बतियामारि गामि लाइमोन हान्जा आरो दावहारु क्लाब

बतियामारि गामि लाइमोन हान्जा आरो दावहारु क्लाब

दानसोरां बर’

अदालगुरि जिल्लानि खोलाहा थानाय कलाइगाव हालामनि दरसे फिसा बर’ गामि बतियामारि । कलाइगाव थाउननिफ्राय थाम कि:मि:फ्राम सानजाहा बे गामिया मोनबा सुबाजों दाजानाय । बेफोर जाबाय बतियामारि (तेजियालसुबा), बालिपारा बागिसा आरो कुमतिपारा, बागिसासुबा, झारगाव गामिनि एसे एसे बाहागो बे गुवार बतियामारि रेभिनिउ गामिनि सिङाव गोलैयो । बे गामिया समायना मिथिंगाजों बुंफबनाय । गामिनि सोनाबहा बतियामारि दैसाया गामि जोनोम सिगांनिफ्राय जिरि जिरि निजोमै बोहैगासिनो दं आरो गामिनि मोनफ्रोमबो जाथाइनि साखि जानानै दं । फिसा गामिब्लाबो गामिनि मोननै बाथौ थानसालिया गामिखौ समायफ्लेहोनायजों लोगोसे गामिनि साफ्रोमबो सुबुंनि थाखाय बे मोनसे गोग्गाथाव बाथ्रा ।

जायखि जायाथों बे लिरबिदांनि गेजेरजों आंनि थौले मेलेमा मोन्दांनाय आरो साफा सानैसो गामिनि बैसोगोरा सुबुंफोरनिफ्राय मिथिनाय बतियामारि (तेजियालसुबा) गामिनि मोननैसो जारिमिनारि खेंफोरथि होनो नाजानाय जाबाय । गामियाव आंनि 1^st Generation सुबुंनिफ्राय मिथिनाय बादिब्ला मोनसे समाव बे ओनसोला हाग्रा बंग्राजों बुंफबनायमोन । गामियाव जोंनि आबै आबौमोना थानाय समाव बे तेजियालसुबायाव नख’रबाल’ सुबुं दंमोन । बे समाव गामियाव हाग्रानि बायदिसिना जिब जुनाद मोननाय जादोंमान । मोनसे खहाबथाव बाथ्रा मोसाजों दावहा नांना मोसाखौ सोबानाय जोबोद साहसि मानसिबो दंमोननो गामियाव । उन्दै समाव जों नुनो मोन्दोंमोन गामिनि खोलाहा सोनाब खनायाव थानाय नखरनि बिगोमा नालिया कसारि आबौ बिथाङा थाफ्लि बुदां गामसा गाननानै सान्दुंआव जना लाना बायदिसिना आखाइनि मावनाय खामानिफोराव मुखुब थायोमोन । बिथांनि मावनाय दांनाय आरो आखल-आखुनिफ्रायनो हमदांनो हायो बिथांआ सेंग्रा लाइमोन समाव जोबोद साहसिमोन । गोबां समाव जों खोनानो मोन्दोंमोन बिथांमोननि समावनो हाग्रानि जिब जुनाद सिखार खालामनायाव बिथाङा जोबोद आखा-फाखामोन । बेनि गोबां बोसोर बाबेनलांनाय उनाव लासै लासै सुबुं अनजिमा बारायनानै गामियाव नख’रजि जाहैदोंमोन मोनसे समाव आरो दा फैयै फैयै बेनो इं 2020 मायथाइयाव 51 नख’रसो जाफैबाय ।

