Article in Bodo language

“गोदान रांखान्थिनि नेमा घुस हारिमुखौ बन्ध खालामगोन”

दानसोरां बर’, एम.ए.

थं: बतियामारि, कलाइगाव, बद’लेण्द

जानबुं: 98590-15838

इ-मेइल: 1stdansw@gmail.com

                हादर दरसेनि जौगासारनाय, गोग्लैलांनाय आरो इन्टारनेसेनेल सोमोन्दोआव बेनि रांखान्थिया जेब्लाबो गोहोम गोग्लैयो । बेनिखायनो हादरनि रांखान्थिया जेब्लाबो गुबुन हादरारि रांखान्थिजों जेब्लाबो बादायलायनो हानाय मोनसे थासारियाव थानांगौ । अब्लासो बे हादरनि जौगानाय थाजोर जानायनि लामा थायो । रांखान्थि आयदानि सायाव बेबादि मोनसे गुवार आयदानि सायाव बिजिरनांगौब्ला, मायबाफोर फोसावनांगौब्ला  आयदानि सायाव गोथौ मोनसे बिजिरसंनाय थानांगोन । जायखि जायाथों आंनि नोजोरजों, गुबुयै समाजखान्थियारि नोजोरजों  आं बे आयदानि सायाव  एसे गावनि मोन्दांथिफोरखौ फोरमायनो नागिरनाय जाबाय ।

                इंराजि 2016 मायथाइनि 8 नबेम्बर खालारा भारत हादरनि जारिमिनाव मोनसे गोसोखांथाव सान जानानै थासिगोन । मानोना घुस हारिमु, गोसोम फैसा (काला धन), अगेन लामाजों आरजिनाय रांफोरखौ दबथायनो आरो होबथानो नागिरनाय मोनसे सोमावसारनाय । बेनि थाखाय बि.जे.पि. सरखारखौ जों जेब्लाबो साबायख’र बावहरो । गोबांआ साननो हागौ बेनि गेजेरजों ब्लेक मानि एबा अगेन राहाजों आरजिनाय लाख-लाख थाखाफोरखौ माबोरै होबथानायनि राहा जानो हागौ ? बेनि सोमोन्दै गाहायाव एसे सावरायनो नागिरनाय जाबाय-

                भारतनि मेलेमजिबि बिथांमोना भारत सरखारनि बे हाबाफारिखो बाख्नायदों आरो मोनसे जोबोद साहसिनि खामानि जादों होनना फोरमायदों । थारैनो बेयो मोनसे साहसनि बाथ्रा मानोना 8 नबेम्बर, 2016 मायथाइ हरगेजेरनिफ्राय 500 रां आरो 1000 रांनि नटखौ बन्ध खालामनाय जादों । बेनि गेजेरजों जायफोर लुबैसुला राजखान्थिगिरि, सरखारि माउख’नि बिबानगिरिफोरा गावजों लाखिनाय अगेन थखा-फैसा, धोन-दौलदनि थाखाय मेगन मेसेबना थाखा फैसानि सायाव उन्दुनो हानाय नङा । भारतनि दानि गाहाइ मन्थ्रि श्री नरेन्द्र मुदीनि फोसावनाय बादिब्ला हादरनि बे थाखानाय 500/1000 रांखौ गोदान नेम बादियै इनभेलिद एबा खामानि गैयै होनना फोसावनाय जाबाय ।

             

                भारतनि बि.जे.पि. नि हादरारि आफादगिरि अमित चाहनि बादिब्ला – “मोदी जी का यह निर्णय देश को काले धन के अभिशाप से मुक्ति दिलाने में एक मजबूत एवं निर्णायक कदमें है ।

                काले धन के खिलाफ इस कथोर कदम से जहाँ एक तरफ गरीब और मध्यम बर्गीय लोगों को सीधा लाभ मिलेगा वही दूसरी और ईमान्दार आयकर के साथ न्याय होगा ।

