बिलोगो
बीरेन्द्र कुमार बर’
लेङाइ
फोरोंगिरि, बालिपारा गोजौ फरायसालि
आहमेदाबादनिफ्राय
120 किल’मिटारफ्राम गोजानाव थानाय गंसे गामि । गामिनि मिथिंगानि महरा जोबोद समायना
। बे गामिनि साहाथिं आरो सानजाथिं टार्सियारि मुगानि गाहाय आरो गोजाम हाजोजों आबुं
जानानै दं । हाजोफोरनि खाथियाव मोनसे गुवार हायेन दं । बे हायेनावनो आशोक पेटेला
गंसे गेदेर हि दारिमिन गायसनदों । गासै बुहुमाव गोजौ मानगोनां हिनि गोनांथिनिथिं
नोजोर लाखिनानै अशोक पेटेल आरो बिथांनि फिसाज्लाफोरा लोगो जानानै बे हि दारिमिनखौ
गायसनदों । बे जायगाया “अशोक
इण्डाष्ट्रियेल भिलेज” मुंजों मिथिजायो ।
दोंसे
गाहाइ लामा साहाथिंनिफ्राय फैनानै खोलाथिं थांदों; गुबुन दोंसे गाहाइ लामा
सोनाबथिंनिफ्राय फैनानै सानजाथिं थांदों । लामा दोंनैया दानस’लायनाय च’कआ
आम्बेदकार च’क मुंजों मिथिजायो । बे च’कनिफ्राय सानजाथिं 200 मिटार थांब्ला गाहाय
लामानि साहाथिं गेदेर “Ashok Cloth Industry” खौ नुनो मोनो । बे हि दारिमिना थानायखाय जायगाया थाबैनो दावगादों । गासै
लामाफोरानो पाका जाजोबदों ।
बे
हालामनि बांसिन लेखागोरों सेंग्रा-सिख्लाफोरा बे हि दारिमिनावनो खामानि मोनदों । बेयाव
गोबां अन्जिमानि सरासनस्रा लेबार, आगर मडेलिं खालामग्रा सेंग्रा-सिख्लाफोरा खामानि
मावो । बेनि अनगायैबो पियन, सकीदार, गाहाय थाखोनि मावखुलि मदद खालामग्रा, गोजौ थाखोनि
मावखुलि मदद खालामग्रा, कम्पिउटार टाइपिष्ट, ष्टेनो टाइपिष्ट, मेनेजार, अफिसार
बायदि बायदि दंथारो ।
सा-खोलायै
गोलाव लारिसे गेदेर बिल्दिं । आधा किल’मिटारफ्राम गोलाव । बेनिनो खोलाथाराव थानाय
मोनसे गेदेर आरो गुवार रुमनि सिङाव प्लेनिं ब्रान्स आरो टेकनिकेल ब्रान्सनि मावखुलि
मदद खालामग्रा साख्रिआवलाफोरा खामानि मावो । गंथाम गंथाम फिसा फिसा ष्टिलनि टेबुलखौ
ज खालामनानै गंसे गोलाव देक्स बादि बानायनाय जादों । बेयावनो साथाम साथाम मावखुलि
मदद खालामग्राफ्रा जिरायो । मावखुलि मदद खालामग्रा साख्रिआवलाफोरनि थाखाय
सा-खोलायै मोनथाम खाम्फायाव मासिफोरखौ साजायना दोननाय जादों । रुमनि खोलाथाराव
इन्जुरनि खाथियाव प्लेनिं अफिसार, एकाउन्टेन्ट आरो जेनेरेल मेनेजारआ सा मुखां
जानानै गुबुनफोर साख्रिआवलाफोरनि मोगा मोगि जाना जिरायो । गुबुन साख्रिआवलाफोरा
अफिसारफोरनिथिं मोखां जानानै खोला मोखां जाना जिरायो । मोनफ्रोमबो खाम्फानि गेजेर
गेजेर दोंसे दोंसेयै गुवार लामा दं ।
साख्रिआवलाफोरा गावनि साख्रिनि थाखो लाना बे मासिफोराव जिरायो । आगसिथिंनि
