Who were the 12 heros that landed in the Moon? Who’s footmarks still there on the moon?

Who were that 12 heros that landed in Moon? Who’s footmark still there on the moon?

लोगोफोर जों दिनै गोदान मोनसे आइदा लानानै फैदों । दिनैनि बे आइदायाव जों बिगियानारि मोननैसो जारिमिनारि खारि नोंथांमोननो फोरमायनो सानदों ।

भारतनि अखाफोर मिसननि सन्द्रायान 2 नि लेन्दार बिक्रामजों अखाफोराव मोनहैनायनि 2.1 कि.मि. थानाय समाव बेजों फोनांजाब गैया जायो । मिसनाव थि खालामनाय बादिब्ला लेन्दार बिक्रमा अखाफोरनि खोला गोलार्धआव लेन्द खालामनो गोनांमोन । जेराव दिनैसिम रावबो आगान हैनो हायाखै आरो बिजिरसंनो हायाखै । जोंनि बिगियानगिरि आरो अख्रांमा बिगियानगिरिफोरनि फोरमायनाय बादिब्ला जों 95% जौखोन्दो जाफुंसार जानो हादों । बिक्रमजों फोनांजाब गायसननो हाब्लानो जोंनि हादरा बुहुमनि गेजेरावनो खोला गोलार्धआव आगान हैजेननाय गिबिसिन हादर जागौमोन आरो जारिमिन जानानै थागौमोन । बिक्रम लेण्डारजों फोनांजाब गायसननो सारा बुहुमनि अख्रांमा बिजिरिगिरि आफादफोरनिफ्राय गाहाम हामग्लायथि जोंनि बिगियानगिरिफोरनो होदों आरो बिथांमोनाबो जोंनि बिगियानगिरिफोरखौ हानाय बायदिसिना रोखौमै हेफाजाब जगायदों । भारतनि अख्रांमा बिजिरसंनाय आफाद ISRO (Indian Space Research Organization) खौ हादरनि गासैबो नोगोरारिफोरा गावबा गावनि गोजोन हामग्लायनाय बावहरदों आरो बिथांमोनजों जेब्लाबो दं होननानै गाव गाव जेरै हायो फोरमायथिदों ।

जायखि जायाथों अखाफोराव आगान हैनो हानाय एष्ट्र’नट नील आर्मष्ट्रंनि मुंखौ बयबो मिथिगौ जानो हागौ । नाथाय बिथाङा हारसिं बुहुमनि मोनसेल’ ग्रहसा अखाफोराव आगान हैनो हानाय मानसि नङा । बिथांनि अनगायैबो आरोबाव गुबुन सा11 अख्रांमा बिजिरसंगिरिफोरा बे समायना अखाफोराव आगान हैनो हाबाय आरो जारिमिन सोरजिनो हाबाय ।
जारिमिन रनसायनो हानाय, अखाफोराव आगान हैनो हानाय बै सा 12 सुबुंफोरा सोर सोर ? माब्ला बिथांमोना बैयाव थांजेनदोंमोन ? सोर सोर बिगियानगिरिनि आथिंनि आगान दिनैसिम अखाफोराव दं ।

मि.गो.: अखाफोराव बार, अखा, दै आरि गैयिनि थाखाय बेयाव खनसे गानाय आगान एबा जायखि जाया दागो, मुवा बेसाद बोसोर बोसोर गोलाव सम बेबादिनो थाबाय थायो ।


दिनैनि बे सुंद’ लिरबिदांआव जों बे गेदेमा एष्ट्र’नटफोरनि मुंफोरखौ नोंथांमोननो फोरमायनो नाजागोन

I. नील आर्मष्ट्रं:
इं 1969 मायथाइनि 20 जुलाइयाव आमेरिकानि एप’ल’11 मिसनावथांनाय नील आर्मष्र्टंआ अखाफोराव आगान हैजेननाय गिबिसिन सुबुं । बिथाङा 2012 मायथाइयाव 82 बोसोर बैसोआव जोबथा हां बोयो ।

II. बज एल्द्रिन:
एप’ल11 आवनो थांनाय गुबुन सासेबाव मुंदांखा अख्रांमा बिगियानगिरि बज एल्द्रिन । बिथाङा अखाफोराव आगान हैजेननाय नैथि सुबुं ।

