BWISAGU (बैसागु)

बैसागु

बिसाल बसुमतारी

भेरगाव (बेहेरगामि)

            बैसागुआ बर’ हारिनि देरसिन रंजानाय फोरबो । मोन्थिस’ हायि समनिफ्रायनो बर’फोरा बैसागुखौ गावनि आंगो फोरबो महरै फालिबोदों आरो दासिमबो फालिबोगासिनो दं । बे रंजानाय बर’ हारिमुनि फैलाव दिहिंनि हासार गोनां हायाव रज’फैनाय मोदोमफ्रु हायना गोनां बारसे फामि बिबार बादि । बैसागुआ फैनाय लोगो लोगो बोराय बेन्थ’, सेंग्रा सिख्ला, बयनिबो मोदोमा रंजानायनि गोसोजों जांख्रिखाङो । जाउनाव बैसागुआ बर’ हारिनि आमाय थख्ल’-बिखानि खावसे ।

            सैथ्र दाननि जोबानाय साननिफ्राय आरो बैसाग अखाफोरनि सेथि साननिफ्राय बैसागो फोरबोखौ खुंनाय जायो । गोदो गोदाय बर’फोरा बे रंजालि बैसागुखौ दानसेहालागै खुङोमोन होननानै खोनायो । नाथाय सम थांनायनि लोगो लोगो मिथिंगानि महराबो दलाम गुरस्लायबाय लोगोसे बोथोराबो सोलायबाय गोदो दानसेहालागै खुङोमोनब्लाबो दा सानस्नि सिमहालागैल’ खुंनाय नुयो । बैसागुनि गिबि सानखौ मोसौनि, नैथि सानखौ मानसिनि, थामथि सानखौ सैमानि, ब्रैथि सानखौ अमानि, बाथि सानखौ दाउनि, द’थि सानखौ हांसो फारौ आरो गुबुन दाउमा-अमाफोरनि आरो जोबथा सान एबा सानस्निखौ आलासि बाय बाहागिफोरखौ लोगो हमनायनि ।

            गोदो गोदायनिफ्रायनो बर’हा हाल एवनानै जाग्रा हारि आरो दासिमबो हाल एवनानै जाबोगासिनो दं । जाउनाव मोसोखौ माइनाव महरै सानबोदों । जायनि नआव मोसौ गैया बिनि नआव माइनाव गैया होननानै साननाय आरो गोदोनि बर’ सुबुंफोरा फोथायनाय दं । थार बाथ्राखौ बुंनो थाङोब्ला बैसागुआ आबादजों सोमोन्दो गोनां गाहाइ फोरबो ।

            बेनिखायनो हाल एवनानै जाग्रा बर’ हारिनि गेजेराव मोसौआ गोथार । बेनिखायनो बैसाग बोथोराव मोसौनि गाहामनि थाखाय आनन गसाइनियाव आर’ज गाबनानै बर’फोरा मोसौखौ सिगां सिगां दैसायाव लांनानै थुखैयो । गोदोनि फोथायनाय बादियै थुखैनायनि सिगां लख्रा, मोसाफोरा जाहाथे उदां हगारनाय समाव मोसौफोरखौ जानो हाया आरो गिनानै खारो, बेनि थाखायनो मोसौफोरनि मोदोमाव फाख्रा सिख्रा गाब गाहोनाय जायो । बेनिफ्राय लाव-फान्थाव आरो हालदै गोथांखौ साखा-साखा हानानै माखासेमानि लो बिदां सुनाय जायो औवानि थेवोलजों । थुखैनाय समाव जाहाथे मोसौनि जिउवा गोलाव जायो, बेनि थाखायनो गोथार राइदों, बिजौ आरो लाउ-फान्थावनि माला सुनानै मोसौ गलियाव दोनो । बेनि उनाव मोसौफोरखौ होलांनायाव हाफ्लेखाना लानाय लाव-फान्थाव, हाल्दै आरो आरखारैखौ मोसौफोरनियाव सारस्रि-सारस्रि दिगिलेवा एबा थाराइ गाज्लि एबा मोखोनानि लावथिजों बुयै बुयै मेथाइ खनो-

