जानाय । जोंनि बर’ बिजों थाब्लासो जोंनि लाइमोनफोरनि बेखार जेंनाया एसेब्लाबो खमायगोन । होम्बा ! जों मानोथो बेफोरखौ मोनथिनानैबो गावनिखौ नागारना गुबुननिखौ बोज’बनो नागिरखौ ?

बिजोङा माब्लाबाबो सासे फरायसाखौ गुन गोनां सोलोंथाइ लानायाव हेंथा होआ । गुन गोनां सोलोंथाइखौबो बर’ बिजोंआवबो मोननो हायो । जोंनि गोबां दिथागिरिफोरा गावारि खोन्दो (प्राइभेद) फरायसालिफोराव फरायनाय गथ’फोरखौ लांनायनिफ्राय लाबोनाय, जानायनिफ्राय लोंनाय, नांगौ रोखोमनि जोथोन लायो । नाथाय सोरखारि खोन्दोनि फरायसलिफोराव फरायनाय गथ’फोरखौ दिथागिरिफोरा बेबादि जोथोन लाया । जाहोनाव नांगौ बादि फिथाइखौ मोननो हाया । अब्ला जों बोरैथो फोरोंगिरिफोरखौल’ दायनिगिरि खालामनो ? बेखायनो “मोनसे मोजां समाज, सासे मोजां फोरोंगिरि आरो सांग्रां बिमा-बिफा”, - बे मोनथाम साखाया थि थाब्लानो सासे फरायसाया गुन गोनां सोलोंथाइ लानो हागोन । होम्बा ! बर’ बिजोंजों गुन गोनां सोलोंथाइ लानो हायै सोंथिया बोरैथो फैलायखो ?

दिनै राव बिगियानगिरि सोलोंथाइबिदफोरा बुंदों – “सासे उन्दै गथ’खौ बिमानि रावजों फोरोंनाय बादि जानो हाया । मानोना गथ’फोरा बिमानि रावखौ गोरलैयै आरो मोजाङै सोलोंजेनो । बेखायनो बिमानि रावजों गुदि सोलोंथाइखौ होब्ला गोसोआरि, मेलेमारि जौगानाय आरो सोर्जिलु आखुआ राफोद जायो” । बेखौनो नोजोर बोनानै “रेबजेन गोदान सोलोंथाइ पलिसी-2019” (Draft New Education Policy, 2019) आ बिमा रावखौ गुदि फरायसालिनि फरा फारियाव सोसननायनि बिथांखि लादों ।

गोबां सुबुंनि खोमसि फोथायनाय दं - “बर’ बिजोंजों सोलोंथाइ लाब्ला बादायलु आनजादफोराव उथ्रिसारनो गोब्राब जायो । नाथाय इंराजि बिजोंजोंबा उथ्रिसारनो हायो” । बिदिब्ला दिनै इंराजि बिजोंजोंल’ सोलोंथाइ लानाय, गथ’फोराल’ भारतनि बयनिख्रुइबो गोरासिन आरो गेदेरसिन जरै UPSC (CSE), APSC (CSE), JEE, AIIMS बादायलु आनजादफोरखौ उथ्रिसारनो हासिगौमोन । नाथाय बेयो सैथो नङा । इंराजि बिजोंनि अनगायैबो गुबुन गुबुन Vernacular बिजोंनि फरायसाफोराबो उथ्रिसारनो हादों ।

होम्बा ! जोंलाय मानोथो बर’ बिजोंनि सायाव फोथायनाय गैया । थारैनो जों गावखौनो बर’ होनना गोग्गाना सिनायथि लाना थांना थानो लुबैयोब्ला जोंनो राव, थुनलाइ आरो हारिमुजों लोगोसे जों बिजोंखौ फोथांना लाखिनांगोन । “गुन गोनां सोलोंथाइखौ बर’ बिजोंजों लानो हाया” – बे सानस्रिया मोनसे खोमसि फोथायनाय । बे खोमसि फोथायनायासो गुन गोनां सोलोंथाइ लानायाव हेंथा होयो । बेखायनो बिजोंआ गुन गोनां सोलोंथाइनि हेंथा नङा । नाथाय जोंनि खोमसि फोथाइनायासो हेंथा ।