III. पेटे कानराद:
आमेरिका जुथाइ हदरा इं 1969 नि नबेम्बराव एप’ल12 दैथाय हरदोंमोन । जेराव बिगियानगिरि पेटे कानरादआबो बे मिसननि सोद्रोमामोन । बिथांआ अखाफोराव आगान हैजेननाय थामथि सुबुं ।

IV. एलन बीन:
एप’ल12 मिसनाव थांनाय बे गेदेमा बिगियानगिरिनि मुङाबो मख’जाथाव । बिथांआबो अखाफोराव आगान हैनो हादोंमोन । एलन बीन बिथाङा ब्रैथि सुबुं जाया अखाफोराव आगान हैना बैयाव गावनि आगान दोनना फैनो हादों ।

V. एलन शेपर्ड:
अखाफोराव थांनो हानाय सुबुंफोरनि गेजेराव एलन शेपर्डनि मुङाबो मख’जाथाव । इं 1971 मायथाइनि फेब्रुवारि दानाव एप’ल14 दैथायहरनाय जायो । बे मिसनाव बिथांमोना गावसोरनि खामानिखौ आबुङै जाफुंसार होयो । बेनि मिसननि 3 बोसोरनि उनावनो बिथांआ नासानिफ्राय आजिरा लायो । बिथांआ जाबाय अखाफोराव आगान हैजेननाय बाथि सुबुं ।

VI. एडगर मिसल:
अखाफोराव आगान हैजेननाय द’थि सुबुंआ जाहैबाय एडगर मिसल । बिथाङाबो एप’ल 14 मिसननि सोद्रोमामोन ।

VII. डेभिद स्कट:
इं 1971नि आगष्टआव थांनाय एप’ल15 मिसननि सोद्रोमामोन बिथाङा । बे मिसननि 6 बोसोर उनाव आजिरा मोननाय डेभिद स्कटआ उननि समाव सासे मोजां लिरगिरि हिसाबैबो मुंदांखा जानो हायो ।

VIII. जेम्स इरबिन:
जेम्स इरबिना अखाफोराव थांनो हानाय 8थि सुबुं । इं 1991 मायथाइयाव 61 बोसोर बैसोआव बिथाङा रुंसारि जायो ।

IX. जहन यंग:
एप’ल 16 मिसनाव थांनाय जहन यंग अखाफोराव आगान हैनाय 9थि सुबुं । थांनाय 2018 मायथाइयाव बिथाङा रुंसारि जायो ।

X. चार्लस डिउक:
इं 1975 मायथाइयाव थांनाय एप’ल 16 मिसननि बिगियानगिरि चार्लस डिउकआ अखाफोराव आगान हैनाय 10थि सुबुं ।

XI. युजीन सेरनन:
एप’ल 17आव थांनाय बिथांङा अखाफोराव आगान हैनाय 11थि सुबुं । थांनाय इ 2017 मायथाइयाव बिथाङा रुंसारि जायो ।

XII. हेरिसन स्मिट:
एप’ल 17आवनो थांनाय गुबुन सासेबाव बिगियानगिरिया जाबाय हेरिसन स्मिट । अखाफोराव आगान हैनो हानाय बिथाङा जाबाय 12थि सुबुं । बे मिसननि उनाव 1971 मायथाइयाव बिथांआ नासानिफ्राय आजिरा लायो ।

दिनैनि लिरबिदांआव बेखिनानोमोन । नोंथांमोना जोंनि इयुटिउब चेनेलाव जोंनि बे भिदिअखौ नायनो हागोन आरो नोंथांमोना जोंनि भिडिअखौ नायनानै मादि मोनखौ अननानै जाहाथे कमेन्ट खालामनानै फोरमायो । भिडिअखौ मोजां मोनोब्ला अननानै जाहाथे लोगोफोरजों बे भिदिअखौ सेयार खालामना होयो । नायगोदान नोंथांमोना जाहाथे जोंनि चेनेलखौ अननानै साबसक्राइब खालामना लायो । जोबथारनायाव जोंनि बे बिगियानारि सुंद’ लिरबिदांखौ फरायनायनि थाखाय साबायखर बाउनानै दिनैनि लिरथिखौ एसेआवनो दोनथ’नाय जाबाय । गोजोनथों ।।