दायो बतियामारि (तेजियालसुबा) गामिनि लाइमोन हान्जानि जौगाथाइयारि मोननैसो जारिमिनारि खारिजों लोगोसे जौगाथाइयारि मावथांखिफोरखौ सुबुंनि खुगानिफ्राय मिथिनाय मोननैसो बाथ्रा फोरमायनो नाजादिनि । इं 1995 मायथाइयाव हान्जासे गामिनि गुसु गुदुं लाइमोन सेंग्रा सिख्लानि गोजौ सोलोंथाइ लानो नाजानाय आरो सोलोंथाइजों गामि ओनसोलनि जौगाथाइनि बाथ्रा सिमां रनसायदोंमोन । बेबादिनो जाखांफुनाय लाइमोन हान्जानि नाजानायाव मागो दमासिनि समाव 1 आरो 2 मागोखौ साननैनि हाबाफारिजों गाजा गोमजायै खुंफुंदोंमोन । हाबाफारिखौ बयजोंबो अनसायजानाय बादि खालामनो थाखाय बायदिसिना आइदानि बादायलायनाय खालामनाय जादोंमोन । उन्दै उन्दै गथ’-गथाइ, सेंग्रा-सिख्ला, बोराइ-बेन्थ बयबो गेलेनाय हाबाफारियाव बाहागो लानो हानाय बादियै गुबुन गुबुन रोखोमनि गोसो रंजाहोनो हानाय गेलेनाय होनाय जादोंमोन । माय हाखांनायनि उनाव गोरान नारा थिलियावनो हाबाफारिफोरखौ लानाय जाब्लाबो बयबो हाबाफारिफोराव बाहागो लादोंमोन । जों उन्दै समाव नुनाय मोननैसो मख’जाथाव बेबादि गेलेनायफोरा जाबाय- आइजोफोरनि जिद’आव दै लानानै खारनाय, बोराइफोनि खारनाय, थाव फोननानै होनाय थालिर बिफांआव गाखोनाय, आइजोफोरनि फिथा जाना खारनाय, फिथा बानायनाय, मोसानाय-मुसुरनाय आरो बायदिसिना थुनलाइयारि बादायलायनाय मावफुंनाय जादोंमोन । मागो दमासि फोर्बो खुंथाइ बे हाबाफारिखौ जाफुंहोनो थाखाय नख’रफ्रोमबोनिफ्राय थाइबा थाइबा रां खेन्दा खांनाय जादोंमोन होननानै बै समनि सामलायगिरि बिथांमोननिफ्राय मिथिनो मोननाय जादों । बै समनि उनगोलैसोनाय गामिनि हालोदखौ नुनानै सांग्रां लाइमोन हान्जानि नाजानायाव गामियाव गोदान सानस्रिनि जोनोम होनो नाजादोंमोन सानै साथामसो गोजौ सोलोंथाइ लानाय गामिनि लाइमोन दैदेनगिरिफोरा । बेखिनियावनो मुं मख’थारनांगोन मानगोनां मुस्रि दिम्बेस्वर बर’, फोरोंगिरि, (रुफाथि मायथाइ खुंथाइनि आफादगिरि) नि नख’रानो गुबैयै गामियाव गिबिसिन मागो दमासि फोर्बोखौ खुंनो थाखाय बै समनि लाइमोन हान्जाखौ गोदान सानस्रिजों दैदेनदोंमोन । लाइमोन होननानै बुङोब्ला गोसोखांनाय बै समाव हान्जायाव दंमोन दिम्बेस्वर बर’, जयन्त बर’, कुलेन बर’, अमेन बर’, गुलाप बर’, निबन बर’, रुंसारि दुर्गा बर’, रुंसारि प्रदिप कुमार बर’, रुंसारि अनिल बर’, रुंसारि फुकन बर’ आरो गामिनि आइजो बिथांमोनाबो लोगोसे मदद होफादोंमोन । बिथांमोननि नाजानायावनो गामियाव समजों खारफानो माबोरै आगान होनांगोन जों दिनै मिथिनो हादों । बे खाबुआवनो साफ्रोमबो बै समनि लाइमोन हान्जानिसिम गोसो गोरबोनिफ्राय साबायख’र बाउहरनाय जाबाय ।

मिथिनायाव गिबिसिन मागो दमासि फोरबो खुंनाय समाव गामिनि उन्दै गेदेर, बोराइ बेन्थ’ बयबो गाजा गोमजायै मोनफ्रोमबो हाबाफारियाव बाहागो लादोंमोन । बेनि उनाव बोसोरफ्रोमबो फिसा गेदेरहैब्लाबो मागो दमासि फोरबोआव बायदिसिना गेलेनाय बादायलायनायजों लोगोसे बे फोरबोखौ फालिबोनाय जादों । बेखिनियावनो मोनसे सोंलु जानो हागौ जे बै समनि लाइमोन हान्जानि आफादगिरि/नेहाथारि सोर सोरमोन । मानो खनसेबो आफादगिरि/नेहाथारि आरो बिबानगिरिफोरनि बाथ्रा रायखांनाय जायासै ।  नंगौ बै समाव गामियाव लाइमोन हान्जानि दाना लानाय आरो बिबान होनाय दानि बादि आफादगिरि नेहाथारि गैयामोन । बयबो ज’ ज’ खामानिफोरखौ मावनायजों मोगथां महर होनाय जादोंमोन । बे मोनसे गोदान सानस्रि आरो रंजा बाजानाय समनि थाखाय बयबो बे हाबाफारिफोराव बाहागो लादोंमोन ।

