Rongjali the mouthpiece of Bisungra Harimu Afad, Kalaigaon

Published on the occasion of 19th Kalaigaon Miru Rongjali Bwisagu Khwngthai on 30th April, 2017. Donated by Bhadra Kt. Baro of Chengapather...

 

सुजुगिरिनि रेबगन

            “नै फैलायबाय सफैलायबाय

            रंजालि बैसागु सफैलायबाय

            हायलाला हुयलाला मोसादेलाय”

            बैसागुनि समाव सुबुं माहारिजों लोगोसे मिथिंगा बिखाया रंजाखाङो । रंजालि बैसागु होननानै बुङोब्ला गासैबो रंजालिनि महर लायो । बे रंजालि बोथोरनि समाव गिबि गिबियावनो मानगोनां राइजो राजा मेलेमजिबि, मानगोनां लिरगिरि आरो फरायसा फरायसुलि नोंथांमोननिसिम रंजालि बैसागुनि गोजोन हामलायनाय बाउहरबाय ।

            हारिमुआ हारिनि सिनस्रि । आंगो हारिमुखौ नेवसियोब्ला एबा आंगो हारिमुखौ बावगरलाङोब्ला हारिनि सिनायथिया बबेयाव थागोन? दिनै जों बर’फोरा बर’ हारिमुखौ मुलुग दरबाराव सिनायथि होनो हाबाय । गोदान दिल्ली आरो गुबुन गुबुन जायगायाव बर’फोरखौ सिनायग्रा जाबाय । मानोना जों बर’फोरा दख’ना, रेगेरेगां, आर’नाइ आरो गामसा गानना गोबां खेब हारिनि बायदिसिना जेंना सुस्रांनांगौनि आन्दोलन खालामहैबाय ।

            नाथाय गावनि जायगाखौ लाना मोनसे सुंलु जायो । जोंनि हारिमुआ गामियावल’ नामा? जोंनि हारिमुखौ फोथांना लाखिनाया आइजोफोरनियावल’ नामा? जोंनि हारिमुआ मिथिं मेल आफादफोरावल’ मानो ? जोंनि हारिमुआ सन्मान होनाय, मान होनाय, बरायनायफोरावल’ मानो? गोदान दिल्लीयाव जों गावनि हारिमुखौ दिन्थिफुंनो हायोब्ला गावनि जायगायाव मानो हाया? बेनि सायाव राइजो राजा नोंथांमोनखौ गोथौवै साननो थाखाय खावलायहरबाय ।

            हारिमुनि जौगानाय आरो फोथांना लाखिनायाव फोसाव बिजोंफोरनि बिहोमाया गोबां । दिनै बर’ मेदिया एबा फोसाव बिजोंनि आंखालखौ जोबोरैनो मोन्दांदों । आसामाव दिनै फोसाव बिजों होननानै बुङोब्ला गासैबो असमीयाफोरनि । बेनिखाय बे बिजोंफोरा असमीया हारिमुखौ जेब्लाबो जौगाहोनो खामानि मावबोदों । बेफोरखौ नायनायनि जाहोनाव बर’जों लोगोसे गुबुन गुबुन ट्राइबेल हारिफोरनि हारिमुआव बेनि गाज्रि गोहोम गोग्लैदों । मानोना टि.भि. खुलिनाय लोगो लोगो बैसागुनि समाव गासैबो असमीया बिहुनिल’ प्रग्रेम । नाथाय गुबुन फिसा फिसा हारिफोरनि हारिमुखौ जेब्लाबो फोसावनाय नुनो मोननाय जाया । बेफोरखौ नायनायनैनो जोंनि हालामनि इयुन जोलैफोराबो बेफोरखौल’ अनसायनाय नुनो मोननाय जादों ।  बेनिखायनो जोंनि दैदेनगिरि बिथांमोनखौ बे आयदानि सायाव खामानि मावनो खावलायहरनाय जाबाय ।

            बेखिनियावनो फोरमायनो सानोदि देग्लायनि खुगा लाइसियाव जों लाइमोन एबा गोदान लिरगिरि बिथांमोनखौ बांसिन खाबु होनाय जादों । जाहाथे जोंनि गेजेराव थोजासे लिरगिरि सोरजिनो हायो । आरो बे गोथार थांखिजों जों खामानि मावनानै खम समनि गेजेरावब्लाबो बे खामानिखौ मावफुंनाय जादों । बे खामानिखौ मोगथांआव महर होनायनि थाखाय रां अनसुंथाइ होना हेफाजाब खालामनाय चेङापथार गामिनि मुस्रि भद्र कान्त बर’ बिथांनिसिम गोसो गोरबोनिफ्राय हाजासे साबायख’र बाउहरनाय जाबाय । आरोबाव खम समनि गेजेरावब्लाबो जोंनि खावलायनाय लेखा लिरबिदां हरनायानि थाखाय साफ्रोमबो लिरगिरि बिथांमोननिसिम रोजा रोजा साबायख’र बाउहरनाय थाबाय । जों मख’नांगोनदि माखासे लिरबिदांफोरा गोजौ मानथाखोनि नङाब्लाबो गोदान लिरगिरि बिथांमोनखौ थुलुंगाखांहोनो थांखियै बिथांमोननि लिरबिदांफोरखौबो सेबखांना दिहुननाय जादों । लोगोसे बैसागुनि लाइसिब्लाबो बैसागुनि लिरबिदांजों लोगोसे खाइसे गोनां आइदाफोरखौ नोजोर होनानै गुबुन लिरबिदांफोरखौबो बुथुमनाय जादों  ।

