गोदै ना गोखा फिथाइ मोनजानो लुबैयो जिउआव?
-Danswrang Baro, MA
Assistant Teacher, Kabirali ME School
Mobile: 98590-15838
सुबुं
माहारिनि जिउआ माला मा जायो रावबो मोनथिया । बेनिखायनो जोंनि जिउखौ थास’ बिलाइनि
दैजों रुजुनाय जादों । आरोबाव बेनिखायनो संसाराव जिउ थासान्दियावनो जों जा हायो
जेसेबां हायो सान-हर गुनारि मोजां खामानिफोरखौ मावलांनो नाजानांगौ । जाय मोजां
खामानिनि फिथाइखौ जों थैनायनि उनावबो मोनजानो हायो । नङाब्ला थैनायनि उनाव जेसेबां
मोदैनि बाना बोहैहोब्लाबो बै मोदैनि बानाजों गोदै फिथाइफोरखौ जों बोखारना लाबोनो
हानाय नङा ।
मानसिनि आयुआ गोलावबो नङा आरो
जोबथा समखौबो जों जेब्लाबो हमस्लाबनो हाया । गरै लावसिन आयु हिसाबै जौसे बोसोरसो
मानसिया जोरो । बे जौसे बोसोरखौ जों गाहाइयै मोनथाम बाहागोआव राननो हायो।
बाहागोफोरा जाबाय-
क) फरायसा सम (Learning)-
(जोनोमनिफ्राय 20-30 बोसोरसिम)
ख) आर्जिनाय सम (Earning)- (20-30
बोसोरनिफ्राय 50-60 बोसोरसिम)
ग) भुग खालामनाय एबा भुगिनाय सम (Enjoying or
Suffering)- (50-60 बोसोरनिफ्राय थैनाय समसिम)
फै
जों मानसि जिउनि बे मोनथाम समफारिनि सोमोन्दै एसे गुवारै सावरायदिनि-
क) फरायसा सम (Learning):
सुबुं
जिउनि बयनिख्रुइ रंजा-बाजा, गोजोन-खुसिनि समानो जाबाय फरायसा सम । जोनोमनिफ्राय
देरनायनि उनाव फरायसालियाव मुं थिसनहोनाय समनिफ्राय बे समफारिया जागायजेनो । बे
समाव जों संसारनि माया, बायदिसिना गोमोथाव सोमोथाव बाथ्राफोरखौ हमदांना मोना ।
गासैबो बाथ्राफोरा जोंनि थाखाय गोदान । गुदि फरायसालियावनो फरायसाफोरा गावनि जिउनि
गुदि आयदाफोरखौ मोजाङै सोलोंना लानांगौ । जायनि जागायजेननाया मोजां बियो जेब्लाबो
जिउआव दावगालांगोनखा । बिमा बिफाया बे समाव जेब्लाबो गावनि गथ’नि गुनारि जौगानायनि
सायाव गोसो होनांगौ । बिमा बिफा, बिगोमाया जेब्लानो गोसो होगोन अब्लानो गथ’आ मोजां
जागोन । हानायमानि होजोबनांगोन गियान सुबुंथिनि गुननि सायाव । बे समाव गेदेमा
सुबुंनि जिउनि मोन्थोर (बानि)फोरखौ गथ’ गथाइनि गोरबोआव सोना होनो हानांगौ। जिउनि
लामायाव देरहासाद जानो ड°ए.पि.जे. आब्दुल कालामनि बादि गेदेमा
सुबुंफोरनि बाथ्राफोरखौ फोरोंनो हायो। बिथांआ बुंदोंमोन- “सानफ्रोमबो फुंआव
गावखौ जेब्लाबो सिरिब्रै बाथ्रा बुं: 1. आं बयनिख्रुइ साबसिन, 2. आं बेखौ मावनो
हागोन, 3. गसाइया जेब्लाबो आंजों दं, 4. आं जेब्लाबो देरहासाद, 5. दिनैनि साना
आंनि सान”
बेनि
उनाव गोजौ फरायसालिनि समफारिया सुबुं जिउनि बयनिख्रुइ गिथाव बाथाव सम (Danger)। मानोना सिमां फुरियाव गोसो बिरग्लांनाया जागायजेनो बे समनिफ्रायनो ।
बिजिरनांगोन बिगोमाया आरो गुवारै बेखेवना थख’ थख’ फोरमायनो हानांगोन गावनि गथ’
गथाइफोरखौ । नङाब्ला बिजौ गैयि दालांआव खारसनना गोथौ दैयाव फिनज्राब गोग्लैहैनोबो
हागौ । बे समफारियाव फोरोंगिरि बिथांमोना फोरोंनाया गोरलै रावै बयबो बुजिनाय बादि
बाथ्राफोरखो बेखेवो । बेनि थाखाय बे बाथ्राफोरखौ मोजांङै मोन्दांनो हायोब्ला जिउआव