सिगाङावनो रायखांदों जे लाइमोन हान्जानि सिगांनि समाव दानाय दिदोम आफाद गैयामोन आरो क्लाब हिसाबैबो खामानि मावनाय जायाखैमोन । मागो दमासिखौ सामलायनो जायखि जाया सासेनो रांखान्थिनि बिबानखौ होनानै सालायलांनो होनाय जादोंमोन । उननि समाव सानै साथामसो गामिनि लेखा गोरों सेंग्राफोरा दुलाराय बर’ फरायसा आफादजों थाफाना खामानि मावनायनि रोंगौथि जानायजों लाइमोन हान्जाखौ माबोरै देदेननांगौ बेनि सायाव सम सम सावरायलायनाय जादोंमोन । बेयावनो मख’नांगोन अतुल चन्द्र बर’ आरो दानसोरां बर’मोना कलाइगाव दख’रा बर’ फरायसा आफादनि सिङाव थानाय सानजा कलाइगाव दालाइ बर’ फरायसा आफादनि बिबानगिरि जानायजों लोगोसे दख’रा आफादजों लोब्बा दङमोन । बिथांमोननि रोंगौथिफोरखौ गामिनि लाइमोन हान्जानि मिथिंफोराव फोरमायलायनायजों लोगोसे गामिखौ आरो क्लाब मोनसे माबोरै दैदेननांगौ, मा रोखोमनि दिदोम सामलाय आफाद थानांगौ बे बाथ्राफोरखौ फोरमायदोंमोन ।

इं 2005 मायथाइ आरो बेनि सिगांनि बोसोरफोराव गामिनि लाइमोनफोरा गोबां गुबुन गुबुन जायगाफोराव क्रिकेट गेलेहैदोंमोन । गोबां जायगाफोराव क्रिकेट देरहानानै बतियामारि तेजियालसुबा गामिनि लाइमोन हान्जाया देरहासाद ट्रफिबो लाबोनो हादोंमोन । मख’नो नांगोनदि बै समफोराव लाइमोन हान्जानि जेबो थि मोनसे क्लाब गैयामोन आरो गुबुन गुबुन गेलेनायफोराव गुबुन गुबुन मुं होनानै बादायलायनायफोराव बाहागो लाहैनाय जादोंमोन ।

मोनसे समाव बतियामारि तेजियालसुबा गामियाव लाइमोन हान्जानि दैदेनायाव ओनसोलनि गुबुन गुबुन जायगानि क्रिकेट दोलोफोरखौ हांख्रायना लाबोनानै नक आउट क्रिकेट बादायलायनाय खुंफुंनाय जादोंमोन । कलाइगाव थाउननि गुबुन गुबुन हारि माहारिनि सुबुंफोराबो बे बादायलायनायफोराव बाहागो लाफैदोंमोन । बोसोरफ्रोमबो गुबुन गुबुन सोद्रोमाफोरखौ गेम्स एन्द इस्पर्टस आइदानि नेहाथारि बिबान होनानै बे गेलेनायफोरखौ सामलायनाय जादोंमोन । उननि समाव इं 2006 मायथाइसोआव गामिनि क्लाबखौ दानसोरां बर’नि बुंनायाव “दावहारु क्लाब” मुं दोनोब्ला मोजां जागोन नामा होनना लाइमोन हान्जानो फोरमायनाय जादोंमोन । बेनिफ्रायनो लासै लासै मोनफ्रोमबो खामानियाव बे “दावहारु क्लाब” मुंखौ बाहायनाय जादोंमोन आरो गुबुन गुबुन जायगायाव बे मुंजों गेलेनाय बादायहैनानै देरहासादबो जानो हादोंमोन ।