                काले धन के माध्यमसे चलने वाली  आतंकवादी गतिविधियों, द्राग माफिया, हवाला और जाली नोटों पर लगाम कसने के प्रधान मंत्री मोदी जी की इस मुहीम में आईये हम सब मिल कर सहयोग करें ।” बिथांनि बादिब्ला बे हाबाफारिया ब्लेक मानिनि हेंथायै मावफुंनाय सार्जिकेल एटाक (Surgical Attack against Black Money) ।

                भारत हादरा गंसे आबाद गाहाय हादर । आथिखालसिम बेनि बांसिन जौखोन्दो सुबुंफोरा आबादनि सायाव सोनारो । सा भारत आरो खौला भारतनि आबाद मावनाय बिखान्थिजों रुजुना नायोब्ला नाथाय सा-सानजा भारतनि बांसिन  आबादारिफोरानो  आथिखालसिम दोरोंङारि खान्थिजोंनो आबाद मावनाय नुनो मोननाय जायो । गुबुन फारसेथिं जदिउबा बे ओनसोला मिथिंगायारि सम्फदनि रुजुनायाव दोहोनि नाथाय बे सम्फदफोरखौ मानसिनि गोनांथि बादियै खामानिनि सुलुं बानायनो एबा सरकारनि फार्सेनिफ्राय बेबादि खामानि दानायनि राहा लायैनि थाखाय गुबुन राज्योनि रुजुनायाव दाबो उन गोलैसोनानै थानो गोनां जादों । बुनो थाङोब्ला जोंनि सा-सानजा भारतासो गुबुन राज्योफोरनि रुजुनायाव बांसिन दोहोनि । मानोना बेयो फिसाहैब्लाबो दुलाराय भारतबर्षखौनो दैदेननो (Representation) हानाय मोनसे थासारिखौ जों नुनो मोनो । बे ओनसोलाव गोदो गोदायनिफ्रायनो थागिबि हारिफोरजों लोगोसे गुबुन गुबुन भारतनि ओनसोलनिफ्राय थाफैनाय गुबुन गुबुन हारि माहारिजों दाजानाय । हारिमु, राव, थुनलाइ, दोहोरोम, आसार-खान्थिनि बेलायाव बेयो गमामायैनो गोमोथाव जायगा ।

                बे समायना सा-सानजा भारतनिनो दरसे थेलेबलेब फिसा ओनसोल जोंनि बद’लेण्द राइजोआ । मिथिंगानि महर मुस्रिजों बेयो दरसे मुहिहोनो हानाय जायगा । बेनि थागिबि बर’ सुबुंफोरनि नारा-नाथा नाजानायजों 2003 मायथाइनि 10 फेब्रुआरियाव बेयाव थागिबि हारि जौगाखांनाय आरो ओनसोलनि जौगाखांनायनि थाखाय गाव-खुंथाइ जारगुं खुंथाइ राहा भारत सरखारा फोसावो । बेनि गुबै थांखिया बे ओनसोलनि राव, हारिमु, थुनलाइ, बेनि ओनसोल, सोलोंथाइ, रांखान्थि, समाजखान्थि गासैबो बिथिंआव जौगाखांनाय लाबोनाय । बेयो जोंनि मोनसे संबिजिरारि गुदि मोन्थाइ । दिनै जोंनि सुक्तिया  13 बोसोर बारलांबाय । नाथाय दुखुनि बाथ्रा गोबां बिथिंआव दासिम जेबो जौगानायनि रेगाखौनो नुनो मोनासै । आब्ला मिरु सरखारनिफ्राय बोसोर बोसोर फैबाय थानाय फैसाफोरा बहा थांदों ? सोरनियाव दं ? मबे जायगायाव मावथांखिफोरखो लादों ? कक्राझार ? चिरां ? ना बाक्सा एबा अदालगुरियाव ?