लाव जा फान्थाव जा

बोसोर बोसोर एर हान्जा हान्जा

बिमानि खिथेर बिफानि खिथेर

नोंसोर जागोन हालुवा गेदेर ।

बिमा गाइदे बादि दाजा,

 बिफा बलद बादि जा ।

बारि खनायाव दं एम्बु बंग्ला,

बिब्दि जा गिदिर जांगिला ।

दिधलति मोसौनि मुलि,

दुदालि जागोन गाइ खुखिलि,

दिधलति लाउथि, ख्रि ख्रि गान्थि,

जोंनि मोसौआ जागोन बलद जाति ।

जानाय नङा गाइदे थेफ्रा,

मारखा जागोन फालोनि बेद्रा ।

            बेनि अखानायै बैसागुनि सेथि साना मानसिनि बैसागु । नखरनि बावैसो थैलांनायफोरखौ ना बेदर एवानानै बाउनाय जायो । गोथैफोरनि मुं लिंनानै बाउओ- “फिसा फिसौ नाहा मैहा थांब्ला अरायबो इनाय खालामनो मोनानाय नङा” होनना । बेनि उनाव बर’नि आंगो नेम सेजौ से बिदनि मैगं संनाय जायो । जायखौ जों दाउ बेदरजों सङो आरो बेखौ खुंखा बुंनाय जायो । बेखालि नआव नुजाफैनाय साफा सानै सुंबुंफोरखौ खुंखा जाहोनाय जायो । रंजालि बैसागुआव गोदानै हाबा जानाय एबा जुलि गोदानफोरा गावनि फिसाइखौ लानानै बिमा-बिफानि नआव आलासि जाहैनाया जोंनि बर’ माहारिनि गेजेराव सोलिबोनाय गोदो गोदायनि खान्थि । बेनि अनगायैबो गामिनि बोराइ, बुरैफोरा न’-न’ गिदिंनानै बेदर खुंखाजों संनाय ओंख्रिजों औवानि हासुंआव जौ लोङो । गोदोनि खान्थि बादियै दाबो रंजालि बैसागुआव जौनि फुख्रि, बेदरनि आलि बायदि नेम खान्थि सोलिया ।

            बेनि अखानायै सैमानि बैसागो । बैसागु बहर । गामानि गासैबो सेंग्रा-सिख्लाफोरा बे सानखालि खाम, सिफुं, जथा, बिङि, थारखा, गंगोना, जाबस्रिं लानानै गामिनि दाबसे गिदिंनानै न’-न’ हाबनानै  बैसागुनि बायदि मैया मेथाइ रोजाबनानै ज’ ज’ मोसायो । बेजों लोगोसे गामि दाबसेआ खाम, सिफुं, सेरजानि रिंनायजों सोगोमखाङो ।

            बिब्दिनो बर’फोरा सिगां मोसौनि, बेनिफ्राय मानसिनि, अमानि, दाउनि आरो गुबुन दाउमा, अमाफोरनि बेनिफ्राय बाय-बाहागि खुरमाफोरजों नुजालायनाय, सानलायनाय, जलायनाय, रंजालायनाय बैसागु खुङो । बिब्दिनो गुबुन गुबुन मुंनि महरै बैसागुखौ खुंनाय जायो । जोबथा सान एबा सान स्नियाव बैसागुखौ फोजोबनाय जायो । रंजालि बैसागुआ जोबो सानस्नियाव, बर’फोरनि स्नि तिथि थामहिनबा गोखा, गोखै, गोबाब बायदि मैया रोखोमनि मैगं हाग्रानिफ्राय खांनानै जायो । बेफोर जादों – माथि गालदाब, बेसर दाबा, थाराइ गाज्लि, राइदों बिजौ, लाफा साइख’, दिंदिङा, बुरै थखन, माइसुन्द्रि, सिब्रु थारा, दौस्रेम. दिंखिया बायदि बायदि ।

            बैसागुखौ खालि बर’फोराल’दि फालियो बिब्दि नङा । गुबुन गुबुन हारि फोरबो फालियो । गासैबो हारिनि फालिनायनि नेमा आलादा । रावनियाबो एखे एबा समान नङा । जेरै- कामरुपआव बैसागु दानाव बरमानि थान फुजा खालामनाय जायो । मिसिंफोरा “आलि आयलिगां” होननानै बैसागुखौ गुबुन नेमजों फालियो । बैसागुनि जोबथा सानाव बयबो गसाइ थानाव ज’ जायो आरो गोदोनि नेम बादियै सिब्राइ सिब्रुइ एबा राववनिजों गोदान  हाबा होनाय आरो बिसोरनि थांखियै हाबा होनाय आरो बिसोरनि थांखियै बाउनाय रायनायनि मुङै फुथालि हाबाया आबादजों सोमोन्दो गोनां बैसागु बोथोराव खांनाय फोरबो ।

            बर’फोरा फोथायनाय दंदि बोसोरनि सिगां सानाव एबा मानसि बैसागआव नांज्लायनो खमलायनो मोना । बेनिखाय दाबो बे नेमखौ फालिनाय जायो । बैसागुनि सानाव खामफ्लाइयाव जनोबो हामा होननानै बर’फोरा फोथायो । मानोना बे समाव खामफ्लाइयाव जयोब्लानो बिमा बिफानियाव जनाय जायो होनना साननाय दंमोन । जोबनायथिं रावना रावनि एबा फुथलि हाबा होनानै सानस्नियाव बैसागु खुंनानै रंजा बाजा जायै लोङै बोथोरनि बैसागुखौ फोजोबनाय जायो । बेबादिनो बर’ माहारिनि बैसागुखो फालिनाय जायो आरो इयुनावबो बैसागु फोरबोखो फालिगोन होननानै मिजिं थियो । ❏❏❏

N.B.: This article was published in the 8^th issue “Rongjali” the mouth piece of Kalaigaon Bisungra Harimu Afaad in the occation of its Rongjali Bwisagu Celebration, 2017 at Gandhi Bakari, Kalaigaon.