            जायखि जायाथों बिजाब सुजुनायनि बेलायाव एसे गोलाव समनि गोनांथि जायो । नाथाय देग्लायनि खुगा लाइसिखौ सेबखांना दिहुननो गोबां खम सम मोननायनि थाखाय साननाय बादियै मावफुंनो हायासै । बेनि थाखाय राइजो राजा नोंथांमोननिफ्राय गोरोन्थिनि निमाहा मोनगोननानै आसा थाबाय ।

            जोबथारनायाव रंजालि खुगा लाइसि 8थि बिसानखौ सेबखांना दिहुननायाव आंजों अराय थाफानानै गासैबो खामानियाव हेफाजाब होनाय सुजुगिरि फारियै मुस्रि नेरसोन बाग्लारि आरो हादतसुला नारजियारि बिथांमोननिसिम साबायख’र बाउहरबाय । आरोबाव बोसोनगिरि फारियै मानगोनां मुस्रि धिरेस्वर बर’ नार्जि, गुलाप बर’ आरो केसब बर’ बिथांमोननिसिम गोसो गोरबोनिफ्राय साबायख’र बाउहरबाय । बेनि अनगायैबो गोबां समाव प्रुफ नायनायाव हेफाजाब खालामनाय कलाइगाव दख’रा बर’ फरायसा आफादनि गाहाइ नेहाथारि फिरुस कान्त बसुमतारि आरो ज्योति दैमारि बिथांमोननिसिम हाजासे साबायख’र बाउहरनाय जाबाय ।

            जोबथारनायाव फिन खेबसेबाव साफ्रोमबो फरायगिरि, लिरगिरि, राइजो-राज नोंथांमोननिसिम गोबावैब्लाबो रंजालि बैसागुनि हाजासे गोजोन हामलायनाय बाउहरनाय जाबाय । साफ्रोमबोनि जिउआ रंजालि बैसागुनि बारहावाजों रंजालि जाथोंनि मिजिंजों सुजुगिरिनि सुंद’ लिरबिदांखौ एसेआवनो दोनथ’नाय जाबाय ।

।। बर’ राव गेवलांथों ।।

।। जै बर’ हारिनि जै ।।

।। जै बड'लेण्डनि जै ।।

            नोंथांमोननि फोथायजाथाव

मुस्रि दानसोरां बर’

गाहाइ सुजुगिरि

रंजालि (खुगा लाइसि)

दाइनथि बिसान

खालार: 30 एप्रिल, 2017

 

 

दोंनै खन्थाइ:-

आंनि मोजां मोननाय थरथिंसे निजोरा

                                                                                                   नेंसाम बाग्लारी

फागुन दाननि थिं थिं सानदुं

सिउ-सिउ बारनाय बार,

बायदेमलाय-सुदेमलाय            

हायलालाय-हुयलालाय बैसागुनि,

आगु रादाब होफैदों नों

थारैनो, फैगोन ना नों?

सैथ्र दाननि गोदान बिलाइ

खिलिदों सेंग्रा सिख्लानि गोरबोआव

बैसागु हाय आय’ बैसागु,

बाथ्रा बिलायनो, गोदान रादाब होफैनो

थारैनो, फैगोन ना नों?

दैमा दैसा निजोरा बोहैदों

खोल-खोल जोंखोल दै,

हर सान सानदों आं

फैगोन खोमा गोदान रादाब

थारैनो, फैगोन ना नों?

नायहर बिबाराबो बारदोंसै

दुम-दुम, दाम-दाम, माय सौदोंसै

बिफां दालायाव खौऔ गाबदोंसै

अखाबो जुब जुब हादोंसै

थारैनो, फैगोन ना नों?

गोमो, गोजा, आर’नाइ फालि लाना

देलायफबना नेदों आं लामा ।

होफैगोन ना नों  आंखौ गोजोन,

थरथिंसे मोजां मोननाय जोंखोल निजोरा

थारैनो, फैगोन ना नों?

लामा नेबाय आं फैगोन सानना

ईस्वोरनि महिमा मा बुजिनो,

थेवबो, आं गावखौ बुरखायो

सानसे नङा, सानसे सुखु फैखायो ।

थारैनो फैगोन ना नों?

थैनि जेनथ’खा

(रुंसारि आदा नेरसोननि बिसम्बियाव)

                                                                                बनिता बर’

जेनथ’खानि गाब सारहोनानै

गोमो-गोथां हि-जोम गाननानै,

रंजालि बैसागुआ फैदों

हाइला-हुइला मोसाना ।

बयबो मोसादो,

बयबो रंजादों,

बरायनो बैसागुखौ

बयबो जान्जि खाफ्रादों ।

नाथाय! हे गसाइ,

फिसाखौ अबथिरा खोमानानै

हावरिया बिमायादि

रंजानो हायाखै,

गोरबो बिखायाव थैनि जेनथ’खा,

मेगनाव मोदै, खुगायाव खुदै

हारसिं बिमाया

गाबदों अराय जिउ ।

लामा नेदों

गोसो लांगोनायाव,

सानदों, “फैगोन आंनि फिसाया सानसे” ।