बतियामारि दावहारु क्लाब बे मुङा कलाइगाव हालामनि प्राय मोनफ्रोमबो जायगायाव गोसारनो लादोंमोन क्रिकेट गेलेनायनि गेजेरजों । कलाइगावनि चिन्तागाव मुंनि जायगायाव सान-हरनि क्रिकेट गेलेनाय बादायलायनाय (Day Night Cricket Match) खुंफुंनायावबो बतियामारि दावहारु क्लाबआ बाहागो लाहैदोंमोन आरो गोबां मोजां मोजां हान्जाफोरजों बादायनो खाबु मोन्दोंमोन । दावहारु क्लाब हिसाबै बे गेलेनायफोराव बाहागो लानानै गामिनि मुं, ओनसोलनि मुं आरो लाइमोन हान्जाया गोबां गेलेनायनि रोंगौथि मोननो हादोंमोन । खनसे काहिबारि गामिनि गबसाराव काहिबारि लाइमोन आफादनि बान्जायनायाव खुंफुंनाय क्रिकेट गेलेनाय बादायलायनायाव बाहागो लाहैनानै देरहासाद जानाय मोनसे क्लाबनि खहाबथाव जारिमिन फोरमायदिनि । बे गेलेनायाव ओनसोलनि गुबुन गुबुन गामिनि क्रिकेट हान्जाफोरा बाहागो लाफैदोंमोन । जोंनि गामिनि लाइमोन हान्जाखौबो लाइजाम होनानै गेलेनाय बादायलायनायाव बाहागो लानो हांख्रायनाय जादोंमोन । बे लेखायैनो गंफ्रोमबो गेलेनायाव देरहासाद जानानै फाइनेल एबा जोबथा गेलेनायाव आगान हैनो हादोंमोन । जोबथा गेलेनायाव जोंनि क्लाबजों बादायनो मोन्दोंमोन (बननगुरि गामि क्रिकेट दोलोआ) । गेलेनाया जोबोद मोजाङै सोलिलांदोंमोन नाथाय हरखाब गेलेनाय सोलिलांबाय थानाय समावनो ज्राम ज्राम अखा हानायसै । जेसां अखाब्लाबो नाथाय जोंनि गामिनि दोलोआ बे गेलेनायाव देरहासाद जानो हादोंमोन । देरहानाय लोगो लोगो गेलेनाय नायनो थांनाय आरो बाहागो लाहैनाय बयनिबो गोसोआ रंजानायजों बावलिया जालांदोंमोन । देरहासाद ट्रफिखौ लानानै बयबो स्लगान होयै होयै काहिबारि गामिनि गपसारनिफ्राय गामि फारसे जों आगान होयो । ट्रफिखौ लाना स्लगान होयै होयै फैनाय गामिनि लाइमोन मुस्रि कुसल बर’ बिथाङा भाङाबरुवा दिंग्राय गाखोफैनाय समावसो गोसोखांबाय जे बिथांनि साइकेला गैया । लोगोफोरखौ सोंला सोंसि खालामना मिथिनो हाबाय रंजानायजोंनो बियो गावनि साइकेलखौबो लाबोनो बावगरफ्लांनायसै । बेबादि माखासे जोबोद रंजाथाव बतियामारि दावहारु क्लाबनि जारिमिनफोरा लिरनाय हुदा गैयिनि थाखायनो समनि फाख’नाव गोमोरलांनायसै । गोबां जायगायाव जारिमिन सोरजिनो हादोंमोन बे दावहारु क्लाबआ नाथाय समा बबेनलांनायजों लासै लासै बयबो गावबा गावखौ लाना मुखुब जानायजों मोनसे समनि मोजां मुं आर्जिनो हानाय बतियामरि दावहारु क्लाबनि क्रिकेट दोलोआ गैया जालांनायसै ।

दावहारु क्लाबनि बोसोराव मागो दमासि फोरबो खुंथाइखौ खुंफुंनाया मोनसे गोनांथार हाबाफारि । दावहारु क्लाब मुं लाखिनाय गोबां बोसोर सिगांनिफ्राय बे हाबाफारिखौ लानायनि थाखाय गोदान लाइमोन हान्जाफोराबो बे दोरोङारि हाबाफारिखौ आरो गामिनि हारिमुखौ फोथांना लाखिनो गोदान बिबानगिरिफोरखौ मागो दमासि खुंफुंनाय उनखालि एबा खरसानि हिसाब होनाय मेलावनो गोदान आफाद दानानै होनाय जायो । उनाव 2009 मायथाइयाव बोसोरसेल’ बिबान मोनोब्ला जेबो रोंगौथि जाया होननानै बोसोरथामनि थाखाय बिबान होनाय जायो । बे हिसाबै दिनैनि समसिम दावहारु क्लाबनि बिबानगिरिफोरनि बिबान बोसोरआ थाम बोसोरनि थाखाय जानानै दं ।

