Bodo Article on Mahatma Gandhi

महात्मा गान्धिनि सानस्रि

दानसोरां बर’, कलाइगाव

सिनायथि:

जायखि जाय गोनां आदर्सनि बाथ्रा बुंनो थाङोब्ला गिबिसिन गोसोआव फैयो महात्मा गान्धिनि बाथ्रा । महात्मा गान्धीया बुंदोंमोन “आंनि जिउनि गुबै मोन्थोरनि गिबि आरो जोबथा बाथ्रायानो जाबाय अहिंसा” । हारिनि बिफा महात्मा गान्धिनि आदर्स, सानथौ आरो समाजारि मोन्थोरफोरा जेब्लाबो मोगथाङारि आरो बयजोंबो गनायजानाय । दिनैनि सुबुंखुंथाइ अनसायजानाय बुहुमाव बिथांनि सान्थौफोरा उनगोलैसोनाय माहारिफोरनि जांख्रिथायनि मोनफा मोनफा बाहागो । दुलाराय बुहुमनाङै अहिंसा मोन्थोरजों देरहासाद जानो हानायनि जारिमिन रनसायलांनाय आरो बयजोंबो बे जारिमिना गनायजानाय बे गेदेमा सुबुंनि जोनोम सानजों लोब्बा लाखिनानै “गान्धी जयन्ती” हिसाबै फालिनायजों बिथांनि सानस्रिफोरखौ गोदान जोलैनि गोसो गोरबोआव सोनानै होनो नाजानाय जायो । जाहाथे समाजाव मोनसे गोजोन, खौसेथि आरो जौगाथायनि आबहावा फैयो ।

सुंद’ जिउ जारिमिन:

दानि गुजराटनि पोर’बन्दराव इं 1869 मायथाइनि 2 अक्तबराव भारतनि माहारिनि बिफा महात्मा गान्धीनि जोनोम जादोंमोन । आरो बेनिखायनो 2 अक्तबर सानखौ गान्धी जयन्ती हिसाबै फालिनाय जायो । बिनि बिफानि मुङा करमसान्द गान्धी आरो बिमानि मुङा पुतली बायमोन । करमसान्दनि उन्दैसिन फिसाला महात्मा गान्धीनि आबुं मुङा महनदास करमसान्द गान्धी । उनाव बिथांखौ बयबो “गान्धीजी” एबा “बापुजी” होनना लिंदोंमोन । आरो बिथांनि गेदेमा बिहोमानि थाखाय बिथांखौ “महात्मा गान्धी” होननानै सन्मान होदोंमोन । मख’नो गोनांदि गेदेमा खन्थाइगिरि रबिन्द्रनाथ थाकुरासो बिथांनो “महात्मा” बिमुं होदोंमोन । आरो जवाहरलाल नेहरु आरो सर्दार बल्लबभाइ पेटेला बिथांखौ “बापुजी” होनना मान होदोंमोन ।

गोनां आदर्श:

            बाउसोमनाय आरो अहिंसानि जा मोन्थोर दुलाराय भारतनाङै गोसारनानै दं गान्धीजिया बेखौ फोथांफिनदोंमोन आरो समाज, हादर आरो गासैबोनियाव बाहायदोंमोन आरो देरहासादबो जादोंमोन । बिथाङा बहाबा खनसे रायखांदोंमोन अहिंसा मोन्थोरजों बिथाङा सारा बुहुमाव धोरोम राज्यो गायसननो सिमां रनसायदोंमोन । दिनैसिम बुहुमाव गोजोन आरो सुबुं समाज फुजिग्रा जेसेबां गेदेमा सुबुं जोनोम मोनदों बिथांमोननि रुजुनायाव महात्मा गान्धीनि गियान आरो सोलोंथाइआ बयनिख्रुइबो जौसिन । बिथाङा बुहुमनि नांज्लाय-खमज्लाय, बुथारलाय-सिथारलाय बायदिसिना हिंसायारि समाजखौ अहिंसानि मोन्थोरजों दबथायनो हादोंमोन । दानि समाव बुहुमनि जौगा हादरफोरा सेकेण्डनि गेजेरावनो बुहुमखौ फोजोबनो हानाय हाथियार आरो बायदिसिना राहा दिहोनदों बे समाव महात्मा गान्धीनि अहिंसानि मोन्थोरजोंसो बुहुमखौ रैखा खालामनांगोन आरो गोदान जोलैनो लामा दिन्थिनांगोन ।