                बि.टि.सि. जानाय समनिफ्राय जोंनि हारियाव लोगोसे जोंनि ओनसोलावनो मोनसे थिकादार थाखोनि हारिनि जोनोम जायो । गासैबो ओनसोलनि जौगानाय बायदिसिना खामानिनि बिबाना बिथांमोननियाव । संबिजिरारि भाबेबो बिथांमोना ओनसोलनि आरो हादरनि जौगासारनायनि थाखाय खामानि मावनायनि गेदेर बिबान दं । राजखान्थियारि गोहोआबो बिथांमोननि आखाइयाव । बेनि थाखाय जायखि जाया जौगाथायारि खामानिफोरखौ बिथांमोना मावनो थाखाय सुबिदा मोनो । नाथाय मालाबा दुखु नाङो, हारिनि राव, थुनलाइ, सोलोंथाइ बायदिसिना जौगाहोनो नारा-नाथा सोमावसारनानै गावसोरनि  आगोमा जिउखौ बोलि होनाय मुंख्लं जोहोलाव-जोहोलावजोफोरनि सिमांआ माब्ला आबुं जागोन ! बिथांमोना थ’ राजखान्थियारि दैदेनगिरि बिथांमोना जोंनि ओनसोलाव फैनाय जौगाथायारि थाखा-फैसारफोरखौ लुथिथों होनना सिमां रनसायाखैमोन ! बिथांमोननि सिमांआ बद’लेण्दनि थिकादारफोरा निखावरि लेखा-रोङि आइ-आफामोनखौ सुसि सुसि थाखा-फैसानि एमाव उन्दुनो हाथों होनना नङामोन !

                दिनै नुनो मोन्दों बुहुमाव जायफोर जौगाखांनाय हादर (Developing Country) बे हादरफोरावनो लुथिनाय हारिमुआ (Corruption Culture) बांसिन । नाथाय आंनि बादिब्ला जोंनि बद’लेण्दआव गुबुन जेबो मेगनाव नांथाव बिथिंआव जौगाखाङाखैब्लाबो नाथाय लुथिनाय हारिमुआव आबुङैनो जौगासारदों । दिनै बे मोनसे थाखोनि सुबुंफोरा राइजो-राजानि थाखा फैसारखौ जेरै हायो एरै लुथिदों । अफिस-कासारि जेरावनो थां, सासे पियनखौनो लानानै गाहाइ अफिसारसिम साफ्रोमबो थाखाल’ सिनायो । बेफोरनो जाबाय जोंनि ओनसोलनि ब्लेक मानि ।

                दिनै हादराव गोदान रांखान्थिनि बेबस्था फोसावनाय लोगो लोगो गोसोआव रंजानाय मोनदों । मानोना बेनि गेजेरजों राइजो राजानिफ्राय लुथिनाय गासैबो अगेन सम्पथिफोरा दैयाव थांजोबगोन । मोजां खामानियाव बाहायनो सानदोंबा सिरि सिरि रानना होनांगोन राइजो राजानो, गाज्रि गोसोबा सावनानै साय हांगार खालामनांगोन । साधारन सुबुंफोरा दिनै रंजादों, हादरखौ लुथिग्राफ्रा नाथाय जौ लुंनानै बाब्राबदों ।

                इंराजि 2016 मायथाइनि 10 नबेम्बरखालि गाहाइ मन्थ्रि नरेन्द्र मुदीनि फेसबुक पेजआव बिथांआ मोनसे गावनि मोन्दांथि सेयार खालामदों-  “So happy to learn that citizens are expressing their gratitude to bankers and getting notes exchanged in a patient and orderly manner. It is also heartening to learn that people are actively volunteering to help senior citizens withdraw money and exchange their currency.

            Such warmth, enthusiasm and the patience to bear limited inconvenience for a greater good is indeed very heartening. I assure you the Govt is unwavering in its effort to create an India that is corruption free and fruits of development touch every citizen.” बिथांआ बेबादि नोगोरारिफोरखौ साबायख’र बावहरदों । थारैनो बेयो जोंनि थाखाय मोजां बाथ्रा ।

।। जै बद’लेण्दनि जै ।।