खाम्फानि गिबि सिरियाव साथाम आइजो कम्पिउटार टाइपिष्ट जिरायो । बेनिने आगदाथिंनिया
रली साहनी । गेजेर खाम्फानि गिबि सिरियाव साथाम हौवा ष्टेनो टाइपिष्ट
जिरायो । बिनिनो आगसिथिंनिया जर्न क्लार्क । मोनसे बाथ्रायाव बुंनो
थांब्ला, रलीया आगदा आखाइखौ फोलावनानै जन क्लार्कखौ लोगो मोनो । बेराफारसेथिं जन
क्लार्कआबो आगसि आखाइखौ फोलावहरब्लानो रलीखौ लोगो मोनो । सम सम सानैनि गेजेराव
जायखि जाया मुवानि होलाय-लालायबो सोलियो ।
बिक्रम
भाटआ सासे लेखा गोरों सेंग्रा, बि.ए. पास । गावनि डिग्रीखौ लाना गोसोआव जेबो
गोग्गानाय गैया । नायगिर नायगिर जेबो साख्रि-बाख्रि मोनियाव अरोरा अट’ चार्भिचिं चेन्टाराव मेकानिक हिसाबै खामानि मावो । बेनिफ्राय मोननाय एसेल’ बेथनजों गावनि बुरै
बिमा, बिनानाव आरो उन्दै बिफंखौ लाफानानै साब्रै सोद्रोमाया खोनोरोखोम सोलियो ।
दिनै अट’ चार्भिचिं चेन्टाराव बारा
खामानिबो गैयामोन । बेखायनो बिक्रम भाटआ गावनि खामानि मावग्रा टुलस मोननैसोखौ
बेगाव सोना लानानै नआव थांनो ओंखारबाय । गावनि गोजाम साइकेलखौ बियो लासै-लासै
सालायलांदों । ओजोंहाय दैज्लां बोथोर जानायखाय अखा खोरोमनायजों अखा गोसा गोसा
फैबाय थादों । नाथाय अखाया दाबो इण्डाष्ट्रियेल भिलेजसिम सफैयाखैमोन । बिक्रमनि
गोसोआव एसेबो गिनाय-बानाय गैया । बियो लासै-लासै थांगासिनो दं । जेराव अखा मोनगोन
बेयावनो लामानि सेराव थानाय जायखि जाया सोरनिबा नआव हाबगोन ।
बे समाव हि दारिमिननि मावखुलियाबो
सुथि जाबाय । गासैबो खामानि मावग्राफोरा खाराव-खारसि नफारसे दावखोदों ।
साफ्रोमनिबो गोसोआव मोनसेल’ साननाय, जाहाथे अखा हानायनि सिगाङावनो न’ मोनहैनो हायो
। माखासेया बायसाइकेल, माखासेया बाइकजों हाखु-दाखु थांनो हमदों । अखा खोरोमनायजों
सोगोमनानै फैबाय थानाय ज्राम-ज्राम हरखाब अखा दाम्ब्रा हानाया साफ्रोमखौबो सिगिदों
। बे समावनो रलीयाबो गावनि स्कुटीजों बिक्रमखौ बारनानै जोबोद गोख्रै सालायलांबाय ।
एसे गोजान लामा थांनायनि उनावनो बिनि स्कुटीथा हरखाब थाद’हैबाय । सेल्फ
स्टार्टारजों स्टार्ट खालामोसो खालामो, नाथाय स्टार्ट जाया । बेनि उनाव जेबो राहा
गोयै जानानै आथिंजों जोनो हमबाय । थेवब्लाबो नाथाय स्टार्ट जायाखिसै । ओजोंहाय बे
समावनो बिक्रमआबो रलीनि खाथि मोनहैबाय । रलीया राहा गोयै जानानै बिक्रमखौ खावलायनो
गोनां जाबाय-
: Uncle, will you please help me?
: Why not! How can I
help you Please?
