Matric आन्जादनि फिन्नाय बिलाइखौ माबोरै नायफिननो || How to do Rechecking ...

धृटिराजनि इयुन थांखिया मा?

बावैसो फोसावखांनाय गोजौ फरायसालि

जोबथा आन्जादाव आसामनि गेजेरावनो सेथि मासि आवग्रिनो हानाय

धृटिराजनि इयुन थांखिया मा?

दानसोरां बर’

6 जुनाव फोसावनाय 2020 मायथाइनि गोजौ फरायसालि जोबथा आन्जादनि आसामनि गेजेराव सेथि मासि आवग्रिनो हायो धृटिराज बास्तब कलिताया। जोंनि खाथियावनो थानाय दरं जिलानि बानेयकुसि गामिनि नब कुमार कलिता आरो तुलुमनि कलितानि फिसाज्ला धृटिराज।

धृटिराजआ बिगियान आयदायाव गोजौसिन फरायसालिलाव फरायनानै इयुनाव फाहामथाय बिगियान एबा मेदिकेल इदायाव फरायनो गोसो दं होनना खौरां मोगा मोगियाव फोरमायो।

“समनि सायाव गोसो होआमोन, फरायनायनि सायाव गोसो होयोमोन। हायार चेकेन्दारियाव बिगियान आयदायाव एदमिसन लानानै मेदिकेल लाइनाव थांनायनि गोसो दं”। खौरां बिजोंनि सिगाङाव एरैबादि बुङो धृटिराजआ।

बरमपुर जातीय बिद्यालयनि फरायसा धृटिराजआ पदुमपुखुरी हाय स्कुल आन्जाद मिरुनिफ्राय आन्जाद लिरदोंमोन। जोबोद मेलेमगोनां बे फरायसाया जिउनि गोनांथार आन्जादाव गासै 595 नम्बर मोननो हायो। बियो असमीया आयदायाव 98, इंराजीयाव 99, गोरलै सानखान्थियाव 100, गोरलै बिगियानआव 100, समाज बिगियानआव 98 आरो एदभानस सानखान्थियाव 100 नम्बर मोननो हायो।

मेट्रिकआव फिथाइ लाथिख’, थाबैनो बन्ध जानगोन राइजोनि बे 17 फरायसालिफोर, मा जागोन फरायसा फरायसुलि आरो फोरोंगिरिफोरनि?

थांनाय 6 जुन, 2020 आव फोसावनाय मेट्रिक आन्जादनि फिथाइआव राइजोनि गासै गं 17 फरायसालिफोरनि रावबो सासेबो फरायसाया उथ्रिनो हायासै। थामहिनबा फरायसालिनि रिजाल्टनि फिथाइया लाथिख’। उनखालिनो बे फरायसालिफोरखौ 24 घन्टानि गेजेराव बन्ध खालामनो बिथोन होयो सोलोंथाइ मन्थ्रि हिमन्त बिस्व सर्माया। फरायसालिफोरखौ बन्ध खालामनाय जागोनब्लाबो फरायसा-फरायसुलि आरो फोरोंगिरिफोरखौ खाथिनि फरायसालिफोरजों सरजाबदेरनायनि थिरांथा लादों सोलोंथाइ बिफाना।

          गुबुन गुबुन खौरां बिजोंफोरनिफ्राय बुथुमनाय बादियै बे गं 17 फरायसालिफोरनि फारिलाइखौ फोसावनो नागिरनाय जादों। बेनि गं ब्रै फरायसालिया जरहाटनि, गंबा डिमा-हासावनि, गंथाम कार्बि आंलांनि, गंनै कासारनि आरो गांफाहै कामरुप रुरेल, धुबुरी आरो नगाव जिलानि। बेनिनो डिमा हासावनि गंबा फरायसालिफोरनि मुंफोरा जाबाय- 1) हेदिंमा हायस्कुल, केपरे हाइस्कुल, लेइरि हायस्कुल, खारथं हायस्कुल,सीमटुइलुं हायस्कुल। जरहाटनि गंब्रै फरायसालिनि मुंफोरा जाबाय- बालिगाव गिटार्थी भकेसनेल गोजौ फरायसालि, जरहाट बेजबरुवा गोजौ फरायसालि, गेजेर आहटगुरि गोजौ फरायसालि, नामदेउरि गर्लस गोजौ फरायसलि।