जेब्लाबो दावगालांनायाव सुबिदा जायो ।
कलेज
समा खायफा फरायसाफोरनि थाखाय जिउ दानाय सम आरो खायफा फरायसाफोरनि थाखाय गावनि
जिउखौ खहा खालामनायनि सम । सुबुं माहारिनि गोदै आरो गोखा फिथाइ मोनजानाया बे
समफारिनि बिबान रुजुननायनि सायाव बांसिन गोहोम गोग्लैयो । जायानो गावनि बिबानखौ
मोजाङै मोन्दांना रुजुननो सोलोंदों बिनो जिउखौ हमदांनो हादों । जाया हायाखै बियो
नाथाय जिउनि गिबि खेबनि गेलेनाय बादायलायनाय बाहागो लानायाव जेननो गोनां जादों।
हायोब्ला फरायसाफोरा देरहासाद सल’नि सोलायै जेननायनि सल’फोरखौसो बांसिन फरायनांगौ।
मानोना जेननाय सल’निफ्राय जों माबोरै देरहासाद जानो हायो बेनि गुमुरखौ मोन्थिनो
हायो। जे.के.रावलिंनि सोमोन्दै बयबो मिथियो। बिथांनि बिजाब “हेरि पटार”नि थाखाय
बिथांआ सारा बुहुमावनो सिनायजानाय। बे बिजाबखौ सेबखांना दिहुननो थांनायाव बिथांङा
गा12 खेब फोसावगिरिजों रिजेक्ट खालामजादोंमोन। बेबादिनो अमिटाभ बसन बिथांआबो गेदेर
गारावनि(Heavy Voice) थाखाय All India Radio नि थाखाय जानाय इन्टारभिउआव रिजेक्ट खालामजादोंमोन। बिल गेटस बिथांआ
गावनि बुहुम फरायसालिनि फरायनायखौनो आबुं खालामनो हायासै। बेनिखाय जेननाय-देरहानाया
मानसि जिउआव थाखायो। बेनि उनावबो देरहानायनि लामा थायो। लामाखौ संदानना सायख’ना
लानो रोंनांगौ। जेननायफोरा जायानो बिजिरबाय बिसोरनो फिन देरहासाद जानायनि लामायाव
फिन गाखोबाय।
ख) आर्जिनाय सम (Earning):
फरायनाय समा
जोबखांनाय उनाव बे समा जागायजेनो। गावनि
जिउ-नख’र गासैबो बिबानखौ बानसननानै बे समफारियाव जेब्लाबो मोनसे गिलिद बिबान रुजुननांगौ
जायो। लामा आन्दायनानै फरायसा समनि सिमांफुरियाव थाबथाहैब्ला नैथि खेब जिउनि
गेलेनायाव बाहागो लानायावनो जेननो गोनां जागोन।
मानसिनि आर्जिनाया
सोनारो गावनि गोसो आरो सोलोनि सायाव। जिउआव जों गोबां लामाफोर मोननो हायो। जायखि जाया
मोनसेखौ गोसो होनानै मावलांब्लानो देरहानो हायो। देरसिन मावनो गोसोब्ला जेब्लाबो
फरायसा समाव थांखि लानानै आवगायोब्लासो जाफुंसार जानो हायो। जिउआव जों माब्लाबा
गावनि थांखिसिम सहैनो दैमानि दाहारनि उल्था फारसे सानस्रिनो गोनां जायोब्लाबो
सानस्रिनो नांगोन। मानोना बेयो गावनि जिउ। गावनि जिउखौ दानाया गावनिनो बिबान।
गावनि जारिमनखौ लिरनायाबो गावनिनो बिबान।
जायखि जाया खामानिनि
फिथाइखौ जागायजेनोब्लासो मोननो हायो। जागायजेनालासे गोबां लुबैयोब्ला दुखुसो
मोननोगोनां जायो। बे समफारियाव सिमांफुरियाव आन्दायहैनाय मानसिनि अन्जिमाया बारा
जोंनि समाजाव। मा खामानि मावगोन? मादि संसार जागोन? मादि नख’र सामलायगोन? बेफोर
बाथ्राफोरखौ सिमां राइजोआव सुखु लाना मोगथांआव गोजोनग्लायनाय लायोब्ला जिउनि इयुन
समाव दुखु जारला भुगिनो गोनां जायो। मानसिया सिमां नुनांगौ आरो बे सिमांफोरखौ
जेब्लाबो मोगथांनि महर होनो नाजानायासो गेदेर बाथ्रा ।
ग) भुग खालामनाय एबा भुगिनाय
सम (Enjoying or Suffering)-
जिउनि जोबथा समफारियाव
जों सिगाङाव मावबोनाय समफारिनि फिथाइफोरखौ मोनजानो हायो। थारैनो जों मा मावदोंमोन?