: आंनि स्कुटीया ष्टार्ट जायाखिसै; एसे नायनानै होयोब्ला
गोजोनगौमोन ।
बिक्रामा साइखेलनिफ्राय ओंखारबाय आरो
रलीनि खाथियाव थानाय स्कुटीखौ एसे नायहैबाय । बे समावनो अखायाबो ज्राम – ज्राम गोलैनो
हमबाय । बेखायनो खाथियावनो थानाय देरा मोनसेयाव बिक्रामा स्कुटीखौ नारना लांनानै
थिखांहैबाय । बियो ष्टार्ट खालामना नायबाय आरो हमनो हाबाय जे नजला जार्म जादों,
कार्बन ज जादों । खुलिनो थाखाय आखाइयाव टुलसबो बारा गैयामोन । गावनि बेगाव थानाय
सरासनस्रा टुलसफोरजोंनो खोनोरोखोमै खुलिबाय । सिरिज पेपारजों नजलखौ साफा खालामखांनानै
फिटिं खालामफिनबाय । बेनि उनावबो नाथाय जेंनाया नागारासै । एक्सेलेटरनि केबलाबो
जनानै दं । बे बारावथ’ खुलिनो थाखाय आखाइयाव जेबो टुलसआनो गैया । गोलाव सम
नाजानायनि उनाव बियो हाथाइजों अरै-अरै केबलखौ खुलिनो हाबाय । जलांनाय गोजाम केबलखौ
गारनानै गावनि बेकाव थानाय गुबुन दोंसे केबलखौ लागायनानै होबाय । स्कुटीया दायो
सालायनो हानाय जाबाय ।
रलीया स्कुटीखौ स्टर्ट खालामना
नायबाय, गासैबो थिगानो दं । बेनि उनाव बियो सिटआव जिरायना लानानै स्टार्ट खालामबाय
आरो गांखं बुब्राबनानै थाब बिरलांनाय दाव बादि स्कुटीखौ सालायलांबाय । गारिखौ
फाहामना होनायनि थाखाय बिक्रमनो गाहाम हामलायथिबो फोरमायलाङासै । बिनि खुगानिफ्राय
फंसेबो बाथ्रा ओंखाराखिसै । “Thank
You” बो होनलाङासै
। बिक्रमा गोसोआव जोबोद दुखु मोनबाय । बियो रलीया थांनाय लामाथिं गोमोहाबनानै गल’ल’
नायबायल’ थाबाय । बियो खालि मोनसेल’ बाथ्रा गले गले गोसोखांबाय थाबाय । थांनोसै
एबा थेंक इयुखौबो होलाङासै ।
“सिबाइ! Thank You खौनो
बुंलांनो हायासै ।।”
गले गले बे मोनसे बाथ्रायानो गोसोआव
फैबाय थानायलाय गावनि टुलस बेगखौबो बे नआवनो बावगरलांबाय ।
गोबां महरगोसा सेंग्रा-सिख्लाफोरा गावनि महर
मुस्रिखौ लाना गोग्गायो । गावनि महर-मुस्रिखौ जोथोन होनायावनो गुबुनखौ माबोरै
बाहायनांगौ, माबोरै अाखल-आखु दिन्थिनांगौ बेखौबो बावगरलाङो । रलीनि बेलायावबो बे एखे बाथ्रा ।
लोगोफोर प्लानिं ब्रान्सआव माथो
सोलिदों एसे नोजोर होनि जों । कम्पिउटार टाइपिष्टफोरा सानसेमानि कम्पिउटारखौ
लानानै मावखुलियाव जिरायनानैनो थागोन ना ? थारैनो थाया । मोनसे समाव साहा, नास्टा,
खाजा बायदि बायदि जानो थाखाय केन्टिनाव थाङो । गुबुन गुबुन लोगोफोरनि बादि रलीयाबो
साहा-नास्टा जानो थाखाय केन्टिनाव थाङो । बियो केन्टिनाव सकलेट, बिस्कुट बायदि
बायदि, जायफोर खाजा जायो बेफोरखौ जन क्लार्कनोबो लाना फैयो । सुबिदा नायानानै
अफिसारआ नुवाजासे सिरि सिरि जन क्लार्कनोबो होयो । जन क्लार्कआबो सुबिदा लानानै
मुवाफोर आजावो । एखमब्ला बाइजोनिफ्राय फैनाय समाव रलीया जन क्लार्कनि बिखुङाव
बुज्रावलाङो । एखमब्ला सानैयाबो गावजों गाव एदावलायो । एखमब्ला रलीया अननायजों जन
क्लार्कनि खर’आव बिलिरना होयो । एखमब्ला जेबो गोनांथि गैयाब्लाबो रलीया जन