कार्बि आंलंनि हामरेन गार्लस गोजौ फरायसालि, कयलामाटि आर्लइं रुपट गोजौ फरायसालि, रंसेक इंराजि गोजौ फरायसालिनि रावबो सासेबो फरायसायानो पास जायासै बे बोसोरनि मेट्रिक आन्जादाव। कासारनि फिथाइ लाथिख’ जानाय गंनै फरायसालिया जाबाय- हेपि भेलि गोजौ फरायसालि आरो सुनाव गोजौ फरायसालि। बेनि अनगायैबो कामरुप रुरेलनि समरियानि कस्टुरबा गान्धी बालिका बिद्दालाय आरो धुबुरीनि मोहन लाल सोभासारिया हिन्दी एकादेमी गोजौ फरायसालिनि फिथाइया लाथिख’।  

कलाइगाव हालामनि बर’ बिजों फरायसालिफोरनि मेट्रिक आन्जादनि फिथाइ आरो नै बोसोरनि मोनसे रुजुनाय

कलाइगाव हालामनि
बर’ बिजों फरायसालिफोरनि

मेट्रिक आन्जादनि फिथाइ आरो नै बोसोरनि मोनसे रुजुनाय

दानसोरां बर’

दिनै जों बावैसो 6 जुनआव फोसावखांनाय गोजौ फरायसालि जोबथा आन्जादनि एबा HSLC आन्जादनि कलाइगाव ओनसोलनि बर’ बिजोंनि फरायसालिफोरनि फिथाइया माबादि बेनि सायाव सुंद’ लिरबिदांखौ जथायनाय जादों। बेयाव कलाइगाव दख’रा बर’ फरायसा आफादा बुथुमनाय खारि बादियै जों बेयाव फोरमायनो नाजानाय जादों। आसा खालामो राइजो राजा नोंथांमोना फरायनो मोजां मोनगोन।

गिबि गिबियावनो मेट्रिक आन्जादखौ उथ्रिनो हानाय फरायसा फरायसुलिफोरखौ गोसो गोरबोनिफ्राय गोजोन हामलायनाय जासिहरबाय आरो जाय फरायसा फरायसुलिफोरनि रिजाल्ट मोजां जायासै एबा उथ्रिनो हायासै बिथांमोना गोसोआव दाहा खालामनाङा। खनसे खननै फेलें जानायाव जेबो जाया। बेनिफ्राय जों गोबां गोदान गोदान बाथ्राफोरखौ सोलोंबावनोसो हायो आरो गोबां रोंगौथि जायो। गोबां फरायसा फरायसुलिफोरा गिबि खेब एबा नैथि खेब गोजौ फरायसालि जोबथा आन्जाद फेइल जानानै उनाव हायार चेकेन्दारि, डिग्रि आरो जौसिन फराफोराव गोबां मोजां रिजाल्ट खालामनाय नुनो मोनदों। फेलें जानाय जेबो ख’हा जाया नाथाय नाजाफिनालासे फेलेंथिखौनो गोबाथाबना थानायासो गोबां ख’हा खालामो। जिउआव बयबो दावगालां आरो नाजानानै गावनि जिउखौ दाफिननो गोदानै दानिफ्रायनो जागायजेनदो।

लिरबिदांखौ जागायजेननाय सिगांआवनो थाब थाब मोननैसो गोनांथार बाथ्रा फोरमायनानै लानाया मोजां जागोन। कलाइगाव ओनसोला गुबुन गुबुन हारि माहारिनि गोजोन थिलि। बे ओनसोला अदालगुरि जिलानि मोनसे गोनांथार फालांगिनि मिरु। बे ओनसोलनि बर’ गामिफोरनि सोरगिदिं असमीया आरो गुबुन गुबुन हारिफोरा बेंखननानै दं। मोनसे गोनांथार बाथ्रा बे ओनसोलनि बर’फोरा गोबां बोसोर सिगांआवनो असमीयाफोरनि गोहोमाव गावनि आंगो राव बर’ रावनि सोलायै असमीया रावखौ बजबनानै लादोंमोन। दिनैसिम बर’ सुबुंफोरा असमीया रावजोंनो रायज्लायो। नाथाय फरायनाय, दोरोंआरि दोहोरोमारि आसार खान्थि फालिनाय, बर’नि हारिमु आरो मेल मिथिंफोराव बर’ रावखौनो आंगो राव हिसाबै बाहायदों आरो गावसोरनि राव, हारिमु, थुनलाइ आरो गावनि आंगो सिनायथिखौ लानानै गोग्गानाय मोनो। बर’नि गुबुन गुबुन सोमावसारनायफोराव बे ओनसोलनिफ्रायबो मैखोमै बाहागो लानाय जादोंमोन आरो दिनैसिम हारि दानाय गुबुन गुबुन खामानियाव बे ओनसोलनि सुबुंफोरा नांथानानै दं।

