कलाइगावनि बर’ हारिमुआव गुबुन हारिमुनि गोहोम

कलाइगावनि बर’ हारिमुआव गुबुन हारिमुनि गोहोम

कलाइगाव हालामाव गं 50 निख्रुइ बांसिन बर’ गामिफोर दङ । बे ओनसोलनि बर’फोरा गोदो गोदायनिफ्रायनो बे ओनसोलाव हाग्रा सेफायना न-बां लुनानै गामि गायसनदोंमोन । नाथाय समनि फाख’नाव बर’ गामिफोरा गावसोरनि राव- हारिमुफोरखौ खोमाना लानो गोनां जादों ।बेनि बांसिन गामिफोरानो बाथौ फुजियारि । गंसेल’ ख्रिष्टियान दोहोरोम मानसि थानाय गामियाबो बे हालामावनो दं । बेनि अनगायैबो गुबुन गुबुन दोहोरोमखौ आजावनाय मानसिफोरबो गोबां अनजिमानि दं । बेनि अनगायैबो बर’ फोलेरनि दालाइसा हारिफोर जेरै – राभा, गार’, सर’निया कसारी बाइदि हारिनि मानसिफोराबो बे ओनसोलाव गोदो गोदायनिफ्रायनो राइजो जागासिनो दं । गुबुन थालांनायफोरा असमीया, बाङाली, मुसलिम, कलिता, बामुण, राजबंसी बायदि बायदि ।

गाहायाव मोननैसो मालाय हारिमुनि गोहोम गोलैनायनि सायाव सावरायनो नागिरनाय जाबाय:

हारिमु:

बर’फोरा गावसोरनि गावबा गावनि राव, थुनलाइ, हारिमु थानाय मोनसे आबुं हारि । गोदो
गोदायनिफ्रायनो बर’फोरा गावसोरनि हारिमुखो अनसायबोदों आरो हारिमुनि जौगासारनायनि
थाखाय खामानि मावबोदों । नाथाय समनि बुब्लियाव जों नुनो मोनदोंदि जोंनि बे ओनसोलनि हारिमुआव दलामैनो गुबुन हारिनि हारिमुआ गोहोम गोलैबोदों । बेनिबो गोबां जाहोनफोर दं । जायफोरखौ ओनसोलनि गागि लिरगिरि आरो समाज सिबियारि बिथांमोना बिजिरसंदों आरो हारिमुखौ फोथांना लाखिनायनि थाखाय खामानि मावबोदों ।

दिनैनि बर’फोरा गुबुन हारिनि हारिमुखौ अनसायबोनायनि मोननैसो बिदिन्थि आं फोरमायनो नागिरदों –

दोहोरोमारि बायदि हारिमुआव मालाय हारिनि हारिमुआ गाज्रियैनो गोहोम गोग्लैबोदों । जेरै होनोब्ला दुर्गा फुजाया जोंनि बर’ माहारिनि फुजा माब्लाबाबो नङामोन । नाथाय बर’फोरखो बे मालाय दोहोरोमारि फुजाखौ दलामैनो अनसायनाय आरो आजावनायखौ नुनो मोननाय जादों । दुर्गा फुजानि बोथोराव बर’फोरखौबो फुंङावनो थांनानै ज’ ज’ थुगि हैनाय नुनो मोननाय जादों । नाथाय जों बर’नि बायदिसिना दोहोरोमारि फुजा आरो आसार खान्थिनि मायबाफोर हाबाफारियाव बे ओनसोलनि बर’फोरखो बाङाइ अनजिमानिल’ बाहागो लाहैनाय नुनो मोननाय जायो । बेयो नाथाय जोंनि थाखाय मोजां लैखोन होनना जों साना । बेनि अनगायै आरोबाव गोबां गुबुन गुबुन दोहोरोमारि आसार खान्थिफोर जेरै – रास पुजा, लोखि पुजा, गनेस पुजा, दिवालि, कालि पुजा बायदि बायदिफोरानो गाहाइ ।

राव:

रावनि सायावबो बे ओनसोलनि सुबुंफोरा गुबां ओनगोलैसोनाय । गोबां समाव माहारियारि आफादफोरा बायदिसिना सांग्रांथि मेलनि हेफाजाबजों कलाइगाव हालामनि राइजो राजफोरखो सांग्रांथि लाबोनो थाखाय हाबाफारिफोर लाबाय थानाय नुनो मोननाय जादों । नाथाय बेनिफ्राय जोंनि रावखौ दासिम बर’ गामिफोराव आबुङैनो बाहायहोनो हानाय खालामनो हानाय जायाखै । बांसिन मानसिफोरानो बर’खौ मोजांङै बुजियो आरो रायज्लायनोबो हायो । नाथाय बिथांमोननि असमीया राव रायलायनाय हुदा जालांनायनि थाखाय बांसिन सुबुंफोरानो असमीयाजोंसो रायलायनो साबसिन मोनो । बर’ रावखौ रायज्लायनो गोबांआ लाजियोबो जानो हागौ । नाथाय फंसे बाथ्रा मिन्थिनाया मोजां जे गावनि बिमा रावजों रायज्लायनो लाजिनाय एबा बाहायनो रोङै बादि लासिंसिं आरो लाजिथाव बाथ्रा बे बुहुमाव गैया ।। गावनि माहारिनि राव आरो बिमा रावनि बादि गुबुन रावआ जेब्लाबो जानो हाया । बेयो जेब्लाबो गुदै-मिलौहाब ।

गाननाय जोमनाय हारिमु:

गाननाय जोमनाय हारिमुआव गुबुन ओनसोलफ्राव जेरैबादि गोहोम गोलैदों थिक बेबादिनो जोंनि कलाइगाव हालामावबो गोलैनाय नुनो मोननाय जादों ।

मोसानाय मुसुरनाय: मोसानाय-मुसुरानय, दामनाय-देनाय हारिमुआव कलाइगावल’ नङा गुबुन गुबुन ओनसोलफोरावबो गाज्रि रोखोमै गोहोम गोलैनाय नुनो मोननाय जादों । जाय समाव जों गावबा गावनि राव हारिमु थुनलाइखो लानानै गोग्गायो आरो गावनि सिनायथिजों थांना थानो लुबैयो बेबादि समाव दुखु नांथावभाबै गोहोम खोख्लैहोदों असमिया मेदियाया । रेदिअ’, टि.भि., भि.सि.ढि., सावथुन बेफोरनिफ्राय जोंनि ओनसोलनि बर’फोरा बांसिन रंजानाय लायो । जायनि थाखाय बर’ रावनि जेबो टि.भि. सेनेलफोर गैया, बर’ सावथुन नायनाय बाथ्राखोबो जों साननो हाया । नाथाय असमीया सावथुन नायनो गोसो गैयाबाबो मेल्लासो बिसोरनिया ।

बेफोरनिफ्रायनो गाज्रि गोहोम गोलैदों जोंनि हरिमुआव ।

बर’ गामिफोराव जों नायोब्ला नुनो मोनो जे बर’फोरा असमीया मेथाइफोरखौसो बांसिन खोनानो मोजां मोनो । मानसिफोरा जुदियोबा बर’ नाथाय मोसानो आरो रंजानो मोजां मोनो असमीया बिहु मेथाइयावसो । बेनि ओंथिया मा ? बिसोरनि थै रोदायाव, गोसो गोरबोआव गासैबो असमीया राव-हारिमुआ हाबजोबबाय नामा ? बे मोनसे गेदेर सोंलु ।।