हारिमुआरि बिथिंआव लाइमोन हान्जा:

हारिमुआ हारिनि आइना । बेनि गेजेरजोंनो हारि मोनसेखौ सिनायनो हायो । बर’नि मोसानाय-मुसुरनाय हारिमुनि बिथिंआवबो बतियामारि (तेजियालसुबा) गामिया उनगोलैसोना थायाखैमोन । इं 1993 मायथाइयाव गामिनि बै समनि सेंग्रा-सिख्ला लाइमोन हान्जाखौ लानानै मानगोनां मुस्रि थानेस्वर बर’, मोसानाय दामनाय देनाय फोरोंगिरि बिथांखौ लाबोनानै बर’नि आंगो दोरोङारि खेराइ मोसानाय फोरोंथाइ लाफैनाय जायो । बतियामारि हालामाव तेजियालसुबायानो गिबिसिन खेराइ मोसानायखौ सोलोंजेनदोंमोन । बेनि उनाव लासै लासै सोरगिदिं खाथि खाला गामिफोरावबो गुबुन गुबुन फोरोंगोरि लाबोनानै बर’नि खेराइ मोसानाय सोलोंबोयो । बतियामारि (तेजियालसुबा) गामिनि हारिमु आफादखौ मुं होनाय जायो- “बतियामारि रैरुब हारिमु आफाद” । सोलोंजेननाय बोसोरावनो गासै मोन 20 निख्रुइबो बांसिन बर’नि मोसानायफोरखौ सोलोंनो हादोंमोन मोसागिरि आरो दामग्रा-देग्राफोरा । बे बोसोरावनो बतियामारि (तेजियालसुबा) गामिनि बान्जायनायाव आइ देवर बियाब बाथौ गौथुमनि रंजालि बैसागु फोरबोखौ गामिनि गेजेरजों बालिपारा सुबा थांनाय लामानि फोथाराव गाजा गोमजायै खुंफुंनाय जादोंमोन । बे रंजालि बैसागु फोरबो खुंथाइ हाबाफारिनि बायदिसिना बर’नि हारिमुआरि बादायलायनायफोराव जोंनि गामिनि लाइमोन हारिमु हान्जाया गिबिसिन बाहागो लाजेननो सुबिदा मोननानै रंजाखाङो आरो गोबां बादायलायनायफोराव देरहासाद बान्था मोननानै थुलुंगानाय मोनो ।

इं 1995 मायथाइयाव बतियामारि रैरुब हारिमु आफादा टि.भि.नि बर’ आइदा हाबाफारियाव मोसाहैनो सुबिधा मोनो । बेबादिनो बे हाबाफारिनि थाखाय मोसानायनि रेकर्डिंखौ होना फैनायनि उनाव बिथांमोननि मोसानाय आइदाखौ दुरदर्सन टि.भि.नि गेजेरजों नुनो मोननाय जादोंमोन । बेनि उनाव अदालगुरि, टंला बादि जिलानि सिङाव गुबुन गुबुन जायगाफोराव गामिनि हारिमु हान्जाया मोसाहैनो मोनदोंमोन ।

बै समाव बतियामारि रैरुब हारिमु हान्जाखौ लाइमोनफोरनि गेजेरनिफ्राय मुस्रि अमेन बर’ बिथाङा जोबोद मोजाङै दैदेनलांदोंमोन आरो राइजो आफादनिफ्राय मुस्रि सन्धि राम बर’, पिंकु कसारि, रुंसारि सत्यराम बर’ बिथांमोना दैदेनदोंमोन । बै समाव बतियामारि गामिया खाम, सिफुं, जथा, सेरजानि रिंनायजों गोमखाङोमोन । बैसागुनि सिगां समनिफ्राय सानफ्रोमबो सर’ खालामनायखौ राइजो राजा बिथांमोना ज-ज नायहैयोमोन आरो थुलुंगा होयोमोन ।