            महात्मा गान्धीया खद्दर सि फोसावनाय  आरो आखाइजों दानाय सिनि सायाव गोबां गोसो होदोंमोन । दिनैनि समाव बिथांनि बे नाजानायखौ गोबाङानो जावलियानि बाथ्राना साननो हागौ । नाथाय महात्मा गान्धीया सुबुंथियारि गुनजों बेखौ फोसावनाय आरो मानसिनि गेजेराव सांग्रांथि लाबोनायाव जाफुंसार जानो हादोंमोन । बिथाङा भारतारि नोगोरारिफोरनि गेजेराव सांग्रांथि लाबोना गावनि दिहुननाय आंगो सिजोमफोरखौ बाहायनो बै समावनो थुलुंगा होदोंमोन । बिथांङा गावबो जेब्लाबो खद्दरनि सि-जोम जोमोमोन आरो साधारन मानसिफोरनोबो गावनि असे भारतारि हारिमुखौ फोथांना लाखिनो फोरोंलांदोंमोन । बिथाङा मिथिदोंमोनदि भारतनि 80 जौखोन्दो सुबुंफोरानो गामि ओनसोलनि आबादारि । आबादारिफोरा बोसोराव आबाद मावना बा दान जिरायनो मोनो । बे जिरायनाय समाखिनियाव बिथांमोना दानाय-लुनायाव गोसो होनानै गावबा गावनि रांखान्थियारि हालोदाखौ फोसाबनो हायो आरो जायखि जाया गोनांथिफोरखौ सुफुंनायावबो जाफुंसार जानो हायो । बेनिखायनो बिथाङा खुन्दुं लुनाय, सि दानाय आरो गुबुन गुबुन महर दानाय बायदिसिना खामानिफोरनि सायाव सांग्रांथि लाबोनाय आरो फोसावनायनि सायाव गोसो होदोंमोन ।   

            बिथांनि आइन मानियै सोमावसारनायखौ इंराजीयाव “सिभिल दिसअबेदियेनस” होननानै बुंनाय जायो  । इंराजीनि बे “सिभिल” सोदोबनि ओंथिया जाबाय सोद्रोम । बिथांआ सोद्रोम आरो सोदोमस्रियारि गुनजों भारतारिफोरखौ आइननि बेरेखायै जुजिनो हांख्रायदोंमोन । बिथांनि बादिब्ला मानसिया जेब्लाबो सोद्रोमथियारि जिउ खुंनांगौ, बेखौ दिन्थिनो थाखाय नङा, नाथाय बेयो जोंनि गोसो गोर्बोनि राव जानांगौ, बेनो बिथांनि बोसोनमोन ।

            बिथाङा बुंदोंमोन “फाफखौ मुगै, फाफिखौ दा मुगै” । बिथाङा जेब्लाबो गाज्रि मानसिफोरखौ अनसायदोंमोन आरो बिथांमोनखौ गुबै लामासिम गिदिंफिननो थार लामा दिन्थिनो नाजादोंमोन । खोला आफ्रिका हादराव महात्मा गान्धीखौ खनसे खारनाय ट्रेननिफ्राय इंराजफोरा बोख्लायना गारहारदोंमोन । बिथाङा बे समाव जोबोद दुखु मोनदोंमोन आरो ब्रिटिसफोरा आफ्रिकानि निग्रो मानसिफोरखौ खालामनाय इनाय अनागारनि हेंथायै सोमावसारनायाव बारसोमदोंमोन । गोसो होनो गोनां बाथ्राया बेसोदि बिथांखौ जुलुम खालामनाय बे गुफुरसाफोरनि खैफोदनि समाव नाथाय बिथाङा जेब्लाबो मदद खालामनो उनफिनना थायामोन ।