ट्रेफिक आइन सेफायोब्ला आरो जुलुम खालामोब्ला || New Vehicle Amendment Act 2019

ट्रेफिक आइन सेफायोब्ला आरो जुलुम खालामोब्ला सिगांनिख्रुइ 10 गुन रासिन जुरिमाना होनांगोन

बोसोरफ्रोमबो हादराव जानाय गासै 5 लाख लामानि जाब्रबथाइनि गासै 1 लाख 50 रोजाफ्राम जिउ खहा जानायखौ होफथानाय थांखियै मिरु सरखारा सिगांनि मथर भेहिकल आइनखौ सोदांना गोदानै मटर भेहिकल एक्ट 2019 आव माखासे जोबोद गोरा आइन आरो जुरिमानाजों गोख्रोङै बाहायनायनि थि खालामदों । सेप्तेम्बरनि गिबि साननिफ्राय बे गोदान आइनखौ आबुङै बाहायफुंनाय जागोन ।

पुलिसनि मेनसे राइफोदथाइ बादिब्ला थांनाय बोसोराव सा-सानजा भारतनि गेजेराव आसामा लामानि जाब्रबथाइ हिसाबाव सेथि मासि आवग्रिदों। “An Analytical Glimpse on roads accidents in Assam” आव होनाय बादिब्ला गासै मोन 8248 लामानि जाब्रबथाइ जादोंमोन, बेयाव गासै सा 2966 मानसि जिउ खोमानांदोंमोन आरो गासै सा 7375 सुबुं गाज्रिहै जखम जादोंमोन। आरो बे रिपर्टनि बादिब्ला जोंनि राइजोआ हादरनि जाब्रबथाइ रेंकिंआव 16 मासिआव दं ।

           

फोरमायनो गोनां बाथ्राया बेनोदि राइजोआव गासै मोनफ्रोमबो मोन 100 जाब्रबथाइनि गेजेराव 30 सा सुबुंआ जिउ खोमानांदों आरो 89 सा सुबुं जखम जादों । सानफ्रोमबो गासै सा 8फ्राम सुबुं थैदों आरो 20 सा सुबुं जखम जानांदों गर हिसाबै थांनाय बोसोराव ।

State Director General of Police Kuladhar Saikia बिथाङा मोनसे रिपर्टआव फोरमायनाय बादिब्ला “रुद सेफथि रुलसनि गियाननि आंखालआ मोनसे मख’जाथाव जाब्रबथाइनि जाहोन आरो बांसिन जाब्रबथाइफोरनि गेजेराव नेम मानियै गारि सालायनायनि जाहोनाव बेबादि जाब्रबथाइ जानो मोनो” ।

बे जाब्रबथाइफोरनि गेजेराव 48 जौखोन्दो माहारियारि राजालामायाव जानाय आरो 26 जौखोन्दो राइजोनि गाहाइ लामा आरो गुबुन गुबुन लामाफोराव जानाय जाब्रबथाइ ।

दायो जों गोदानै फोसावजानाय मथर भेहिकल एक्ट 2019 आव होनाय आइन सेफायनाय  जुरिमानाफोरखौ एसे नोजोर होनि-

11)    साधारन जुलुम खालामोब्ला 177 धारा बादियै सिगाङाव 100रांमोन दायो 500रां जाबाय

22)    लामा आइन सेफायोब्ला 177 ए धारा बादियै सिगाङाव 100 रांमोन दायो 500 रां

33)    लाइसेन्स गैयालाबानो गारि थायोब्ला 180 बादियै सिगाङाव 1000 रां दायो 5000रां

