India created a global record yesterday with the highest single-day rise of nearly 79,000 Covid-19 cases

30 आगष्टआव हादरनि सावस्रि आरो नख'र जौगाथाय बिफाना क'रोना भाइरास मोननाय आरो थैनाय सुबुंनि खारि फोसावदों। हादराव 24 घन्टायाव 78,761 सा सुबुं क'रोना बेरामनि सिकार जादों।

बुहुमाव करोना महामारिनि गिख्रंथाव साग्लोबसारनाय समनिफ्राय थामहिनबा जानुवारि दाननिफ्राय दिनैसिम बुहुमनि मोनबो गंसे हादरावनो सानसेयाव 78,761 सा सुबुंनि क'रोना पजिटिभ मोननाय जायाखैमोन।

दिनैसिम सानसेयाव फोसाव जानाय क'रोना पजिटिभ मोननाय बे रेकर्डआनो बुहुमनि गेजेरावनो बयनिख्रुइबो बांसिन। बेनि सिगाङाव 16 जुलाइयाव आमेरिकायाव 77,299 सा सुबुंनि क'रोना पजिटिभ सानसेयाव मोननाय जादोंमोन।

मख'जाथावदि दिनैसिम बयनिख्रुइबो बांसिन क'रोनानि गोहोम गोलैनाय हादरफोरनि गेजेराव बुहुमनि गेजेरावनो भारतआ थामथि जायगायाव दं। आमेरिका आरो ब्राजिलनि उनावनो भारतनि मुंआ दं। नाथाय जा गोख्रैथिजों हादराव बेरामिनि अन्जिमाया बांबोदों जानो हागौ जोबोर खम समनि गेजेरावनो भारतआ ब्राजिलनिख्रुइ सिगां सारियाव सहैगोन।

दासिम आमेरिकायाव 61,39,078 सा सुबुंनि क'रोना मोननाय जादों आरो सा 01,86,855 सुबुंआ थैनो गोनां जादों। गुबुन फारसेथिं ब्राजिलआव 35,42,733 सा सुबुंनि क'रोना पजिटिभ मोननाय जादों आरो 1,20,498 सा बेरामिया जिउ गारनांदों। भारताव दिनैसिम सा 35,42,734 सुबुंनि क'रोना पजिटिभ मोननाय जादों आरो 63,498 सा सुबुंनि क'रोना बेरामाव जिउ ख'हा जादों।

आसामावबो क'रोना बेरामिनि अन्जिमाया जोबोर गोख्रैयै बांनो लादों। राइजोआव सा 1,03,794 सुबुंनि क'रोना पजिटिभ मोननाय जादों आरो गासै सा 289 सुबुंनि जिउ ख'हा जादों।