Short Life History of Nerson Baro (नेरसन बर’नि सुंद’ जिउ जारिमिन)

नेरसन बर’नि सुंद’ जिउ जारिमिन

(Short Life History of Nerson Baro)

जोनोम:

                नेरसन बर’आ इंराजि 1992 मायथाइनि 13 दिसेम्बराव चेप्टाझार गामियाव जोनोम जायो । बिफानि मुङा रुंसारि सेनि राम बर’ आरो बिमानि मुङा सनदिका बर’ । नख’रनि सोद्रोमा हिसाबै बिसोर साब्रैमोन- बिमा, बिफा, बिब’ आरो नेरसन । उन्दैनिफ्रायनो बिमा बिफाया गावनि नख’रखौ लानानै गोबां सिमां रनसायदोंमोन । नाथाय दुखुनांथाव बाथ्रादि दानसे खावसे दाननि सिगांसो बिफा सेनि राम बर’आ थैलांदोंमोन । खार्जोनि थाखाय बन सिननो सानसे थानायावनो दुखुथिया नख’राव आरोबाव मोनसे दुखुआ साग्लोबफैयो ।

फरायसा सम:

                गामियाव थानाय चेप्ताझार गुदि फरायसालियाव जागायजेननानै गेजेर फरायसालिखौ चेङापथार गोजौ फरायसालियाव फरायहैयो। बेनि उनाव सइकियापारा (काथपरि), मेनापारा, मंगलदैयाव थानाय काथपरि शंकरदेब गोजौ फरायसालियाव फरायहैयो। बेयावनो बियो इंराजि 2011 मायथाइयाव थामथि थाखोआव गोजौ फरायसालिनि जोबथा आन्जादखौ उथ्रियो। बेनि उनाव कलाइगाव हालामाव थानाय कलाइगाव कलेजाव हाइयार चेकेन्दारियाव मुं थिसनफैयो। नाथाय नख’रनि रांखान्थियारि लोरबांथिनि थाखाय बिथाङा आद्रायावनो फरायनायखौ गारनो गोनां जायो ।

समाजारि खामानि दामानि:

                गामिनि संघ चेप्ताझार जोंदाव क्लाबनि बिथाङा सासे आफादारि नेहाथारिमोन । थैनाय सानसिम बिथाङा गामिनि मोजांनि थाखाय साननानै संघनि बायदिसिना खामानि दामनिफोराव जेब्लाबो लोब्बा थायोमोन । एखे रोखोमै बिथाङा गामिनि सामलाय आफादनिबो सासे सोद्रोमामोन । बियो जायखि जाया समाजारि खामानिफोरखौ मावनो मोजां मोन्दोंमोन । मानसि हिसाबै बियो खैफोद आफोदनि समाव गामिनि मानसिफोरखौ हेफाजाब खालामदोंमोन ।

                कलाइगाव कलेजाव फरायफुबाय थानाय समनिफ्रायनो बियो बर’ फरायसा आफाद आरो जायखि जाया सामाजारि खामानि दामनिफोरजों लोब्बा दङमोन । दख’रा आफादनिफ्राय हांख्रायनाय जायखि जाया सोमावसारनाय हाबाफारिफोराव बाहागो लानायनि थाखाय बिथांखौ दख’रानि सिङाव थानाय सोनाब कलाइगाव युनिट कमिटि एबसुनि सोद्रोमानि बिबान होनाय जादोंमोन । बेनिखायनो बियो दुलाराय बर’ फरायसा आफादनि जायखि जाया हाबाफारिफोराव मैखोमै बाहागो लाफैदोंमोन । साननैसो सिगाङाव आलादा राइजो बड’लेण्ड दाबिनानै मावफुंलांनाय गोलाव साइकेल रेलि हाबाफारियाव गामिनिफ्राय लोगोफोरजों लोगोसे बिबो बाहागो लाफैदोंमोन । गामिनि गेजेराव बयबो बिखौ गावसोरनि दैदेनगिरि बादि मानिदोंमोन । बिनि दैदेननायावनो गामिनिफ्राय लाइमोन बिथांमोना बायदिसिना हाबाफारिफोराव बाहागो लाहैयोमोन ।

थैनाय: 

                थांनाय 28 आरो 29 दिसेम्बर, 2016 आव जथायै खुंफुंनाय कलाइगाव दख’रा एबसु आरो आबोफनि फारियै 37थि आरो 17थि बोसोरसालिया जथुमानि कलाइगाव दख’रा बर’ फरायसा आफादनि थान्दै मेलाव गामि आफादनिफ्राय नेरसन बर’ आरो बिनि लोगोफरखौ लाना थान्दै हिसाबै गारि गंसे हमना बाहागो लानो दैथाय हरदोंमोन । गामिनिफ्राय हरनि 7:00 बाजियाव बिथांमोना बाहागो लाहैनो होनना गारियाव गाखोयो । जथुमा जायगा हाबिझार गामिनिफ्राय एसे गोजानाव थानाय मंगलदै भुटियासां लामायाव उनथिंनिफ्राय गोबारै सालायनाय गंसे एल्ट’ गारिया बिसोरनि अट’ गारिनि उनथिं सौदावफैयो । अब्ला समा हरनि 7:30 रिंगाबायमोन । गोबां गोब्राब जखम जानायलाय 108 एम्बुलेन्स लानानै गुवाहटिनि दिसपुर पलि-क्लिनिक हसपिटलसिम दैथाय हरो । नाथाय दुखुनांथाव बाथ्रादि बिथांनि जिउखौ अबंलावरिया अबथिरायै बे संसारनिफ्राय सेख’नानै लाङो हरनि 1:30 रिंगायाव (29-12-2016) ।