44)    लाइसेन्स गैयाब्ला 181 धारा बादियै सिगाङाव 500रां दायो 5000रां

55)    अथ’रिटि बिथोन मानियै 179धारा बादियै सिगाङाव 500रां दायो 5000रां

66)    जौ लोंना गारि सालायोब्ला 185 धारा बादियै सिगाङाव 2000रां दायो 10000रां

77)    रासिन गोसा सालायोब्ला 189धारा बादियै सिगाङाव 500रां दायो 5000रां

88)    पार्मिट गैयै गारि सालायोब्ला 192ए बादियै सिगाङाव 5000रां दायो 10000रां

99)    रोंगौथि गैयै गारि सालायोब्ला 182 बादियै सिगाङाव 500रां दायो 10000रां

110) सिटबेल्ट लागायाब्ला 194बि 100रां दायो 1000रां

111) इमारजेन्सि गारिखौ लामा हगाराब्ला 194 इ बादियै गोदान नेम 10000रां

112) टिकेट लायालासे दावबायोब्ला178बादियै सिगाङाव 200रांमोन दायो 500रां

113) इन्सुरेन्स गैयाब्ला 196 बादियै सिगाङाव 1000रां दायो 2000रां

114) गोसा सालायोब्ला 183 बादियै सिगाङाव 400 दायो 2000रां

115) हेलमेट गानालासै द्राइभिं सिगाङाव 100 दायो 1000रां

116) फनाव रायज्लायना द्राइभिं 177 धारा बादियै सिगाङाव 1000रां दायो 5000रां

बेफोरनि अनगायैबो आरोबाव गोबां गोलाव फारिलाइ दंबावो......

Bodo Article on Mahatma Gandhi

महात्मा गान्धिनि सानस्रि

दानसोरां बर’, कलाइगाव

सिनायथि:

जायखि जाय गोनां आदर्सनि बाथ्रा बुंनो थाङोब्ला गिबिसिन गोसोआव फैयो महात्मा गान्धिनि बाथ्रा । महात्मा गान्धीया बुंदोंमोन “आंनि जिउनि गुबै मोन्थोरनि गिबि आरो जोबथा बाथ्रायानो जाबाय अहिंसा” । हारिनि बिफा महात्मा गान्धिनि आदर्स, सानथौ आरो समाजारि मोन्थोरफोरा जेब्लाबो मोगथाङारि आरो बयजोंबो गनायजानाय । दिनैनि सुबुंखुंथाइ अनसायजानाय बुहुमाव बिथांनि सान्थौफोरा उनगोलैसोनाय माहारिफोरनि जांख्रिथायनि मोनफा मोनफा बाहागो । दुलाराय बुहुमनाङै अहिंसा मोन्थोरजों देरहासाद जानो हानायनि जारिमिन रनसायलांनाय आरो बयजोंबो बे जारिमिना गनायजानाय बे गेदेमा सुबुंनि जोनोम सानजों लोब्बा लाखिनानै “गान्धी जयन्ती” हिसाबै फालिनायजों बिथांनि सानस्रिफोरखौ गोदान जोलैनि गोसो गोरबोआव सोनानै होनो नाजानाय जायो । जाहाथे समाजाव मोनसे गोजोन, खौसेथि आरो जौगाथायनि आबहावा फैयो ।

सुंद’ जिउ जारिमिन:

दानि गुजराटनि पोर’बन्दराव इं 1869 मायथाइनि 2 अक्तबराव भारतनि माहारिनि बिफा महात्मा गान्धीनि जोनोम जादोंमोन । आरो बेनिखायनो 2 अक्तबर सानखौ गान्धी जयन्ती हिसाबै फालिनाय जायो । बिनि बिफानि मुङा करमसान्द गान्धी आरो बिमानि मुङा पुतली बायमोन । करमसान्दनि उन्दैसिन फिसाला महात्मा गान्धीनि आबुं मुङा महनदास करमसान्द गान्धी । उनाव बिथांखौ बयबो “गान्धीजी” एबा “बापुजी” होनना लिंदोंमोन । आरो बिथांनि गेदेमा बिहोमानि थाखाय बिथांखौ “महात्मा गान्धी” होननानै सन्मान होदोंमोन । मख’नो गोनांदि गेदेमा खन्थाइगिरि रबिन्द्रनाथ थाकुरासो बिथांनो “महात्मा” बिमुं होदोंमोन । आरो जवाहरलाल नेहरु आरो सर्दार बल्लबभाइ पेटेला बिथांखौ “बापुजी” होनना मान होदोंमोन ।

गोनां आदर्श:

            बाउसोमनाय आरो अहिंसानि जा मोन्थोर दुलाराय भारतनाङै गोसारनानै दं गान्धीजिया बेखौ फोथांफिनदोंमोन आरो समाज, हादर आरो गासैबोनियाव बाहायदोंमोन आरो देरहासादबो जादोंमोन । बिथाङा बहाबा खनसे रायखांदोंमोन अहिंसा मोन्थोरजों बिथाङा सारा बुहुमाव धोरोम राज्यो गायसननो सिमां रनसायदोंमोन । दिनैसिम बुहुमाव गोजोन आरो सुबुं समाज फुजिग्रा जेसेबां गेदेमा सुबुं जोनोम मोनदों बिथांमोननि रुजुनायाव महात्मा गान्धीनि गियान आरो सोलोंथाइआ बयनिख्रुइबो जौसिन । बिथाङा बुहुमनि नांज्लाय-खमज्लाय, बुथारलाय-सिथारलाय बायदिसिना हिंसायारि समाजखौ अहिंसानि मोन्थोरजों दबथायनो हादोंमोन । दानि समाव बुहुमनि जौगा हादरफोरा सेकेण्डनि गेजेरावनो बुहुमखौ फोजोबनो हानाय हाथियार आरो बायदिसिना राहा दिहोनदों बे समाव महात्मा गान्धीनि अहिंसानि मोन्थोरजोंसो बुहुमखौ रैखा खालामनांगोन आरो गोदान जोलैनो लामा दिन्थिनांगोन ।

            महात्मा गान्धीया खद्दर सि फोसावनाय  आरो आखाइजों दानाय सिनि सायाव गोबां गोसो होदोंमोन । दिनैनि समाव बिथांनि बे नाजानायखौ गोबाङानो जावलियानि बाथ्राना साननो हागौ । नाथाय महात्मा गान्धीया सुबुंथियारि गुनजों बेखौ फोसावनाय आरो मानसिनि गेजेराव सांग्रांथि लाबोनायाव जाफुंसार जानो हादोंमोन । बिथाङा भारतारि नोगोरारिफोरनि गेजेराव सांग्रांथि लाबोना गावनि दिहुननाय आंगो सिजोमफोरखौ बाहायनो बै समावनो थुलुंगा होदोंमोन । बिथांङा गावबो जेब्लाबो खद्दरनि सि-जोम जोमोमोन आरो साधारन मानसिफोरनोबो गावनि असे भारतारि हारिमुखौ फोथांना लाखिनो फोरोंलांदोंमोन । बिथाङा मिथिदोंमोनदि भारतनि 80 जौखोन्दो सुबुंफोरानो गामि ओनसोलनि आबादारि । आबादारिफोरा बोसोराव आबाद मावना बा दान जिरायनो मोनो । बे जिरायनाय समाखिनियाव बिथांमोना दानाय-लुनायाव गोसो होनानै गावबा गावनि रांखान्थियारि हालोदाखौ फोसाबनो हायो आरो जायखि जाया गोनांथिफोरखौ सुफुंनायावबो जाफुंसार जानो हायो । बेनिखायनो बिथाङा खुन्दुं लुनाय, सि दानाय आरो गुबुन गुबुन महर दानाय बायदिसिना खामानिफोरनि सायाव सांग्रांथि लाबोनाय आरो फोसावनायनि सायाव गोसो होदोंमोन ।   

            बिथांनि आइन मानियै सोमावसारनायखौ इंराजीयाव “सिभिल दिसअबेदियेनस” होननानै बुंनाय जायो  । इंराजीनि बे “सिभिल” सोदोबनि ओंथिया जाबाय सोद्रोम । बिथांआ सोद्रोम आरो सोदोमस्रियारि गुनजों भारतारिफोरखौ आइननि बेरेखायै जुजिनो हांख्रायदोंमोन । बिथांनि बादिब्ला मानसिया जेब्लाबो सोद्रोमथियारि जिउ खुंनांगौ, बेखौ दिन्थिनो थाखाय नङा, नाथाय बेयो जोंनि गोसो गोर्बोनि राव जानांगौ, बेनो बिथांनि बोसोनमोन ।