हारिमु हान्जाफोरा थांना थानाया गुबैयै आइजो, दामग्रा-देग्रा, सांग्रांथि, राइजो-राजानि मदद हेफाजाब आरिनि सायाव सोनारो । मानोना सोरबा मोसागिरि गैयाब्ला लोगो लोगो बिनि जायगाखौ सुफुंनो जेबो गुबुन राहा थाया । माखासे समाव नख’रनि बिगोमाफोरा गावसोरनि फिसाज्ला-फिसाजोफोरखौ बाधा होयो । माखासे समाव सोलोंथाइनि आंखालनि  जाहोनाव नंखाय बाखाय  गुबुन गुबुन गोरोन्थि बाथ्राफोरखौ लानानै हारिमु हान्जाजों मोसाहैनायखौ बन्ध खालामना होयो । माब्लाबा दामग्रा-देग्रा मानसिनि आंखाल । थेवब्लाबो बै समनि दैदेनगिरि बिथांमोना जोबोद साहसजों बे जेंना-जेंसिफोरखौ बोस्रांनानै गामिनि हारिमु हान्जाखौ फोथांना लाखिनो नाजादोंमोन । गोबां जेंना जेंसिनि उनाव इं 2006 मायथाइसोआव बतियामारि (तेजियालसुबा) गामिनि लाइमोन हारिमु हान्जाया गोमोरलांदोंमोन ।

क्लाब मोनसे सरखारनिफ्राय आरो गुबुन गुबुन बिजोंनिफ्राय रांखान्थियारि, जौगाथायारि आरो गुबुन गुबुन अनसुंथाइ मोननोब्ला क्लाबआ रेजिस्टार जानाय जानांगौ । बे बाथ्राफोरखौ मिथिनानैनो बतियामारि गामिनि क्लाबखौबो सरखारि फारिलाइयाव मुं थिसननो गोबां सिगांआवनो नाजादोंमोन होनना मिथिनो मोनो । नाथाय गोबां खेब सावरायलायनाय आरो थांखि लानाय जानाय उनावबो मोगथाङाव नाथाय रेजिस्टार खालामनो नाजानाय जायाखैमोन । इं 2019 मायथाइयाव दावहारु क्लाबनि दानि आफादगिरि मुस्रि जितु रामसियारि आरो मुस्रि सुरेन बर’नि नाजानायाव रेजिस्टारनि खामानिया गोबां दावगाना दं होनना मिथिनो मोननाय जादों । आसा खालामो गोदान बोसोर आरो मागो दमासिजों लोगोसे बतियामरि दावहारु क्लाबनि रेजिस्ट्रेसननि खामानिया थाबैनो जानानै फैयो ।

गोदान सम, गोदान बारहावा आरो गोदान जुगनि गोदान गोदान सानस्रिजों बतियामारि दावहारु क्लाबनि बिबानगिरिफोरा गामिखौ फोसाबनो गोबां नाजाबोदों । लाइमोन गोहोआनो मुलुगनि देरसिन गोहो होनना बयबो मिथिगौ । गामिनि राइजो राजा, आइ आफामोनाबो क्लाबनि लाइमोन हान्जानि सायाव गोबां फोथाइनाय दं । बेनिखायनो लाइमोन हान्जाया बोसोरफ्रोमबो क्लाबनि गोनां हाबाफारिजों लोगोसे गुबुन गुबुन समाज जौगाथाइयारि खामानिफोराव आखाइ होनांगौनि सम फैबाय । सोलोंथाइ, रांखान्थि, राजखान्थि, समाजखान्थि, दोहोरोम गासैबो बिथिङाव गामि जौगाथाइनि थाखाय खामानि मावनांगौ दं । गोदान गोदान लेखा गोरों गामिनि फंबाइ बिनानावमोनखौ क्लाबनि बेन्दोंआव लाबोनानै बिथांमोनखौ समाज आरो क्लाब दैदेननायनि बिबान होनायजों गामि जौगाथाइयारि खामानिफोरखौ मावलांनो हायोब्ला थारैनो बतियामारि गामिया ओनसोलनि गेजेरावनो मोनसे मख’जाथाव जायगा हिसाबै बयजोंबो मिथिजागोन ।