क्लार्कनि टेबुलाव आसिजों माइबाफोर खिथिना एदावहरो । जायखि जाया माइबाफोर मुवानि
गोनांथि जायोब्ला नाथाय रलीया गावनि खाथियावनो जिरायनाय आइजो लोगोफोरनियाव
जेब्लाबो नागिरा; थोंजों आगदाथिं गोजानाव थानाय जन क्लार्कनावसो बिहरो ।
क्लार्कआबो रलीनि गोनांथिखौ बुजिना आंखालफोरखौ सुफुंनो नाजायो । क्लार्कआबो
अफिसारफोर गैयि समाव रलीनि सिगाङाव गसंनानै गेदेर-गेदेर लेकसार होयो । एखमब्ला
रलीनि बिखुङाव बुज्रावलाङो ।
दिनै ड्रिमलेण्ड रेस्टुरेन्टआव गासैबो
कम्पिउटार टाइपिष्ट, ष्टेनो टाइपिष्ट बायदि बायदि स्टाफनि खामानि मावग्राफोरजों
लोगोसे रलीयाबो साहा लोंनो फैदों । बिक्रमा सिगांनिफ्रायनो साहा लोंनानै जिरायना
दंमोन । बिक्रमखौ नुनानै रलीआ गावनि स्टाफनि लोगोफोरनि सिगाङाव सिनायथि होनानै
बुंबाय – “बिथाङा बिक्रम । बिथाङा सानसे आंखौ जोबोद मोनसे गेदेर खौफोदाव मदद
खालामदोंमोन । बेखायनो आं बिथांखौ “बिलोगो” महरै मोननो लुबैयो ।” दिनै रलीनि गोसोआ
माबा मोजां जानानै दङमोन । बियो हरखाब बेबादि बुंफ्लांबाय । रलीनि बेबादि
बाथ्रायाव बिक्रमा गिबियाव सासु-मासु खालामनायसै । बेनि उनाव बियो हरखाब नुनो
मोनबायदि रलीनि बिखानि गोथौ अननाया बिनि नील गाबनि मेगन थाइनैयाव बेरखांफैदों ।
रलीया बिक्रमनिथिं नायगार नायगार नायगोमादों । बिक्रमाबो मा जाखौ, बियो गावखौनो
बावगरलांखौ-
तेरा चेहेरा
कितना प्यारा लगता है ।
तिर्छे
तिर्छे तीर नजर के आते है ।।
सिधा सिधा
दिल पे निशाना लगता है ।
तेरे चेहेरा
कितना सुहाना लगता है ।।
सानैआबो गावजों गाव नायगोमोनायसै ।
लासै लासै बे नोजोरा सानैनि गेजेरावा गोथौ महर लाबाय । “हिन्जावजों बोगथाब जायि
हौवा रावबो गैया ।” बिक्रमाबो रलीजों बोगथाब जाबाय । सासे आइजो जुदि सानै हौवाखौ
जावलिया खालामनो हाया हिन्जाव जोनोमानो फेलें । बे अनज्लाइनायनि गोथौथिया बेसेबां;
समासो खिन्थागोन ।
“खाफालनि लिरनाया माब्लाबाबो फेलें
जाया” । इसोरा जायनि खाफालाव दुखु लिरहरदों; बिनि दुखुआ माब्लाबाबो जोबलाङा ।
सानसेखालिनि बिक्रम आरो बिनि लोगोफरा
बासजों दावबायनो थांनायसै । हरखाब मोन्थिस्लाबै बिसोरनि बासा मोनसे गिथाव बाथाव
एक्सिदेन्ट जाबाय । बे एक्सिदेन्टआव बिक्रमनि आगदा आखाइया गाज्रियै बायबाय । उनाव
बिनि आगदा आखाइखौ हास’ना गारनो गोनां जाबाय । थाबायनो थाखाय दंफांनि आथिं थोंसे
लागायना होनाय जाबाय । बिक्रमनि जिउआव जेरैथिंबो खोमसिया साग्लोबजोबबाय । बियो
सानावनो खोमसिसि नुनो मोनबाय । बियो मा राहाजों गावनि बुरै बिमा, बिनानाव आरो
बिफंखौ फोथांना लाखिगोन बेखौ सानै सानै राहा मोनै जायो । अट’ सारभिसिं चेन्टारनि
सासे साधारन मेकानिक हिसाबै जाय बेथन मोनदोंमोन बेजोंनो बियो खोनोरोखोम नख’रखौ
सामलायदोंमोन । गुबुन फालांगि मावनोबो आखाइयाव रां गैया । जोबथारनायाव लाजिनायखौ