            बिथाङा बुंदोंमोन “फाफखौ मुगै, फाफिखौ दा मुगै” । बिथाङा जेब्लाबो गाज्रि मानसिफोरखौ अनसायदोंमोन आरो बिथांमोनखौ गुबै लामासिम गिदिंफिननो थार लामा दिन्थिनो नाजादोंमोन । खोला आफ्रिका हादराव महात्मा गान्धीखौ खनसे खारनाय ट्रेननिफ्राय इंराजफोरा बोख्लायना गारहारदोंमोन । बिथाङा बे समाव जोबोद दुखु मोनदोंमोन आरो ब्रिटिसफोरा आफ्रिकानि निग्रो मानसिफोरखौ खालामनाय इनाय अनागारनि हेंथायै सोमावसारनायाव बारसोमदोंमोन । गोसो होनो गोनां बाथ्राया बेसोदि बिथांखौ जुलुम खालामनाय बे गुफुरसाफोरनि खैफोदनि समाव नाथाय बिथाङा जेब्लाबो मदद खालामनो उनफिनना थायामोन ।

            बिथाङा गुबुनारि सि नागारनाय सोमावसारनाय फोसावदिंनो आसामाव फैनाय समाव गान्धीजीया गावनि गिबिसिन बिबुंथियाव बुंदोंमोन- “आसामनि राइजो राजा नोंथांमोनखौ आं गोदानै सुबुंखान्थिनि सायाव बाथ्रा बुंनो फैयाखै । मानोना दिनैनिफ्राय बाजि बोसोर सिगाङावनो श्रीमन्त शंकरदेबा सुबुंखान्थिनि सोलोंथाइ होलांदों । आं दायो खालि बिदेशीफोरखौ होखारना हादर उदांस्रि खालामनोसो हादरारिफोरखौ फोजाखांनो आसामाव फैदों”। बेबादिनो बिथाङा सुबुंथियारि गुनजों हादर उदांस्रिनि सोमावसारनायखौ राइजो राजानि सुबुं सोमावसारनायसिम महर होनो हादोंमोन । सैथो आरो अहिंसानि सोमावसरानाय बिथांनि सत्याग्रह सोमावसारनायाव हादरनि नौ नारिफोरनि गोसोआव जेब्लाबो साहस जगायदोंमोन । बेनिखायनो बेसेबांबा गोहो बोलोगोरा गुफुरसाफोरनि हेंथायै आखाइयाव जेबो हाथियार लायालाबानो सोमावसरानायाव बारसोमनो थुलुंगा जगायदोंमोन । बापुजीया हेफाजाब होयै सोमावसारनायनि गेजेरजों हादराव उदांस्रिनि सोमावसारनाय गोख्रों खालामदोंमोन आरो गासैबो थाखोनि नौ नारिफोरखौ खौसे खालामनो हादोंमोन । हेफाजाब होयै सोमावसारनाय, आइन मानियै सोमावसारनाय, सत्याग्रह, भारत नागार सोमावसारनाय बायदि हाथियार गैजायि सोमावसरानायनि जाहोनाव ब्रटिस साम्राज्यो सोमावहोनो हादोंमोन । भारत नागार सोमावसारनायनि समाव बिथाङा जा – “माव एबा थै” (Do or Die) होनना स्लोगान होदोंमोन बेयो भारतारिफोरनि थाखाय गेदेर मोन्थोरनि खामानि होदोंमोन ।

            गान्धीजीया हादर बोखावनाय बाथ्रानि जेब्लाबो हेंथामोन । बिथाङा गासैबो हारि माहारिनि गेजेराव खौसेथि, गोरोबलायनाय, फोथायनाय लाबोनो नाजादोंमोन । बिथाङा बुंदोंमोन- “जाय बे हादराव जोनोम लानानै गेदेर गोलाव जादों, जायनि गावनि होननो गुबुन जेबो हादर गैया, हिन्दुस्थान बैसोरनिनो हादर । बे हादराव बेनिखायनो हिन्दुफोरनि बादिनो पार्सी, इहुदी, भारतारि ख्रिस्टान, मुसलिम आरो गासैबो हिन्दु नङि सुबुंफोरनि समान जायगा । हिन्दु आरो मुसलिम बयबो भारतनिनो फिसौ” ।