            बिथाङा गुबुनारि सि नागारनाय सोमावसारनाय फोसावदिंनो आसामाव फैनाय समाव गान्धीजीया गावनि गिबिसिन बिबुंथियाव बुंदोंमोन- “आसामनि राइजो राजा नोंथांमोनखौ आं गोदानै सुबुंखान्थिनि सायाव बाथ्रा बुंनो फैयाखै । मानोना दिनैनिफ्राय बाजि बोसोर सिगाङावनो श्रीमन्त शंकरदेबा सुबुंखान्थिनि सोलोंथाइ होलांदों । आं दायो खालि बिदेशीफोरखौ होखारना हादर उदांस्रि खालामनोसो हादरारिफोरखौ फोजाखांनो आसामाव फैदों”। बेबादिनो बिथाङा सुबुंथियारि गुनजों हादर उदांस्रिनि सोमावसारनायखौ राइजो राजानि सुबुं सोमावसारनायसिम महर होनो हादोंमोन । सैथो आरो अहिंसानि सोमावसरानाय बिथांनि सत्याग्रह सोमावसारनायाव हादरनि नौ नारिफोरनि गोसोआव जेब्लाबो साहस जगायदोंमोन । बेनिखायनो बेसेबांबा गोहो बोलोगोरा गुफुरसाफोरनि हेंथायै आखाइयाव जेबो हाथियार लायालाबानो सोमावसरानायाव बारसोमनो थुलुंगा जगायदोंमोन । बापुजीया हेफाजाब होयै सोमावसारनायनि गेजेरजों हादराव उदांस्रिनि सोमावसारनाय गोख्रों खालामदोंमोन आरो गासैबो थाखोनि नौ नारिफोरखौ खौसे खालामनो हादोंमोन । हेफाजाब होयै सोमावसारनाय, आइन मानियै सोमावसारनाय, सत्याग्रह, भारत नागार सोमावसारनाय बायदि हाथियार गैजायि सोमावसरानायनि जाहोनाव ब्रटिस साम्राज्यो सोमावहोनो हादोंमोन । भारत नागार सोमावसारनायनि समाव बिथाङा जा – “माव एबा थै” (Do or Die) होनना स्लोगान होदोंमोन बेयो भारतारिफोरनि थाखाय गेदेर मोन्थोरनि खामानि होदोंमोन ।

            गान्धीजीया हादर बोखावनाय बाथ्रानि जेब्लाबो हेंथामोन । बिथाङा गासैबो हारि माहारिनि गेजेराव खौसेथि, गोरोबलायनाय, फोथायनाय लाबोनो नाजादोंमोन । बिथाङा बुंदोंमोन- “जाय बे हादराव जोनोम लानानै गेदेर गोलाव जादों, जायनि गावनि होननो गुबुन जेबो हादर गैया, हिन्दुस्थान बैसोरनिनो हादर । बे हादराव बेनिखायनो हिन्दुफोरनि बादिनो पार्सी, इहुदी, भारतारि ख्रिस्टान, मुसलिम आरो गासैबो हिन्दु नङि सुबुंफोरनि समान जायगा । हिन्दु आरो मुसलिम बयबो भारतनिनो फिसौ” ।

            हारिनि बिफा महात्मा गान्धीनि बेबादि उदांस्रि सोमावसारनाय, समाज फोसावनाय, सोलोंथाइ, रांखान्थि, राजखान्थि गासैबो बिथिंआव गोबां बिहोमा होलांदों । बिथांनि सान्थौ आरो सामाजाव होलांनाय बिहोमाफोरा जेब्लाबो गोदान जोलैनि थुलुंगा जानानै थागोन । बिथांनि बे आदर्शफोरखौ बुंनानैबो फोजोबनो हाया ।