गारनानै बिबायनायनि थांखिखौनो लानो गोनां जाबाय बियो ।
दानिया गामि-गामि, नख’र नख’र, दखान-दखान
बिबायनायानो बिनि सानफ्रोमबोनि खामानि । गेजेर गेजेर अरोरा अट’ चार्भिसिं
चेन्टारावबो बिनो थाङो । लोगोफरा अननायजों रां थाइसे थाइनै होयो । बियो
गोजोननायजों आजावो । मालाबा ड्रिमलेण्ड रेष्टुरेन्टावबो बिनो थाङो । बेयावबो
लोगोफोरा गोसोजों जा होयो, बेखौनो लायो । रावनिबो खाथियाव जेबो दाबि गैया । जा मोनो
बेयावनो गोजोनो । माब्लाबा रलीखौबो लोगो मोनो, माबाफोर मोनगोन साननानै जोबोद आसा
लाना बिनि खाथियाव थाङो । भिक्षा मोननायाथ’ गोजाननि बाथ्रा, मानसिखौ नुब्लानो थाखोमायोसो
। माइबाफोर जाग्रा मुवा बायना आखाइयाव थायोब्ला बिक्रमा बिगोनसो सानना एरखोमायो ।
मेसें सफैबाय । गोबां दिननि उनाव
हरखाब सानसेखालि बिक्रमआ रलीखौ ड्रीमलेण्ड रेष्टुरेन्टआव आरोबाव लोगो मोनफिनबाय ।
रलीया आपेल जाबाय थादोंमोन । रलीखौ नुनानै बिक्रमा जोबोद गोजोनबाय आरो बिनि
खाथियाव आवगायलांबाय । रलीनिथिं आगदा आखाइखौ फोलावहरनानै गुरैयै बुंनायसै- “रली,
आंनोबो माबाफोर एसे होगोन नामा ?” रलीया जोबोद खाब्राङै फिन होबाय- “जेबो गैया” ।
बिनि रावआव बिक्रमा गोसोआव जोबोद दुखु मोनबाय । बियो रलीखौ आंगो साननानैसो
बिहैदोंमोन । नाथाय रलीया बे बाथ्राखौ बुजियासै, मोन्दाङासै । “Human mind is Changeable” मानसिनि गोसोआ गोस्लायो । रलीनि गोसोआबो सोलायबाय । बेखायनो सादु-संतफोरा बुङो- “लोगोनि
सिनायथिया खैफोदावसो” । बिखा गोनांनि खाथियावसो बिनो नांगौ; बिखा गैयैनि खाथियाव
नङा । बिखा गैयिआ जेबो होनो हाया । रलीयाबो बिक्रमखौ दिनै बेदिनो खालामबाय ।
बिक्रमआ दुखुजों रेष्टुरेन्टनिफ्राय ओंखारनायसै । गावनि गोरबो सिंखावनाय दुखुआव
बिनि दोंसे मेथाइ ओंखारबाय-
आंनि खाफालनि
बिलितनाया........”
रलीनि बेबादि आखुखौ नुनानै आंनि
गोसोआवबो मोनसे सोंथि जाखांफैबाय – “थारैनो बे आइजोहा बिमनि बिका दङना गैया ?”
बिक्रमा सासे बिबायारि जायाजासे सासे महरगोसा सेंग्रा जानायमोनब्ला; रलीनि बिहोथाइया
मोजोमसे मोजोमसेयै गोग्लैगोमोन । नाथाय दुखुनांथावभाबै सासे बेंगुरा मानसि जानायनि
थाखाय बिनि बिहोथाइया आखाइ मुथुमनिफ्राय ग’आखिसै । सासे
नेहाद बिबायारिनो भिक्षा (अनसुंथाइ) होनो जायनि गोरबोआव एसेबो सुबुङारि अननाय
गैया, बिनिख्रुइ अननाय गैयि अन्थाइ बिखा सुबुं बे बुहुमाव रावबो गैया ।
“अच्छा
दोस्त एक फूल की तरह होता है
जिसने
खुद को भी मदद करता है,
दुसरों
को भी मदद करते है ।
दोस्तों
की जिन्दगी में जब गिरावट आते हैं,
तब
हेफारत की नजर से देखना अच्छा नहीं हैं ।
ये
बहूत बुरी बात है, ये गुनाह है ।।”
N.B.: This article was published in
the Mouth Piece “Alari” Ist issue of Kalaigaon Anchalik Committee All Bodo
Women Welfare Federation on the occation of its Annual Conference held at
Chengapather.