            हारिनि बिफा महात्मा गान्धीनि बेबादि उदांस्रि सोमावसारनाय, समाज फोसावनाय, सोलोंथाइ, रांखान्थि, राजखान्थि गासैबो बिथिंआव गोबां बिहोमा होलांदों । बिथांनि सान्थौ आरो सामाजाव होलांनाय बिहोमाफोरा जेब्लाबो गोदान जोलैनि थुलुंगा जानानै थागोन । बिथांनि बे आदर्शफोरखौ बुंनानैबो फोजोबनो हाया ।

गोनांथि आरो बाहायथि:

सुबुं समाजा जेसेबांनो सोलोंथाइयाव दावगादों एसेबांनो जेथोगोनां जानानै फादों दानि समआ । गोदान जोलैनि थाखाय मोनफ्रोमबो खामानिया जोबोद जेथोगोनां । समाज बेबस्थायाव जों नुनो मोनदों गथ’ सासेखौ फेदेरना फोलावना मानसि एबा सुबुं सम्फद बानायनाया जोबोद गोब्राब जानानै फैदों दानि समाव । जेराव मेराव फिसा फिसा खोथाफोरखौ लानानै दाङाबाजि, नांलाय-खमलाय, बिजों बियो नायलायनो हाया बायदि बायदि । फोसाव बिजोंफोराव जों नुनो मोनो बायदिसिना जेंनाफोरखौ लानानै हारि माहारिनि गेजेराव बाथ्रा दान्थेलायनाय । दाय गैयि सुबुंफोरखौ गुबुन मायबाफोर सन्देहआव जथुमना आना खाना बुथारनाय । जेरावबो जेन हिंसा ।

बहाबा थांनो नागिरब्लाबो जेन हाजार बार साननानैसो थिरांथा लानो गोनां जायो । थांनानै मोजाङै मोजां गावनि न गिदिंफिननो हागोनना हाया फोथायनो गोब्राब । बुहुमा एसेबां दावगालांनाय समाव जोंनि हादराव बेबादि मोनसे गाज्रि थासारि फैनाया थारैनो दुखु नांथाव । मानोना गोबां बोसोर सिगाङाव बे हादरावनो अहिंसानि फुजारि महात्मा गान्धीया बे हादरखौ अहिंसा, खौसेथि, गोरोबलायनाय, फोथायनाय बायदि मोन्थोर जोंनि समाजाव बिहोमा होलांदों ।

सोलिबाय थानाय थासारिफोरखौ नुनानै साननाय फैयो जेन जोंनि सोलोंथाइ बेबस्थायाव सुबुंथियारि गुनफोरनि बांसिन फोसावनायनि गोनांथि दं । गुदि फरायसालियाव थांनाय समनिफ्राय बायदिसिना सुंबुंथियारि गियानफोरखौ बिसोरनि गोसो गोरबोआव सोनानै होनो हायोब्ला हारिनि बिफा महात्मा गान्धीया नुनाय सिमांखौ जों मोगथाङाव महर होनो हागोन ।

फोजोबनाय:

महात्मा गान्धीया सासे राजखान्थि सानथौगिरिल’ नङामोन बिथाङा सासे गेदेमा सोलोंथाइगिरि, दार्शनिक, समाज सिबियारि । बे गेदेमा सुबुङा सासे थिउरियानि आखाइयाव इं 1948 मायथाइनि 30 जानुवारियाव अरायनि थाखाय जोबथा हां बोयो । बिथाङा दिनै जोंनि गेजेराव गैलिया नाथाय बिथांनि सानस्रि आरो समाजाव होनाय बिहोमाफोरा जुग जुग सुबुं समाजनो अहिंसानि गियान होलांगोन । बुहुमनि गुबुन गुबुन मुंदांखा दैदेनगिरिफोरनि गेजेराव महात्मा गान्धीनि सानस्रि आरो मावथांखिफोरा जेब्लाबो गोहोम गोलैयो । बिथांङा बुंलांनाय माखासे गोनां बोसोनफोरा सोमावसारग्रा हान्जाफोरनि गेजेराव जेब्लाबो गोहो-बोलो होग्रा हाथियार बादि खामानि होयो । बे गेदेमा सुबुंनि मोनसे बेसेन गोसो बुंथिजों लिरबिदांखौ फोजोबनाय जाबाय । बिथाङा बुंदोंमोन –“You must not lost faith on humanity. Humanity is like an ocean, if a few drops of the ocean are dirty, the ocean does not become dirty.”