माब्ला जागायजेनदोंमोन? मोजां ना गाज्रि? गासैबो हिसाब निकास खालामनायनि समानो
जाबाय बे बाहागोआ।
फरायसा सम आरो आर्जिनाय
समखौ जायानो गोरलैयै ओरैनो भुग खालामदोंमोन। बिथांमोना नाथाय जेब्लाबो बे
समफारियाव दुखुनि बाना बोहैहोनो गोनां जायो। जाया सिगाङाव दुखु जारला भुगिनानै
गावनि जिउखौ दानानै लायो बिसोर बे समफारियाव रंजा बाजा गुबुन गुबुन समाजारि
खामानिफोरखौ मावना गोजोननाय लानो हायो। दोहोरोमारि खामानि मावनायनि बेयो जाबाय
साबसिन सम। संसारनि मायानि सोमोन्दै मोनथिनो जों बे समफारियाव खामानि मावनो हायो।
नख’र दानाय, समाज दानाय, बायदिसिना गामि आरो ओनसोलनि खामानिफोरखौ गोसो होसारनानै
मावोब्ला मुजां मुं आर्जिनो हायो।
जोंनि बर’ समाजाव गुबैयै कलाइगाव हालामाव जों
समाजारि खामानि दामानि मावनाय मानसिफोरखो बारा नुनो मोननाय जाया। समाजखान्थि,
सोलोंथाइ, हारिमु, दोहोरोम, राव आरिनि सायाव जों गोबां उन गोलैसोनानै दं। जों
गुबुन जौगा हारिफोरनि रुजुनायाव जेबो गैया। बेनिखायनो समाजनि सायाव गोसो होनानै
खामानि मावनाया बयनिबो बिबान । नेप’लियाना बुंदोंमोन- “The world suffers a lot. Not because of the
violence of bad people. But because of the silence of good people.” मोजां मानसिफोरा समाजखौ फोसाबनायनि बिबान लानांगोन। गावबा गावनि गामियाव
सोलोंथाइनि आबहावा सोरजिनाया गामिनि सुबुंफोरनिनो बिबान। गुबुना फैनानै बेयाव
मोजां आबहावा सोरजिना होया। दोहोरोमारि खामानि दामानियाव जोंनि बर’फोरा जेब्लाबो
उन गोलैसोनाय। बर’नि गुबै दोहोरोम बाथौ दोहोरोमा हिन्दु दोहोरोम नङा होनना
जेब्लाबो मेल मिथिंफोराव जोंनि दोहोरोम फोसावगिरि बिथांमोना बुंबाय थायो। बाथौ
दोहोरोमखौ हिन्दु खालामनायसो जादों। नाथाय नुनो मोननाय जायो गावनि आंगोखौ गारनानै
जेब्लाबो मालायनिखौसो मोजां नुनाय मोनसे हारिमु जोंनि समाजफोराव जाखांदों। गावनि
बायदिसिना दोहोरोमारि खामानिफोराव जोंनि मानसिफोरा गोसो गैयि मोनसे भाब दिन्थियो।
नाथाय गुबुन हारिनि बायदिसिना फोरबोफोराव फालो फालो ओंखारलाङो। बेयो जोंनि गावनि
आंगो हारिमुखौनो बदनाम खालामनाय जादों । बेफोरनि सायाव बाथ्रा बुंनायनि बिबाना
जोंनि ओनसोलनि मेलेमजिबि, समाज सिबियारि बिथांमोननि ।
आब्दुल कालामनि बादिब्ला जों मोनथाम इंराजि R मानिनांगौ । बेफोरो जाबाय- Respect for self,
Respect for others, आरो Responsibility for all your actions. गावनि फारसे सन्मान, गुबुननि फार्से
सन्मान आरो गावनि गासैबो खामानिनि फार्से बिबान बानस’नांगोन। बेनिखायनो बर’ हिसाबै
जोंनि गोबां खामानि मावनो गोनां दङ। गेरेमसा बर’ माहारि दानांगोननि सिमां लाना
बयबो खामानि मावोब्ला जों जेब्लाबो देरहासाद जागोन । फरायसाफोरा हारि दानाय थांखि
लाना फरायनांगोन, राजखान्थिगिरिफोरा राजखान्थि खालानांगोन हारि दानायनि थांखिजों।
राव हारिमु, दोहोरोम, समाजजों लोब्बा थानाय गासैबो खामानिफोरखौ मावलांनांगोन
हारिनि सार्थआव। बयबो हारि दानायनि बे गिलिद बिबानखौ बानस’नांगोन।
मानसि जिउनि समफारि हिसाबै समनि खामानि सामवनो
मावनो सोलोंनांगोन। मोजां फिथाइ मोनजानोब्ला जागायजेननांगोन। दिनैनो
जागायजेनोब्लासो बेनि फिथाइखौ जों गाबोन समफोर मोनजानो हागौ। नाथाय जागायालासे
सासेया सासेखौ सोंखारिब्ला गासैबो फेलें थांगोन। मानसि जिउनि जोबथा बुब्लियाव
जेसेबां गोसोब्लाबो जेबो मावनो हानाय नङा। जिउआव माब्लाबा गोब्राब समनि मोगा मोगि
जानो हागौ। बेयो गाव मावनाय माबा मोनसे गोरोन्थिनि थाखाय नङा। बे गाव मावनाय मायबा
मोनसे मोजां खामानिनि थाखायबो जानो हागौ।