कलाइगाव हालामाव गासै गंबा बर’ बिजोंनि फरायसालि दं। बेफोर जाबाय 1) सानजोरां गोजौ फरायसालि, 2) चेङापथार गोजौ फरायसालि, 3) चेङापारा गोजौ फरायसालि, 4) बालिपार गोजौ फरायसालि आरो 5) भुञाखाट गोजौ फरायसलि।

बे फरायसालिफोरनि गेजेराव बालिपारा गोजौ फरायसालि आरो चेङापारा गोजौ फरायसालिया दिनैसिम भेनसार हिसाबै दं आरो थैनायनि लामायाव। मख’जाथाव बाथ्राया जाबाय दिनैसिम बे बर’ बिजोंनि फरायसालिफोरखौ फोथांना लाखिनो सरखारनिफ्राय जेबो राहा लानाय नुनो मोननाय जायाखै। ओनसोलनि मेलेमजिबि, माहारियारि आफाद आरो थुनलाइ आफादफोरा गोबां नाजासेयावबो दिनैसिम बे फरायसालिफोरा जेबो सरखारि अनसुंथाइ मोननाय नुनो मोनाखै ।

फै दायो जों 2020 मायथाइयाव गोजौ फरायसलि जोबथा आनजादनि फिथाइफोरा माबादि नायनानै लानि

मेट्रिक आन्जाद, 2020

दायो जों बे बोसोरनि फिथाइजों थांनाय नै बोसोरनि मेट्रिकनि फिथाइजों रुजुनानै नायनिसै

 थाम बोसोरनि बे रुजुथाइनिफ्राय जों मा नुनो मोनखौ? फार्स दिबिजननि बाथ्राखौ दोनथ’नानै पास पारसेनटेजखौ जुदि नायो प्रभेनसियालाइज एबा सरखारि फरायसालिफोराव रिजाल्ट एबा फिथाइया आप दाउन जानायखौ नुनो मोननाय जादों आरो भेनसार फरायसालिफोरनि हालोदआ जे जोबोद गाज्रि बे बाथ्राखौ मिथिनो हानाय जादों आरो बे भेनसार स्कुलफोरनि थाखाय थाबैनो जेबो राहा लायाब्ला बे ओनसोलनिफ्राय जानो हागौ अरायनि थाखाय बिजोंआ गोमोर लांगोन।

आसाम सरखार आरो बर’ नङिफोरा जेब्लाबो बर’ हारिनि उन गोलैसोनाय आरो बर’ हारिनि ख’हा जानायखौनो लुबैयो। बे हिसाबै दा गोदान BTR खुंथाइ गोहोआव जाय राजखन्थि दोलोआनो फैयो बिथांमोना जाहाथे सुक्टिखौ आबुङै बाहायफुंनानै बे बर’ बिजोंनि फरायसालिफोरखौ फोथांना लाखिनो आरो जौगाहोनो जाहाथे खामानि मावो। नङाब्ला बे ओनसोलनिफ्राय बर’ रावआ अरायनि थाखाय गोमोरलांगोन। मानोना खाथि खालायाव बर’ फरायसालियानो थायाब्ला गुबुन बिजोंआव मुं थिसननो गोनां जागोन आरो बर’फोरखौ गाज्रि मोनग्रा गुबुन हारिनि मानसिफोराबो गुबुन गुबुन सोलो लागोन।

ना:गो: लिरबिदांखौ फरायना मोजां मोनोब्ला अननानै कमेन्ट खालामना फोरमायनो खावलायबाय।