गोनांथि आरो बाहायथि:

सुबुं समाजा जेसेबांनो सोलोंथाइयाव दावगादों एसेबांनो जेथोगोनां जानानै फादों दानि समआ । गोदान जोलैनि थाखाय मोनफ्रोमबो खामानिया जोबोद जेथोगोनां । समाज बेबस्थायाव जों नुनो मोनदों गथ’ सासेखौ फेदेरना फोलावना मानसि एबा सुबुं सम्फद बानायनाया जोबोद गोब्राब जानानै फैदों दानि समाव । जेराव मेराव फिसा फिसा खोथाफोरखौ लानानै दाङाबाजि, नांलाय-खमलाय, बिजों बियो नायलायनो हाया बायदि बायदि । फोसाव बिजोंफोराव जों नुनो मोनो बायदिसिना जेंनाफोरखौ लानानै हारि माहारिनि गेजेराव बाथ्रा दान्थेलायनाय । दाय गैयि सुबुंफोरखौ गुबुन मायबाफोर सन्देहआव जथुमना आना खाना बुथारनाय । जेरावबो जेन हिंसा ।

बहाबा थांनो नागिरब्लाबो जेन हाजार बार साननानैसो थिरांथा लानो गोनां जायो । थांनानै मोजाङै मोजां गावनि न गिदिंफिननो हागोनना हाया फोथायनो गोब्राब । बुहुमा एसेबां दावगालांनाय समाव जोंनि हादराव बेबादि मोनसे गाज्रि थासारि फैनाया थारैनो दुखु नांथाव । मानोना गोबां बोसोर सिगाङाव बे हादरावनो अहिंसानि फुजारि महात्मा गान्धीया बे हादरखौ अहिंसा, खौसेथि, गोरोबलायनाय, फोथायनाय बायदि मोन्थोर जोंनि समाजाव बिहोमा होलांदों ।

सोलिबाय थानाय थासारिफोरखौ नुनानै साननाय फैयो जेन जोंनि सोलोंथाइ बेबस्थायाव सुबुंथियारि गुनफोरनि बांसिन फोसावनायनि गोनांथि दं । गुदि फरायसालियाव थांनाय समनिफ्राय बायदिसिना सुंबुंथियारि गियानफोरखौ बिसोरनि गोसो गोरबोआव सोनानै होनो हायोब्ला हारिनि बिफा महात्मा गान्धीया नुनाय सिमांखौ जों मोगथाङाव महर होनो हागोन ।

फोजोबनाय:

महात्मा गान्धीया सासे राजखान्थि सानथौगिरिल’ नङामोन बिथाङा सासे गेदेमा सोलोंथाइगिरि, दार्शनिक, समाज सिबियारि । बे गेदेमा सुबुङा सासे थिउरियानि आखाइयाव इं 1948 मायथाइनि 30 जानुवारियाव अरायनि थाखाय जोबथा हां बोयो । बिथाङा दिनै जोंनि गेजेराव गैलिया नाथाय बिथांनि सानस्रि आरो समाजाव होनाय बिहोमाफोरा जुग जुग सुबुं समाजनो अहिंसानि गियान होलांगोन । बुहुमनि गुबुन गुबुन मुंदांखा दैदेनगिरिफोरनि गेजेराव महात्मा गान्धीनि सानस्रि आरो मावथांखिफोरा जेब्लाबो गोहोम गोलैयो । बिथांङा बुंलांनाय माखासे गोनां बोसोनफोरा सोमावसारग्रा हान्जाफोरनि गेजेराव जेब्लाबो गोहो-बोलो होग्रा हाथियार बादि खामानि होयो । बे गेदेमा सुबुंनि मोनसे बेसेन गोसो बुंथिजों लिरबिदांखौ फोजोबनाय जाबाय । बिथाङा बुंदोंमोन –“You must not lost faith on humanity. Humanity is like an ocean, if a few drops of the ocean are dirty, the ocean does not become dirty.”